Gwida dwar kif tibda tilqa' n-nies b'mod sostenibbli

Li tkun host li jirrispetta l-ambjent mhux biss tajjeb għall-pjaneta, imma tajjeb ukoll għan-negozju tal-ospitalità tiegħek. Fl-2019, in-numru ta' żjarat f'djar ekoloġiċi żdied b'141 fil-mija* meta mqabbel mas-sena ta' qabel.

Biex ngħinuk issir host aktar sostenibbli, ħdimna mill-qrib mal-Programm Ambjentali tan-Nazzjonijiet Uniti, l-awtorità ambjentali globali ewlenija fin-Nazzjonijiet Uniti, u l-Fond Dinji għan-Natura (WWF), l-organizzazzjoni ewlenija dinjija għall-konservazzjoni, għal għarfien espert. Ġbarna wkoll pariri mingħand hosts minn madwar id-dinja li ħadu passi sempliċi imma importanti ħafna biex jagħmlu impatt.

Kompli aqra biex issir taf kif tista' toħloq żjara iktar sostenibbli għall-klijenti tiegħek.

Meta tibdel l-ispazju tiegħek biex jaħli inqas elettriku, tkun qed tnaqqas l-ammont ta' riżorsi li tuża, tnaqqas l-ispejjeż u tnaqqas l-impronta tal-karbonju tiegħek. Hawn għandek xi ideat fuq kif tiffranka l-enerġija:

• Fakkar lill-klijenti biex jitfu t-tagħmir tagħhom meta ma jkunux qed jużawh: Sa 50%** tal-enerġija użata mill-mowbajls ġejja minn ċarġers li jkunu mqabbda mal-plagg meta ma jkunux qed jintużaw.
• Ibdel it-temperatura tal-ħiter tal-ilma tiegħek:Filwaqt li t-temperatura standard għal ħiter tal-ilma hija ta' 60 grad Celsius, tista' tnaqqasha għal 48-54 grad Celsius biex tiffranka l-enerġija.
• Iċċekkja l-bozoz tiegħek:Meta tuża bozoz bl-inqas watts possibbli, dawn jipproduċu inqas sħana u maż-żmien jgħinuk tnaqqas il-konsum tal-elettriku. Bozoz li jaħlu inqas elettriku bħal CFL u LED ukoll jużaw inqas enerġija u jdumu iktar** minn bozoz li jaħdmu bis-sħana.
• Żomm l-arja barra mill-ispazju tiegħek: Waħħal strippi mal-bibien biex ma tidħolx arja minn taħthom u iżola t-twieqi biex tiffranka l-ispejjeż tat-tisħin u t-tkessiħ.
• Ixtri termostati intelliġenti b'kontrolli awtomatiċi: It-termostati li jaħdmu bil-wifi jistgħu jgħinuk tikkontrolla t-temperatura skont meta jaslu u jitilqu l-klijenti.
• Iċċekkja l-appliances tiegħek: Meta jiġi ż-żmien li tixtri appliances ġodda, agħżel dawk li jaħlu l-inqas elettriku.

Provvisti għat-tindif li jistgħu jerġgħu jintużaw u prodotti li jistgħu jerġgħu jimtlew huma opportunità mill-aqwa biex ħafna nies inaqqsu l-impatt ambjentali tagħhom. Ipprova dal-pariri biex tkun iktar ekoloġiku:

