Kif tista' tipprova tevita l-isfidi marbuta mal-ospitalità
Punti ewlenin
Ara li jkollok id-dettalji ta' plumber, electrician u co-Host disponibbli biex jagħmluhielek eħfef li ssolvi l-problemi
Iż-żamma ta' rutina tgħinek iżżomm l-ispazju tiegħek f'qagħda tajba
Il-komunikazzjoni ċara u l-empatija jafu jgħinuk tevita u tieħu kontroll aħjar tal-isfidi li tiltaqa' magħhom
Tagħmel x'tagħmel, kultant il-problemi dejjem se jinqalgħu. Forsi klijent li ma jistax isib iċ-ċavetta li ħallejtlu jew jinstaddu xi pajp jew katusa. Anki jekk rari tinqala' xi problema kbira, il-Hosts ta' suċċess jaħsbu għal dak li jista' jinqala'.
Dan huwa kif Diana, Superhost minn Oakland, California, tissuġġerixxi li ġġib ruħek f'mumenti ibsin int u tilqa' n-nies.
1. Organizza tim ta' nies li jista' jgħinek
Il-komunità hija l-qofol tal-ospitalità u dik il-komunità tinkludi n-nies li jgħinuk biex in-negozju tal-ospitalità tiegħek jibqa' miexi bla intoppi.
"Għandna l-ismijiet u n-numri ta' plumber, electrician u persuna li tnaddaf id-djar għal li jista' jinqala'," tgħid Diana. U meta Diana tkun qed tivvjaġġa, oħtha tagħmilha ta' Host minflokha f'każ li jinqala' xi intopp. "Jekk tfaqqas xi problema, qatt m'aħna se niġu daharna mal-ħajt."
2. Agħmel dak li hu meħtieġ għaż-żamma tal-post
X'hemm aħjar milli tkun lest/a ssewwi fil-pront problema b'xi pajp jew heater bil-ħsara? Li tevita li dal-affarijiet iseħħu.
"Għandi checklist għaż-żamma tal-propjetà li ndurha ta' kull sena," tgħid Diana. "Xi affarijiet nagħmilhom jien u għal affarijiet oħra nqabbad il-professjonisti jeħduli ħsiebhom. Kull spazju huwa differenti imma importanti li żżomm quddiem għajnejk dak li hu meħtieġ biex iżżomm l-ispazju tiegħek fl-aħjar stat possibbli għall-klijenti."
Iċ-checklist għaż-żamma ta' kull sena ta' Diana tinkludi:
- Li tnaddaf il-qtar mill-weraq u fdalijiet oħra
- Li tiċċekkja li t-tisħin, il-fannijiet u l-apparati tal-arja kkundizzjonata jaħdmu
- Li taħsel dawk it-tamboċċi li diffiċli tilħaqhom biex l-ispazju tagħha jibqa' mdawwal sew
3. Agħmel li tista' biex tikkomunika b'mod ċar
Biex tikkomunika sew mal-klijenti, ikkomunika b'mod onest u realistiku.
"Nemmen li importanti ħafna li qatt ma twiegħed affarijiet li ma tistax tagħti u li dejjem għandek tikkomunika b'mod preċiż ħafna," tgħid Diana. "Anke jekk ma nkunx għadni sibt is-soluzzjoni, dejjem ngħarraf lill-klijenti fuq xiex inkun qed naħdem."
Għalhekk meta nfaqa' pajp eżatt qabel il-wasla ta' klijent, Diana avżat lill-klijent minnufih.
"Ċempilt lill-klijent biex ngħarrfu li qed naħdmu fuq il-problema u staqsejtu jekk nistgħux nittardjaw ftit il-ħin taċ-checkin," tgħid Diana. "Biex inpattilu offrejtlu checkout iktar tard, li apprezza, u ħallejtlu flixkun inbid u nota biex nirringrazzjah. Għal ħafna klijenti, il-komunikazzjoni ċara u xi turija żgħira ta' apprezzament—kemm jekk hux flixkun inbid jew gift card għal kafetterija tal-post—jagħmlu differenza kbira."
