Mur 'il quddiem biex taċċessa r-riżultati suġġeriti
    Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

    Ikseb iktar reviews ta' 5 stilel

    Dawn id-disinjaturi ta' ġewwa u Superhosts jaqsmu kif joħolqu postijiet speċjali għall-klijenti tagħhom.
    Minn Airbnb f'did-data: 26 ta’ Mej, 2021
    Qari ta' 9 minuti
    Aġġornat f'did-data: 26 ta’ Mej, 2021

    Punti ewlenin

    • Għarraf lill-klijenti dwar x'għandhom jistennew qabel jibbukkjaw

    • Wieġeb lill-klijenti malajr u b'mod ċar

    • Żomm l-ispazju tiegħek nadif, komdu u mingħajr imbarazz.

    • Fejn tista', żid elementi lokali bħal biċċiet tal-arti u prodotti għall-kamra tal-banju

    • Agħti lill-klijenti tiegħek l-esperjenza li tixtieq li jkollok kieku tkun qed toqgħod fl-ispazju

    • Skopri iktar fil-gwida kompluta tagħna dwar kif ittejjeb il-livell tan-negozju tal-ospitalità tiegħek

    Catherine u Bryan Williamson, is-Superhosts, l-imprendituri u d-disinjaturi ta' ġewwa ta' Beginning in the Middle bnew in-negozju tagħhom billi joffru lill-klijenti żjarat ta' 5 stilel. Wara li laqgħu iktar minn 2,000 klijent, issa jixtiequ jaqsmu l-istorja u l-pariri tagħhom fuq kif tagħmel darek post li l-klijenti jibqgħu jgħożżuh.

    Catherine: "Aħna ma konniex qed nistennew li se niftħu n-negozji ta' Airbnb u tad-disinn tagħna—iktar qisha x-xorti daħkitilna. Fl-2013 ħallejna l-Belt ta' New York warajna u ġejna ngħixu Columbus, Ohio—il-belt li fiha kien jgħix Bryan meta kien iżgħar. Dejjem xtaqna li jkollna iktar spazju u konna wkoll qed infittxu post fejn nistgħu ngħixu u nibnu xi ħaġa għalina."

    Bryan: "Xtrajna dar bi tlett ikmamar tas-sodda—u spiċċajna kellna nħallsu xi dejn li kien fadal. Imma qatt ma ridna li jkollna lil xi ħadd jgħix għal tul ta' żmien fl-istess dar magħna."

    Catherine: "Waħda minn sħabi kienet taf lil xi ħadd li tella' l-kamra tas-sodda żejda tiegħu fuq Airbnb u ssuġġeritilna nippruvaw nagħmlu hekk aħna wkoll. Dak iż-żmien ma konniex nafu x'inhi Airbnb. Bryan u jien ħsibna: 'Ok, jekk jirnexxielna niksbu 10 iljieli bbukkjati dis-sena vera nkunu kuntenti...'"

    Bryan: "Tellajna l-kamra u sibna li kien hemm interess kbir. Ma domniex wisq biex intellgħu d-dar kollha fuq Airbnb. Spiċċajna nduru u noqogħdu f'numru ta' motels madwar Columbus sakemm sibna motel li ma kinetx daqshekk ħażina. Wasalna f'punt fejn konna noqogħdu hemm għal ġimgħat sħaħ wara xulxin. Sirna nafu lill-ħaddiema kollha tal-lukanda. Imma ma kienx tip ta' ħajja sostenibbli."

    Għalina l-ospitalità hija xi ħaġa artistika u kreattiva.
    Bryan,
    Columbus, OH

    Catherine: "Ħallasna d-dejn kollu tagħna u spiċċajna biex xtrajna dar oħra. Fis-snin ta' wara, irranġajna u begħna numru ta' djar filwaqt li żammejna l-iktar djar li għoġbuna fuq Airbnb. Ħallejna x-xogħol li konna qed nagħmlu qabel u ħloqna kumpanija għad-disinn ta' ġewwa (Mix Design Collective), id-ditta għall-vaganzi tagħna (The Village Host) u waqqafna l-blogg tagħna (Beginning in the Middle)."