• Tagħżilx provvisti għat-tindif li jintużaw darba biss: Superhost Anna minn Pembrokeshire, Wales, flok tħalli srievet tal-karti li jintremew wara li jintużaw, fil-kċina tħalli sponoż u ċraret tat-tindif tal-mikrofibra li jistgħu jinħaslu u jerġgħu jintużaw.
• Uża prodotti tal-karta riċiklata: Għal kwalunkwe prodott tal-karta li tipprovdi, bħal tissues tal-wiċċ jew toilet paper, agħżel karta 100% riċiklata biex tibża' iktar għall-ambjent.
• Naqqas l-użu tal-kimiċi aggressivi: Ixtri sapun tal-platti, deterġent tal-ħasil tal-ħwejjeġ u prodotti għall-indafa personali li mhumiex tossiċi jew li għandhom livell baxx ta' tossiċità, li huma naturali jew li huma bijodegradabbli. Ġewwa Bordeaux, Franza, is-Superhost Pascale tixtri prodotti organiċi għall-kamra tal-banju u għall-indafa personali mill-ħwienet tal-post.
• Ibda uża tessuti organiċi: Meta jiġi ż-żmien biex tibdel il-lożor u x-xugamani, agħżel tessuti organiċi biex tevita l-pestiċidi, l-insettiċidi u tossini oħra li jagħmlu ħsara lin-nies u lill-ekosistemi.

Minħabba li l-ilma nadif u frisk huwa riżorsa limitata, importanti li toqgħod attent/a għall-ammont ta' ilma li tużaw int u l-klijenti tiegħek, speċjalment minħabba li l-kriżi tal-klima qed twassal għal iktar nixfiet. Dawn huma xi modi li jistgħu jkunu ta' benefiċċju għall-iffrankar tal-ilma:

• Ħalli xi tfakkiriet għall-klijenti: Jekk tnaqqas il-ħin li tqatta' fid-doċċa b'minuta, tista' tiffranka iktar minn gallun** ilma kull minuta. Antonella, Superhost ġewwa Milan, l-Italja, twaħħal xi noti ħdejn il-viti tal-ilma biex tħeġġeġ lill-klijenti jagħlqu l-vit huma u jaħslu snienhom. Tista' wkoll tħeġġeġ lill-klijenti jdumu inqas fid-doċċa.
• Iċċekkja li m'għandekx viti jqattru: Biex issib jekk għandekx viti jqattru, iċċekkja sikwit madwar it-toilets, is-sinkijiet, il-banjijiet u l-appliances li jużaw l-ilma. Miter tal-ilma intelliġenti jista' jżomm kont tal-ilma li qed tuża u javżak jekk jinnota xi attività mhux tas-soltu—jekk pereżempju tinsa tagħlaq il-vit tal-kċina jew jekk ikun qed tqattar id-dishwasher.
• Uża settings u appliances li ma jaħlux ħafna elettriku: Il-magni tal-ħasil tal-ħwejjeġ u tal-platti jużaw ħafna ilma. Jekk l-ispazju tiegħek għandu xi waħda minn dawn il-magni, ħeġġeġ lill-klijenti jużaw is-settings tal-ħasil ta' malajr jew dawk ekoloġiċi. U meta jiġi ż-żmien li tibdel l-appliance, agħżel waħda li ma taħlix ħafna elettriku u juża inqas ilma.
• Installa apparat biex tnaqqas il-ħela tal-ilma: Tista' wkoll tagħmel differenza billi tinstalla viti li jnaqqsu l-fluss tal-ilma u tojlits li jnaqqsu l-fluss tal-ilma jew li għandhom għażla fil-flushing ta' żewġ ammonti differenti ta' ilma. Ġewwa t-Tażmanja, l-Awstralja, is-Superhost Merrydith għandha shower head speċjali li tnaqqas il-fluss tal-ilma filwaqt li xorta tinħass pressa għolja.

*Skont id-dejta interna ta' Airbnb dwar iż-żieda sena wara sena fin-numru ta' klijenti li jibbukkjaw listings li fl-ismijiet u d-deskrizzjonijiet tagħhom kellhom ċertu kliem (jaħli inqas elettriku, favur l-ambjent, eċċ.) bejn Awwissu tal-2018 u Awwissu tal-2019

**Minn 60 Azzjoni għall-Pjaneta tal-Fond Dinji għan-Natura (WWF), ippubblikat fil-5 ta' Marzu 2021

L-informazzjoni li tinsab f'dal-artiklu jaf laħqet inbidlet minn meta ġie ppubblikat.