4. Isma' x'għandhom xi jgħidu l-klijenti u uri empatija
"Għandna bibien ftit antipatiċi li l-klijenti ħafna drabi ma jirnexxilhomx jiftħuhom, anke jekk spjegajtilhom kif jistgħu jiftħuhom fl-informazzjoni dwar id-dar u fl-istruzzjonijiet taċ-checkin," tgħid Diana. "Meta jiġri hekk dejjem inħallihom jaqsmu l-frustrazzjoni tagħhom miegħi u wara nispjegalhom bil-kalma, wiċċ imb wiċċ jew fuq it-telefown, kif għandhom jagħmlu."
Xi ftit affarijiet li matul is-snin Diana tgħallmet hi u tisma' lill-klijenti tagħha:
- Offri serratura mingħajr ċwievet biex iċ-checkin ikun eħfef
- Ara li jkollok biżżejjed dawl fuq barra biex, meta jkun id-dlam, il-klijenti jistgħu jaslu b'mod sigur
- Itlob l-informazzjoni dwar il-wasla minn qabel u erġa' fakkar lill-klijenti dwar il-ħinijiet taċ-checkin u taċ-checkout
5. Ippjana għall-iktar problemi komuni li jistgħu jinqalgħu
Klijenti li jaslu kmieni, klijenti li jagħmlu checkout tard u l-problemi bl-indafa kollha jistgħu joħolqu xi intopp. Hawn għandek xi ideat fuq kif tilqa' għall-problemi li jistgħu jinqalgħu:
- Agħti ħinijiet taċ-checkin u taċ-checkout ċari u spjega għaliex qed tagħżel dawk il-ħinijiet ("Jekk jogħġbok tagħmilx checkin qabel it-15:00 biex nilħqu nħejju l-post għalik")
- Agħżel il-preferenzi għall-bookings tiegħek b'mod li jkollok iktar ħin għat-tindif
- Nissuġġerulek toffri lill-klijenti post fejn iħallu l-bagalji tagħhom jekk taf li se jkunu qed jaslu qabel il-ħin taċ-checkin
- Tinsiex l-iktar dettalji importanti—kif għandhom jidħlu fl-ispazju tiegħek, x'jistgħu jistennew li jsibu, eċċ—fid-deskrizzjoni tal-listing u fl-istruzzjonijiet taċ-checkin biex il-klijenti jkunu jafu x'għandhom jistennew
Agħti l-informazzjoni dwar id-dar li jkun fiha l-istruzzjonijiet ta' kif wieħed jista' jaċċessa l-wifi u juża l-appliances li huma ftit mhux tas-soltu
Meta tilqa' għall-problemi qabel jinqalgħu, tkun qed tgħin biex toffri esperjenza mill-aqwa lill-klijenti tiegħek.
U jekk għad għandek xi mistoqsijiet jew tiltaqa' ma' xi problemi, tista' tikkuntattjana biex inkunu nistgħu ngħinuk.
Diana la taħdem għal Airbnb u lanqas taħdem f'isem Airbnb. Bħala Host Creator, issieħbet ma' Airbnb biex tikteb il-ħsibijiet tagħha u toħloq dal-vidjow. L-opinjonijiet, l-istejjer u x-xhieda tagħha huma veri, ġejjin mingħandha u mhumiex stqarrijiet uffiċjali ta' Airbnb.
Punti ewlenin
Ara li jkollok id-dettalji ta' plumber, electrician u co-Host disponibbli biex jagħmluhielek eħfef li ssolvi l-problemi
Iż-żamma ta' rutina tgħinek iżżomm l-ispazju tiegħek f'qagħda tajba
Il-komunikazzjoni ċara u l-empatija jafu jgħinuk tevita u tieħu kontroll aħjar tal-isfidi li tiltaqa' magħhom