Pariri fuq kif tagħmilha eħfef li tilqa' n-nies waqt l-iktar żmien tas-sena popolari

L-iktar żmien popolari tas-sena ma jfissirx biss iktar klijenti: Jekk ma tantx ikun hemm żmien bejn booking u ieħor, ix-xogħol jaf ikun wisq għalik waħdek. Aqra dawn il-pariri fuq kif tkompli toffri ospitalità mill-aqwa, anki meta jkollok iktar bookings.

Meta jkollok bookings eżatt wara xulxin, il-fatt li jkollok rutina li timxi magħha wara kull checkout jgħinek biex tħejji l-post għall-klijenti ta' wara iktar malajr. Robin, Superhost ġewwa Mount Barker, l-Awstralja, tissuġġerixxi li tuża checklist, kemm jekk qed tnaddaf int stess kif ukoll jekk tqabbad lil xi ħadd inaddaflek il-post.

"L-aqwa ħaġa dwar iċ-checklists hija li jgħinuni nżomm quddiem għajnejja dak li għandi nagħmel biex qatt ma ninsa xejn," tgħid Robin. "Ma trid xejn biex tinsa xi jkollok tagħmel u, il-fatt li jgħinuk tiftakar sal-inqas ħaġa, jagħmlu l-ospitalità eħfef għalik u isbaħ għall-klijenti."

Iktar pariri fuq kif tħejji l-post bejn klijent u ieħor f'inqas ħin:

• Ara li jkollok żewġ jew tliet settijiet bjankerija żejda. Iktar lożor u xugamani jgħinuk tħejji l-kamra tas-sodda, il-kamra tal-banju u l-kċina mingħajr ma jkollok għalfejn taħsel kollox mill-ewwel. Ikollok iktar settijiet x'tuża f'każ li jkun hemm tbajja bħal tal-makeup jew taż-żjut tal-ikel li ma jkunux iridu jitilqu.

• Uża għata għall-kwilts, investi u għata tas-saqqijiet. U ixtri ftit settijiet żejda minnhom ukoll biex tħaffef il-proċess ta' tħejjija bejn booking u ieħor.

• Irranġa biex iwasslulek il-prodotti meħtieġa. B'hekk tkun tista' tirċievi l-prodotti għat-tindif, il-prodotti għall-indafa personali, il-prodotti tal-kċina u oġġetti oħra li teħtieġ jew li tħalli għall-klijenti mingħajr ma jkollok għalfejn toqgħod tmur tixtri kull darba.

• Sib lil xi ħadd ieħor li jista' jgħinek bix-xogħol ta' tindif, żamma u fix-xogħol tal-ġnien. B'hekk ix-xogħol qatt ma jaqa' lura, anki meta int u n-nies tas-soltu ma jkunux jistgħu jaqduk. Jekk tħoss li dan kollu jeħtieġ wisq xogħol, nissuġġerulek issib Co-Host.

Il-proċess taċ-checkout m'għandux ikun ikkumplikat, la għalik u lanqas għall-klijenti tiegħek. F'Mejju nedejna għodod għaċ-checkout maħsuba biex inħaffu l-proċess għal kulħadd.

Fost il-faċilitajiet il-ġodda hemm in-notifiki push awtomatiċi u ċ-checkout b'mossa waħda. Airbnb tibgħat il-ħin u l-istruzzjonijiet taċ-checkout lill-klijenti tiegħek fil-17:00 (ħin tal-post) jum qabel iċ-checkout. Se jirċevuhom il-klijenti li jkunu qed jużaw l-app ta' Airbnb u li jkollhom in-notifiki push mixgħula. Se jkunu jistgħu wkoll jagħfsu buttuna biex jgħarrfuk li ċ-checkout lest u biex tkun tista' tibda tħejji ruħek għall-klijent li jmiss.

Joh, Superhost ġewwa Forestville, California, tibgħat messaġġi awtomatiċi marbuta maċ-checkout—l-iktar matul l-iktar żminijiet popolari tas-sena. "Jien ngħid lill-klijenti li fil-11:00 ikun ġej xi ħadd biex iħejji l-appartament għall-klijenti li jmiss u għalhekk importanti li jħallu l-post fil-ħin," tgħidilna.