    Bryan: "Għalina importanti ferm li noħolqu esperjenza speċjali għal kull wieħed u waħda mill-klijenti tagħna. U dil-imħabba għall-ospitalità għenitna biex noħolqu stil ta' ħajja li verament inħobbu. Bħala Host, jekk tista' toffri żjara mill-aqwa, għandu jkollok reviews u rata tal-okkupanza tajbin ħafna—anke jekk m'għandekx l-isbaħ u l-aqwa dar fis-suq."

    1. Spjega lill-klijenti x'għandhom jistennew

    Catherine: "Wieħed mis-sigrieti ta' kif tikseb review ta' 5 stilel huwa li tgħarraf lill-klijenti dwar dak li għandhom jistennew qabel jagħfsu l-buttuna Ibbukkja. Id-djar tagħna huma qodma u ħdimna ħafna biex nibdluhom f'postijiet komdi u sbieħ li jilqgħuk. Imma mhux perfetti għalhekk nippruvaw nagħtu kemm jista' jkun informazzjoni minn qabel. Pereżempju l-art u l-bibien iżaqżqu."

    Bryan: "Il-kmamar tal-banju tagħna mhux kbar. Waħda mill-propjetajiet tagħna għandha ħajt maqsum mal-ġirien. Aħna nsemmu dawn l-affarijiet biex in-nies ikunu jafu li għandhom juru ftit rispett u ma jagħmlux storbju. MA NAĊĊETTAWX parties."

    Catherine: "Għandna banju bis-saqajn ftit qadim li huwa ftit ogħla minn banju tas-soltu—f'każ li l-klijenti jkollhom xi ħtiġijiet tal-aċċessibbiltà. Dad-differenzi jafu jagħtu fastidju lil xi klijenti. Oħrajn jafu ma jagħtux kas—imma aħna nippruvaw kemm jista' jkun nilħqu dawk il-klijenti li se japprezzaw id-dar u l-viċinat."

    2. Wieġeb fil-pront

    Bryan: "It-tweġibiet ċari u fil-pront huma parti kruċjali tal-esperjenza ta' 5 stilel. B'hekk il-klijenti jifhmu li bħala Host dejjem lest biex tgħinhom."

    Catherine: "In-nies qed joqogħdu għandek għal ftit żmien biss—u normalment ibbukkjaw għal raġuni importanti—għalhekk ma tistax tħalli lil xi ħadd jistenna nofs iż-żjara tiegħu għal tweġiba jew biex issewwi xi problema. Jien waħda minn dawk li nwieġeb f'ħames minuti imma jekk int xi ħadd li ma taħsibx li tista' twieġeb f'ħin raġjonevoli, nissuġġerilek titlob l-għajnuna ta' co-Host biex jgħinek twieġeb l-emails u l-messaġġi. Aħna nagħmlu li nistgħu biex nuruhom li lesti biex ngħinuhom u li jimpurtana minnhom. U xi kultant dan ifisser li titlaq li qed tagħmel minn idejk biex tiżgura li l-esperjenza tal-klijenti tkun waħda ta' 5 stilel."

    Sir af iktar dwar kif taħdem ma' co-Host

    3. Għinhom iħossuhom id-dar

    Catherine: "Għal dak li għandu x'jaqsam mal-mod kif tarma l-ispazju tiegħek, l-iktar ħaġa importanti hi li l-klijenti jħossuhom qishom qegħdin id-dar waqt li jkunu fih. Agħmel ħiltek kollha biex tarma l-post b'għamara li tinħass unika biex il-post jinħass bħala wieħed ħaj."

    Bryan: "B'daqshekk ma jfissirx li trid tixtri kċina ġdida bl-uċuħ tal-irħam jew tixtri l-aqwa u l-aħjar ħaġa li tista' ssib għall-kċina tiegħek. Naħseb li l-iktar ħaġa importanti hi li tkun nadifa, komda u mingħajr imbarazz."

