Kif tieħu r-ritratti tal-faċilitajiet tal-aċċessibbiltà

Qabel jibbukkjaw, il-klijenti jixtiequ jkunu jafu li se jkunu siguri u komdi huma u jduru mad-dar. Meta taqsam ritratti ċari u dettalji tal-faċilitajiet tal-aċċessibbiltà, tkun qed tgħin lill-klijenti jifhmu jekk il-post tiegħek hux addattat għalihom.

"B'ritratt wieħed biss nista' nifhem jekk post hux addattat għalija jew le," jgħid George, klijent li juża s-siġġu tar-roti. "Kultant nistaqsi lill-hosts jekk jistgħux imexxu ħaġa bħal, ngħidu aħna, mejda. Imbagħad ikun tajjeb għalija."

Qabel il-faċilitajiet tal-aċċessibbiltà u r-ritratti jintwerew fit-taqsima tal-Faċilitajiet tal-aċċessibbiltà ta' listing (li mhix l-istess bħall-album tar-ritratti tal-listing jew id-dawra mad-dar bir-ritratti), Airbnb tirrevedihom kollha.

Biex iżżid il-faċilitajiet tal-aċċessibbiltà mal-listing tiegħek, imxi ma' dal-linji gwida. Jekk ritratt ma jkunx kif neħtiġuh li jkun, nafu nitolbuk ittella' ieħor minfloku jew tneħħi l-faċilità tal-aċċessibbiltà mil-listing tiegħek.

• Tella' mill-inqas ritratt ta' kull faċilità tal-aċċessibbiltà fil-post fejn toqgħod tiegħek.
• Qiegħed rutella fir-ritratti biex turi l-kejl bħall-wisgħa tal-fetħa ta' bieb u l-għoli tal-bank tal-kċina.
• Tella' għadd ta' ritratti ta' kull faċilità minn irkejjen differenti biex tgħin lill-klijenti jifhmu kif inhuma mqassma l-kamra jew l-ispazju.
• Ikteb captions li jiddeskrivu x'qed jintwera fir-ritratt bħal, ngħidu aħna, id-dwal, biex tispjega sew il-faċilitajiet tal-aċċessibbiltà tal-kmamar u l-ispazji.
• Għarraf lill-klijenti jekk hemmx xi postijiet li ma jistgħux jintużaw. Ngħidu aħna, "Dil-unika kamra tal-banju fid-dar li għandha daħla mingħajr turġien, fetħa tal-bieb wiesgħa u vireg biex iżżomm magħhom".

Ipprova dal-pariri int u tieħu r-ritratti tal-faċilitajiet tal-aċċessibbiltà tal-post fejn toqgħod tiegħek.

Aċċess mingħajr turġien għal post fejn toqgħod

Uri li m'hemmx turġien jew għetiebi ogħla minn 5 ċentimetri (2 pulzieri) għad-daħla tal-post fejn toqgħod tiegħek jew matul il-mogħdija li tagħti għad-daħla. Qis il-bankini, il-kurituri, il-liftijiet u l-faċilitajiet l-oħra li l-klijenti għandhom jużaw biex jidħlu fil-post.

• Iftaħ kull bieb u xatba tul il-mogħdija li tagħti għad-daħla tal-post fejn toqgħod. Jekk id-dħul huwa mingħajr turġien għax hemm xi rampi li jistgħu jitneħħew jew rampi apposta għall-għetiebi, ara li tqiegħed dawn ir-rampi qabel tieħu r-ritratt.
• Ibda minn fejn il-klijenti mistennija jaslu jew jipparkjaw u ħu ritratt kull 3 metri (10 piedi) tul il-mogħdija li tagħti għad-daħla. Mejjel ħarira l-kamera lejn l-art biex turi l-wiċċ tal-mogħdija.
• Ħu ritratt ieħor tad-daħla minn barra. Ersaq mill-inqas 2.4 metri lura (8 piedi) biex tieħu ritratt tal-bieb miftuħ u turi l-mogħdija fuq iż-żewġ naħat tal-għatba.

Aċċess mingħajr turġien għal kamra

Uri liema kmamar m'għandhomx turġien, għetiebi u xkiel ieħor ogħla minn 5 ċentimetri (2 pulzieri). Ħu ritratti minn ġewwa u minn barra u ara li turi kull terrazzin, gallarija u veranda li hemm fil-post.

• Iftaħ il-bieb kollu biex tieħu ritratt mill-qrib tal-għatba. Mejjel ħarira l-kamera lejn l-art biex turi l-mogħdija fuq kull naħa tal-art.
• Ersaq mill-inqas metru u nofs lura (5 piedi) biex tieħu ritratt tad-daħla li tagħti għall-kamra minn barra.
• Agħmel l-istess ħaġa imma did-darba minn ġewwa l-kamra.
• Jekk il-kamra għandha iktar minn daħla waħda, ħu ritratt ta' kull waħda minnhom.
• Ħu iktar ritratti biex turi l-mogħdija li twassal għall-bieb ewlieni tal-kamra.