Iktar pariri fuq kif tiffranka l-ħin bl-għodod taċ-checkout:

• Oħloq istruzzjonijiet taċ-checkout bażiċi. Tista' toħloq l-istruzzjonijiet taċ-checkout malajr billi tagħżel minn lista tal-iktar ħames biċċiet tax-xogħol komuni. Għal kull waħda tista' żżid iktar dettalji. Għall-istruzzjoni "Armi ż-żibel" tista' pereżempju titlob lill-klijenti jqiegħdu ż-żibel imħallat f'landa u dak għar-riċiklaġġ f'oħra.

• Addatta t-talbiet għall-post tiegħek. Jekk pereżempju għandek BBQ fuq barra bħala wieħed mill-kumditajiet, tista' titlob lill-klijenti jerġgħu jgħalquh wara li jużawh.

• Żid il-kartolini taċ-checkout. Wara li tkun ħloqt l-istruzzjonijiet bażiċi taċ-checkout tista' żżid kartolina taċ-checkout li twassal għal messaġġ awtomatiku jew tweġiba ta' malajr marbuta mal-istruzzjonijiet. Dan mod tajjeb kif tibgħat it-tfakkiriet lill-klijenti li mhux jużaw l-app ta' Airbnb jew li ma jkollhomx in-notifiki push tal-app mixgħula.

Id-dejta ta' Airbnb minn madwar id-dinja kollha turi li meta mqabbla mal-ewwel tliet xhur tal-2022, it-tfittxijiet għal-listings b'pixxina żdiedu b'iktar minn 60% fl-ewwel tliet xhur tal-2023. L-iktar Kategoriji ta' Airbnb ibbukkjati kienu Qrib il-bajja, Pixxini sbieħ u Kabini.

Jekk taġġorna l-listing tiegħek biex tenfasizza l-faċilitajiet u l-kumditajiet tiegħu skont iż-żmien tas-sena, il-klijenti li jkunu qed ifittxu dak li qed toffri jkunu jistgħu jsibu u jibbukkjaw il-post tiegħek.

"Oħti xogħolha huwa li żżejjen il-postijiet fuq ġewwa u meta jaqleb l-istaġun, tissellef xi oġġetti mingħand ħanut tar-rigali tal-belt u tużahom biex tibdilli l-istil tal-post," jgħid Fred, Superhost ġewwa Placencia, il-Belize. "Kull sena nżidu kumdità ġdida wkoll—xi ħaġa speċjali biex il-klijenti li jkunu diġà bbukkjaw magħna jitħajru jerġgħu jiġu jżuruna. Żidnielhom gazebo, osservatorju u bar fuq l-ilma."

Iktar pariri fuq kif tenfasizza l-kumditajiet skont l-istaġuni:

• Żid ritratti addattati għall-istaġun. Fix-xhur tas-sħana, uri lill-klijenti l-pixxina, il-BBQ, il-branda jew il-mogħdija li tagħti għall-bajja. Għax-xhur iktar kesħin, tista' ttella' ritratti tal-fireplace, tal-hot tub jew tal-mogħdija ski-in/ski-out li tagħti għal-lifts.

• Aġġorna d-deskrizzjoni tal-listing tiegħek. Dal-aħħar żidt xi kumditajiet fil-post tiegħek, kif għadhom kif għamlu Fred u oħtu? Enfasizza li huma ġodda fid-deskrizzjoni tal-listing u żid ir-ritratti tagħhom.

• Ibdel id-dettalji tal-listing tiegħek. Iċċekkja s-settings tal-kont u ara li mmarkajt kull kumdità li bħalissa hemm fil-post tiegħek. Agħti iktar dettalji meta nistaqsuk tixtieqx tagħmel hekk.

L-informazzjoni f'dal-artiklu jaf laħqet inbidlet minn meta ġie ppubblikat.