    Catherine: "Għandhom iħossu li l-post ġie mħejji apposta għalihom. Ara li tneħħi r-ritratti l-personali, it-tifkiriet tal-familja u kull ħaġa oħra li tista' twassal biex il-klijenti jħossuhom li jinsabu fid-dar ta' ħaddieħor."

    Bryan: "Waħda mill-iktar affarijiet li importanti tinvesti fihom hija sodda sabiħa. Anke f'dal-każ, is-saqqu m'għandux ikun wieħed li jqum ħafna flus. Kemm tqiegħed topper fuqu u toffri żewġ tipi ta' mħaded (imħaded tar-rix u mħaded mimlija b'xi ħaġa oħra)."

    Catherine: "Għal-lożor, normalment nużaw lożor magħmula minn 300 ħajta kull pulzier—l-istess tip ta' lożor użati mil-lukandi. Huma tip ta' lożor li jagħtu sensazzjoni sabiħa meta jmissu mal-ġilda—u importanti għax fl-aħħar mill-aħħar in-nies qed jibbukkjaw il-post tiegħek biex jorqdu fih. U kif nafu—mill-esperjenza tagħna bħala ġenituri—m'hemm xejn aqwa minn raqda tajba."

    4. Offri togħma lokali

    Catherine: "Meta n-nies jiġu joqogħdu għandek, importanti żżomm f'moħħok li m'intix qed taqsam biss darek imma qed taqsam ukoll l-esperjenza tal-belt tiegħek. Aħna nippruvaw nagħmluha kemm jista' jkun esperjenza personali. In-negozji ż-żgħar huma l-qofol tal-belt ta' Columbus u għalhekk għalina hija avventura li ninvolvu lil kulħadd."

    Bryan: "Kultant nagħtu lill-klijenti tagħna togħma tal-prodotti lokali li jogħġbuna: gift cards tal-ħwienet tal-kafè tal-post biex inħeġġuhom jiskopru l-viċinat. Ġewwa d-dar tagħna jsibu wkoll shampoo, conditioner u sapun tal-wiċċ li kollha ġejjin minn kumpanija tal-post jisimha Cliff Original. Noffru sapun tal-idejn naturali tad-ditta Glenn Avenue. Għandek is-serje tal-kotba The Columbus Book Project, sett miġbur minn imprenditur lokali li jiffoka fuq l-artisti tal-post. Għalkemm Columbus mhix waħda mill-iktar bliet imfittxija, hija post mill-aqwa kemm biex tgħix u tikber fiha kif ukoll biex iżżurha—għandha ħafna x'toffri."

    Catherine: "Aħna nieħdu gost nuru l-Columbus li nafu aħna—u meta n-nies jgħidulna 'Kemm nixtieq niġi ngħix ġewwa Columbus' hija xi ħaġa li tagħtina ħafna sodisfazzjon."

    Bryan: "Idea oħra li qed naħsbu biex naħdmu fuqha ġewwa Columbus hija li nużaw djarna bħala galleriji tal-arti jew bħala ċentri tal-komunità u fihom nuru x-xogħlijiet ta' artisti lokali li kieku mhux għalina, xogħolhom diffiċli li jintwera xi mkien ieħor. Nixtiequ li kull dar ikollha biċċtejn arti għall-wiri u li dal-biċċiet tal-arti jimxu minn dar għall-oħra kull ftit xhur. Importanti li tkun kreattiv u taħseb dwar kif darek tista' tkun mera tal-post fejn tinsab."

    5. Ħejji ruħek biex tilqa' għall-problemi

    Bryan: "Tagħmel x'tagħmel biex toffri lill-klijenti tiegħek esperjenza ta' 5 stilel, żomm f'moħħok li xi emerġenza dejjem tista' tinqala' u huwa d-dmir tiegħek li ssolvi dawn l-emerġenzi—kemm jekk tkun l-arja kkundizzjonata li ma taħdimx kif ukoll jekk ikunu klijenti ddiżappuntati. Waħda mill-agħar sitwazzjonijiet li ltqajna magħhom kienet meta nfaqa' wieħed mill-pajpijiet tal-ilma ewlenin. Id-dar imtliet ilma waqt żjara tal-klijenti. Ċemplu fuq li ċemplu..."