Daħliet wisgħin

Uri liema bibien fil-post fejn toqgħod tiegħek wisgħin mill-inqas 81 ċentimetru (32 pulzier). Meta l-klijenti jkunu jafu l-wisgħa eżatta tal-bieb ta' barra u l-postijiet l-oħra minn fejn tidħol, ikunu jistgħu jifhmu jekk l-ispazju hux addattat għas-siġġu tar-roti jew it-tagħmir l-ieħor li jużaw biex imorru minn post għall-ieħor.

• Iftaħ il-bieb kemm tista'. Uża rutella biex tkejjel il-qafas kollu tal-bieb. Ara li ż-żewġt itruf tar-rutella u n-numri ta' fuqha jkunu qed jintwerew sew.
• Ħu mill-inqas żewġ ritratti: wieħed tal-fetħa tal-bieb b'rutella min-naħa għall-oħra tal-qafas tal-bieb u ieħor li juri l-kejl mill-qrib biex ikun jista' jinqara aħjar.

"Jekk inkunu nafu l-wisgħa tal-fetħa tal-bieb, inkun nista' nifhem aħjar jekk is-siġġu tar-roti tiegħi jkunx jista' jgħaddi sew minnu," jgħid George.

Faċilitajiet fil-kamra tal-banju

Uri l-faċilitajiet li jistgħu jgħinu lill-klijenti jmorru minn post għall-ieħor fil-kamra tal-banju fosthom doċċa mingħajr turġien, il-vireg biex iżżomm magħhom qrib it-toilet u fid-doċċa u siġġu tal-banju jew tad-doċċa. Tella' ritratti li juru l-kamra tal-banju u d-doċċa kollha u ara li tieħu ritratti mill-qrib ta' kull faċilità tal-aċċessibbiltà li hemm fil-post tiegħek.

• Doċċa mingħajr turġien: Iftaħ il-purtiera jew il-bieb tad-doċċa. Mejjel ħarira l-kamera lejn l-art biex turi li m'hemmx għetiebi jew ilqugħ għall-ilma ogħla minn 2.5 ċentimetri (pulzier).
• Vireg biex iżżomm magħhom: Uri sew fejn jinsabu l-vireg biex iżżomm magħhom fid-doċċa u qrib it-toilet. Ħu ritratt għal kull waħda minnhom, anki jekk turihom flimkien fir-ritratti li juru l-kamra tal-banju kollha.
• Siġġu tad-doċċa jew tal-banju: Uri s-siġġu kollu fid-doċċa jew fil-banju, kemm jekk imwaħħal mal-ħajt kif ukoll jekk huwa biss imqiegħed f'postu.

Post tal-parkeġġ għan-nies b'diżabbiltà

Uri l-post tal-parkeġġ privat tal-listing tiegħek għal karozza waħda. Il-post għandu jkun wiesgħa mill-inqas 3.35 metri (11-il pied) jew post tal-parkeġġ pubbliku maħsub għan-nies b'diżabbiltà.

• Post għall-parkeġġ privat: Ħu r-ritratt mill-bogħod, b'karozza pparkjata ħdejn l-ispazju għall-klijenti biex dak li jkun ikun jista' jifhem kemm hu wiesgħa jew uża rutella biex turi l-kejl tal-wisgħa tal-post.
• Post għall-parkeġġ pubbliku: Uri t-tabelli u l-marki tat-triq li juru li l-post miżmum għan-nies b'diżabbiltà.

Mogħdija mdawla li tagħti għad-daħla li jużaw il-klijenti

Uri li l-mogħdija jew il-bankina li jagħtu għad-daħla tal-klijenti għandha jkollha biżżejjed dawl wara li jidlam.

• Ixgħel id-dawl ta' barra kollu biex iddawwal il-mogħdija.
• Itfi kull dawl ta' ġewwa li jtellef id-dawl ta' barra.
• Ara li r-ritratti tiegħek juru fejn jinsabu d-dwal ta' barra tul il-mogħdija.

Irfigħ

Uri kull tagħmir fil-post fejn toqgħod tiegħek, bil-mutur jew le, li maħsub apposta biex jgħin lill-klijenti jpoġġu jew joħorġu minn siġġu tar-roti, pixxina jew hot tub.

• Ħu ritratt tal-irfigħ b'kemm jista' jkun dettalji u uri anki jekk hux imwaħħal mas-saqaf jew hux iżomm wieqaf waħdu.
• Ħu ritratt mill-bogħod li juri sew kemm jinsab bogħod mis-sodda, mit-toilet, mill-pixxina jew mill-hot tub.
• Ħu ritratt taż-żona tal-madwar biex turi kemm hu kbir u kif għandu jitqiegħed biex tużah.

Sir af iktar dwar ir-rekwiżiti biex iżżid il-faċilitajiet tal-aċċessibbiltà ma' listing.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.