Airbnb Kmamar, mudell ġdid għall-kmamar privati

Tista' taqsam iktar dettalji dwarek mal-klijenti bil-Passaport tal-Hosts il-ġdid tiegħek.
Minn Airbnb f'did-data: 17 ta’ Jan 2024
Vidjow ta' 4 minuti
Aġġornat f'did-data: 17 ta’ Jan 2024

Messaġġ mingħand l-editur: Dal-artiku ġie ppubblikat bħala parti mill-Aġġornament tas-Sajf 2023 ta' Airbnb. L-informazzjoni jaf laħqet inbidlet minn meta dal-artiklu ġie ppubblikat. Sir af iktar dwar l-aħħar verżjoni tas-servizz tagħna.

Airbnb bdiet bħala pjattaforma fejn il-vjaġġaturi setgħu joqogħdu ġewwa d-dar ta' ħaddieħor mingħajr ma jonfqu ħafna flus. Matul is-snin, il-Hosts tal-kmamar privati laqqgħu ħafna nies flimkien u għenu lill-klijenti jiskopru postijiet ġodda qishom kienu nies tal-post.

Illum, l-iktar minħabba l-ekonomija kif inhi bħalissa, ħafna n-nies jixtiequ jivvjaġġaw mingħajr ma jonfqu ħafna flus. U wara ħafna snin ta' tbegħid minħabba r-restrizzjonijiet tal-pandemija, qed ifittxu modi ġodda kif jiltaqgħu mal-oħrajn f'atmosfera ġenwina.

Għalhekk qed inħabbru Airbnb Kmamar, mudell ġdid għall-kmamar privati. Fost il-bidliet hemm:

  • Il-Passaport tal-Hosts, biex il-klijenti jsiru jafuk qabel jibbukkjaw

  • Kategorija ġdida, "Kmamar", u filtri tat-tiftix imfassla mill-ġdid biex nagħmluha eħfef għall-klijenti li jsibu l-kmamar privati

  • Dettalji ġodda marbuta mal-privatezza biex kulħadd ikun moħħu mistrieħ

Passaport tal-Hosts

Il-klijenti qalulna li qabel jibbukkjaw, ikunu jixtiequ jkunu jafu ma' min se jkunu qed jaqsmu l-ispazju. Il-Passaport tal-Hosts issa jagħtik iktar opportunitajiet li tintroduċi ruħek mal-klijenti. Dan jiġbor ukoll xi dettalji mill-profil tiegħek u jurihom fir-riżultati tat-tiftix u fil-listing tiegħek.

L-ewwel bidla li se ssib hija li r-ritratt tal-profil tiegħek se jibda jintwera fir-rokna tar-ritratt ewlieni tal-listing tiegħek. Klijent jista' jagħfas jew jikklikkja fuqu biex jiftaħ il-Passaport tal-Hosts tiegħek u jsib id-dettalji li tkun għażilt li taqsam dwarek.

Ismek, is-snin li ilek tilqa' n-nies, ir-rating bl-istilel u n-numru ta' reviews li ksibt mingħand il-klijenti se jintwerew fin-naħa ta' fuq tal-Passaport tal-Hosts tiegħek. Taħthom se jintwerew taqsimiet ġodda tal-profil tiegħek fejn tista' tagħżel li taqsam il-post fejn toqgħod, il-passatempi tiegħek, isem il-pet, xi ħaġa interessanti dwarek u dak li jagħmel il-post tiegħek speċjali.

Tista' teditja l-profil tiegħek biex tagħżel ir-ritratt u l-informazzjoni li taqsam. Barra minn hekk jaf innutajt li t-taqsimiet li diġà kienu jintwerew fil-profil tal-Hosts issa għandhom disinn ġdid u għalhekk nissuġġerulek tara li x-xogħol tiegħek, l-ilsna li titkellem u l-post fejn tinsab qed jintwerew kif tixtieqhom.

Ikseb xi pariri fuq kif tieħu ritratt mill-aqwa għall-Passaport tal-Hosts

Il-Kategorija Airbnb Kmamar

Issa eħfef għall-klijenti li jsibu l-listing tiegħek mill-kategorija l-ġdida Kmamar li tinsab fin-naħa ta' fuq tal-paġna ewlenija. Il-filtru tat-tiftix imfassal mill-ġdid jagħmilhielek ukoll eħfef li taqleb bejn il-kmamar privati, id-djar sħaħ u kull xorta ta' post. Il-prezz medju tax-xorta ta' post li jagħżel il-klijent jintwera fil-filtru.