    Catherine: "… Imma l-mowbajl tiegħi kien bla batterija."

    Bryan: "… U kien il-lejl tat-tieġ tagħhom."

    Catherine: "Kienet sitwazzjoni ħażina ħafna. Kienet esperjenza li tgħallimna ħafna minnha. Meta jiġru dal-affarijiet, skuża ruħek u aħseb fl-aħjar ħaġa li tista' tagħmel biex tpatti għal dis-sitwazzjoni—bħal pereżempju li tagħti lill-klijenti flushom lura jew ittihom rigal bħal ftit gallettini, flixkun inbid jew vawċer għall-ikel. Jekk il-klijenti vera kellhom esperjenza kerha, intuhom flushom kollha lura—imma rari tiġri esperjenza hekk."

    Bryan: "Ir-regola tagħna hi li nagħtu lill-klijenti tagħna l-esperjenza li nkunu nixtiequ jkollna kieku nkunu qed noqogħdu aħna stess fil-post tagħna. Għalina l-ospitalità hija xi ħaġa artistika u kreattiva. Aħna nagħmlu l-almu tagħna biex nagħtu ħajja ġdida lil dal-ispazji mbagħad intellgħuhom fuq Airbnb biex id-dinja kollha tkun tista' ssibhom. Nieħdu gost ħafna meta l-klijenti japprezzaw il-ħidma tagħna."

    Catherine: "Kull review ta' 5 stilel li niksbu, għalina hi ta' sodisfazzjon kbir. Meta nkunu qed nirranġaw post, it-tama dejjem tkun li xi ħadd se japprezza l-isforzi li qed nagħmlu fil-ħidma tagħna. U naħseb li jekk wieħed iħares biss lejn il-propjetà bħala numri, allura ma joqgħodx jagħti kas ta' dad-dettalji żejda."

    Bryan: "Li tilqa' n-nies mhux faċli. Jieħu ħafna xogħol."

    Catherine: "Imma kienet ħajja ta' sodisfazzjon li wasslitna nibdlu t-triq. Għenitna nibdew naħdmu fuq id-disinn ta' ġewwa, xi ħaġa li nħobbu nagħmlu, kif ukoll niskopru l-imħabba tagħna għall-ospitalità. Dis-sitwazzjoni tatna l-imbuttatura li konna neħtieġu biex nibdew u nkomplu nkabbru n-negozju tagħna. Naħseb li kieku ma kienx għal Airbnb, konna nsibuha iktar bi tqila li mmexxu u nkabbru n-negozju żgħir tagħna. Għenitna nifhmu fuq xiex ridna niffukaw, ċioè li nirranġaw l-ispazji biex ħaddieħor ikun jista' jgawdihom."

    Bryan: "Irnexxielna noħorġu l-imprenditur u l-artist ta' ġewwa fina. M'hemm xejn isbaħ milli tagħmel dak li tħobb—u tagħmel dak li tħobb għalik innifsek."

    Catherine: "Nisperaw li dal-pariri jgħinuk tikseb iktar reviews ta' 5 stilel."

    Il-hosting it-tajjeb!
    Catherine, Bryan + Bianca

    Punti ewlenin

    • Għarraf lill-klijenti dwar x'għandhom jistennew qabel jibbukkjaw

    • Wieġeb lill-klijenti malajr u b'mod ċar

    • Żomm l-ispazju tiegħek nadif, komdu u mingħajr imbarazz.

    • Fejn tista', żid elementi lokali bħal biċċiet tal-arti u prodotti għall-kamra tal-banju

    • Agħti lill-klijenti tiegħek l-esperjenza li tixtieq li jkollok kieku tkun qed toqgħod fl-ispazju

    • Skopri iktar fil-gwida kompluta tagħna dwar kif ittejjeb il-livell tan-negozju tal-ospitalità tiegħek
    Airbnb
    26 ta’ Mej, 2021
    Dan kien ta' għajnuna għalik?