Ġedded il-listing tiegħek

Ospitalità tal-aqwa livell teħtieġ li l-paġna tal-listing tiegħek tgħarraf lill-klijenti eżatt dwar x'għandhom jistennew. Il-klijenti jistennew li jsibu post fi stat tajjeb u li jidher eżatt bħalma juru r-ritratti. Ikunu jridu wkoll li l-kumditajiet li tkun immarkajt ma jkunux moħbija jew tqal biex tużahom.

Ħafna drabi jkun hemm inqas ċans li l-klijenti jifhmu jew jaħsbu ħażin dwar il-post tiegħek meta tagħti iktar dettalji. Fit-tab Listings għandek issib l-għodod meħtieġa biex iġġedded id-dettalji tal-listing tiegħek.

Għin lill-klijenti jifhmu kif imqassam il-post tiegħek billi tuża d-dawra bir-ritratti biex issarbat ir-ritratti tal-listing tiegħek awtomatikament, kamra b'kamra.

Ibda billi ttella' ritratti li jagħti stampa ċara ta' kull kamra u spazju maqsum mal-oħrajn.

• Uża ritratti ta' kwalità. Ħu r-ritratti għall-wisgħa u ara li jkun hemm biżżejjed dawl int u tieħu r-ritratti. Tella' l-ikbar verżjoni tar-ritratti, qatt inqas minn 1024 pixel b'683. Nissuġġerulek tqabbad fotografu professjonali.
• Tella' għadd ta' ritratti ta' kull kamra. Tella' taħlita ta' ritratti meħuda mill-bogħod, mill-qrib u mill-qrib ħafna. Aqbad dawk id-dettalji li jinteressaw lill-klijenti, bħal ngħidu aħna ċ-ċarġer li jaħdem ma' għadd kbir ta' mowbajls fuq il-komodina ħdejn is-sodda jew il-kafè u tejiet u t-tagħmir kollu marbut magħhom li hemm fil-kċina.
• Uri l-faċilitajiet u l-kumditajiet. Tella' r-ritratti ta' fejn se jorqdu n-nies, taż-żoni fuq barra u ta' kull faċilità li hemm maħsuba għall-pets, għall-familji bit-tfal jew għal dawk li jaħdmu mid-dar.
• Semmi l-faċilitajiet tal-aċċessibbiltà. Uri li l-post tiegħek addattat għan-nies li ma tantx jistgħu jiċċaqalqu. Ara li taqra l-gwida ta' Airbnb fuq kif tieħu r-ritratti tal-faċilitajiet tal-aċċessibbiltà.

Imbagħad imxi ma' dal-proċess biex iżżid id-dawra bir-ritratti.

1. Agħżel Oħloq id-dawra bir-ritratti. L-algoritmu speċjali tal-IA ta' Airbnb iqassam ir-ritratti tal-listing tiegħek f'19-il xorta ta' kmamar u spazji. Ir-ritratti li ma jagħrafx jitqiegħdu fil-kategorija Iktar ritratti.

2. Agħti ħarsa lejn id-dawra bir-ritratti tal-post tiegħek. Ara li tellajt mill-inqas ritratt wieħed għal kull kamra li hemm fil-post. Tista' ċċaqlaq, iżżid u tħassar ir-ritratti.

3. Żid deskrizzjonijiet dettaljati ta' kull ritratt biex tgħid x'hemm f'kull kamra jew f'kull spazju.

4. Biex tagħti ħarsa lejn kif se jintwerew ir-ritratti fil-listing tiegħek, iftaħ L-ispazju tiegħek u agħfas il-buttuna Uri.

"Ħafna nies l-ewwel ma jfittxu r-ritratti u jafu jqattgħu iktar ħin jarawhom milli jaqraw id-deskrizzjoni tal-listing," tgħid Sadie, Superhost ġewwa Santa Fe, New Mexico.

Il-klijenti jistennew li l-postijiet li jibbukkjaw fuq Airbnb ikunu jaqblu mad-deskrizzjoni tal-listing. L-aqwa paġni tal-listing jagħtu stampa ċara ta' dak li l-klijenti jistgħu jistennew li jaraw, jisimgħu u jħossu huma u joqogħdu fil-post tiegħek.

1. Ara li Isem il-listing jagħti dettalji uniċi dwar il-post tiegħek u dak li hemm madwaru. Ngħidu aħna, l-isem "Appartament lussuż qrib Smart City" ifiehem lill-klijenti fi ftit kliem li huwa appartament lussuż ġewwa x-Xgħajra, Malta.

2. Uża d-Deskrizzjoni tal-listing biex tgħid lill-klijenti x'jistgħu jistennew li jsibu meta jagħżlu l-post tiegħek. Agħti informazzjoni siewja bħall-post fejn jinsab il-listing, kif inhu mgħammar jew ix-xorta ta' ospitalità li se tingħatalhom. Tista', ngħidu aħna, tgħid li hemm gallarija li minnha tista' tara x-xemx nieżla wara x-xefaq jew li fil-qrib hemm kafetterija fejn issib pastizzi u ftajjar biż-żejt mill-itjeb.

3. Fit-taqsima Il-propjetà tiegħek għandek tagħti deskrizzjoni ġenerali tal-kmamar u l-ispazji fil-post tiegħek. Uża dit-taqsima biex tagħti dettalji siewja dwar dak li taħseb li jistgħu jistaqsuk il-klijenti. Tista', ngħidu aħna, tgħidilhom li hemm parapett żgħir quddiem id-dar u li f'waħda mill-kmamar hemm ġabra ta' diski vinyl għal min jixtieq idoqq ftit mużika.

4. Fit-taqsima Qsim tal-post fejn jinsab il-listing tista' tagħżel li tagħti l-post eżatt għall-propjetà tiegħek biex tgħin lill-klijenti jifhmu x'se jkun hemm madwarhom. Jekk le, se nuruhom post ġenerali u nagħtuhom il-post preċiż wara l-booking biss.

L-aqwa deskrizzjonijiet huma dawk li jkunu ċari u onesti. Ħafna drabi, ħafna tiżjin bil-kliem u esaġerazzjonijiet iwasslu għal ferħa bla temma għall-klijenti u reviews ħżiena għalik.

L-Editur tal-listings jagħmilhielek eħfef li timmarka l-kumditajiet li hemm fil-post.

1. Agħfas fuq is-simbolu taż-żieda (+) taħt Kumditajiet. Tista' ssib kważi 150 kumdità maqsuma skont il-kategorija jew imsarbta skont l-ewwel ittra tal-isem u tista' tagħżel li tfittixhom billi tikteb l-isem direttament.

2. Agħżel is-simbolu taż-żieda ħdejn kull faċilità li hemm fil-listing tiegħek.

3. Agħfas fuq il-buttuna Uri biex tara kif il-bidliet li qed tagħmel fil-paġna tal-listing tiegħek se jintwerew lill-klijenti.

Importanti li timmarka l-kumditajiet kollha li hemm fil-post tiegħek u li kull kumdità tkun taħdem. Il-klijenti jistgħu jiffiltraw ir-riżultati tat-tiftix tagħhom bl-iktar faċilitajiet u kumditajiet imfittxija bħall-arja kkundizzjonata, parkeġġ bla ħlas u magna tal-ħasil jew dryer.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.