Mit-3 ta' Mejju 'l quddiem, il-listing tiegħek għandu jkollu dar-rekwiżiti kollha biex jibda jintwera fil-Kategorija Kmamar:

  • Il-klijent ikollu l-kamra tas-sodda privata tiegħu li tissakkar b'bieb.

  • Il-klijent ikollu aċċess għal kamra tal-banju privata jew maqsuma mal-oħrajn.

  • Il-klijent ikollu aċċess għal mill-inqas spazju komuni wieħed bħal kċina, salott jew bitħa.

  • Il-Hosts jużaw isimhom fuq il-listing u mhux isem ta' negozju jew isem ieħor.

  • "Kamra privata" tkun magħżula bħala x-xorta ta' kamra jew ix-xorta ta' listing fis-settings tal-listing tiegħek.

  • Il-kamra privata ma tkunx kamra maqsuma mal-oħrajn, lukanda, resort, tinda, kamper, unità indipendeti (bħal pereżempj bungalow f'bitħa) jew xi xorta oħra ta' propjetà minn dil-lista.

Il-listings li ma jkollhomx dal-kriterji l-ġodda mhux se jintwerew lill-klijenti bħala Kmamar fir-riżultati tat-tiftix u fuq il-paġni tal-listings. Tista' tagħżel xorta ta' listing oħra jew tibdel il-listing tiegħek biex ikun skont dawn il-kriterji. Jekk tixtieqna nżidu jew inneħħu l-listing tiegħek mill-Kategorija Airbnb Kmamar, tista' tibgħat talba lill-Għajnuna lill-Komunità.

Privatezza u kumdità

Il-klijenti li jfittxu listings ta' kmamar privati ħafna drabi jfittxu dettalji li jgħinuhom iħossuhom komdi u siguri. Biex ngħinuk tifhem x'għandek tistenna, mexxejna dil-informazzjoni iktar 'il fuq fil-paġna tal-listing tiegħek:

  • Jekk il-bieb tal-kamra tas-sodda għandux serratura. Il-klijenti jistennew li jkunu jistgħu jsakkru l-bieb tal-kamra tagħhom. Nissuġġerulek twaħħal serratura jekk il-kamra privata li toffri m'għandhiex waħda.

  • Jekk il-kamra tal-banju tkunx ensuite, privata jew maqsuma ma' oħrajn. Kull listing ta' Airbnb jeħtieġ li jkollu aċċess għal kamra tal-banju b'sink, toilet u doċċa jew banju. Il-listing tiegħek jista' jsemmi jekk il-kamra tal-banju għall-klijenti hix privata u ensuite, privata imma trid tgħaddi minn spazju maqsum mal-oħrajn biex tasal għaliha (bħal pereżempju kuritur) jew maqsuma ma' oħrajn.

  • Min iktar jista' jkun fil-propjetà. Il-klijenti jixtiequ jkunu jafu hux se jiltaqgħu ma' ħaddieħor—bħal klijenti oħra jew membri tal-familja jew kumpanni tal-kamra tal-Host—waqt iż-żjara tagħhom. Nissuġġerulek issemmi min iktar jista' jkun hemm biex tevita nuqqas ta' ftehim mal-klijenti.

  • Kemm mistennija jkunu soċjevoli. Ħafna klijenti jieħdu gost iqattgħu l-ħin mal-Hosts għax b'hekk jiskopru l-post li jkunu qed iżuru qishom kienu nies tal-post. Tista' ssemmi kemm lest/a tqatta' ħin mal-klijenti waqt iż-żjara tagħhom.

Biex tibdel dad-dettalji, iftaħ it-taqsima Kmamar u Spazju tal-listing tiegħek.

Airbnb Kmamar u 25 bidla ġdida oħra għall-Hosts se jibdew deħlin fis-seħħ dil-ġimgħa bħala parti mill-Aġġornament tas-Sajf 2023 ta' Airbnb.

Airbnb
17 ta’ Jan 2024
Dan kien ta' għajnuna għalik?