Mur 'il quddiem biex taċċessa r-riżultati suġġeriti
    Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

    Pariri fuq kif tilqa' lill-klijenti bi ħtiġijiet tal-aċċessibbiltà

    Ilqa' iktar klijenti billi ssemmi l-faċilitajiet tal-aċċessibbiltà tal-propjetà tiegħek.
    Minn Airbnb f'did-data: 7 ta’ Apr 2021
    Vidjow ta' 5 minuti
    Aġġornat f'did-data: 14 ta’ Ġun 2022

    Punti ewlenin

    • Il-klijenti ta' spiss ifittxu għall-faċilitajiet tal-aċċessibbiltà bħal daħliet mingħajr għetiebi

    • Meta żżid il-faċilitajiet tal-aċċessibbiltà tkun qed tgħin lil-listing tiegħek jintwera f'iktar riżultati tat-tiftix ta' Airbnb

    • Skopri liema faċilitajiet jagħmlu l-listing tiegħek aċċessibbli għall-klijenti b'mobbiltà limitata

    Ħafna klijenti ta' Airbnb għandhom ħtiġijiet ta' aċċessibbiltà uniċi u dawn jinkludu l-familji li qed jivvjaġġaw max-xjuħ, it-tfal fil-pushchairs u ħbieb jew membri tal-familja li jafu jkollhom mobbiltà limitata.

    Billi ħafna klijenti jiffiltraw ir-riżultati tat-tiftix tagħhom skont il-faċilitajiet tal-aċċessibbiltà, l-ispazju tiegħek jista' jintwera f'iktar riżultati tat-tiftix meta ssemmi eżatt x'joffri—b'hekk tkun qed iżżid iċ-ċans li tikseb booking.

    Dawn huma xi linji gwida biex ngħinuk toħloq spazju li l-klijenti bi ħtiġijiet tal-aċċessibbiltà jistgħu jibbukkjaw b'moħħhom mistrieħ.

    Żid il-faċilitajiet ta' aċċessibbiltà mal-listing tiegħek

    Meta turi dal-faċilitajiet tal-aċċessibbiltà fuq il-listing tiegħek tkun qed tgħin lil-listing tiegħek jispikka mal-klijenti:

    • Passaġġ mingħajr għetiebi li jagħti għad-daħla li jużaw il-klijenti
    • Daħla mingħajr għetiebi għall-klijenti
    • Daħliet mingħajr għetiebi għall-kmamar
    • Post tal-parkeġġ aċċessibbli
    • Art ċatta (mingħajr tlajja') li tagħti għall-ispazju
    • Dawl mal-mogħdijiet li jagħtu għad-daħla
    • Daħliet wisgħin biex tidħol fil-post u biex tasal għall-kmamar
    • Doċċa mingħajr għetiebi
    • Vireg biex iżżomm magħhom fid-doċċa u qrib it-toilet
    • Siġġu tad-doċċa jew tal-banju
    • Irfigħ imwaħħal mas-saqaf jew mobbli
    • Irfigħ għall-pixxina

    Sir af iktar dwar kif iżżid il-faċilitajiet tal-aċċessibbiltà mal-listing tiegħek

    Uża r-ritratti biex turi l-aċċessibbiltà tal-ispazju tiegħek

    "Bħala persuna li nħobb nivvjaġġa imma nbati b'distrofija muskolari tas-sinsla, naf eżatt kemm jaf ikun importanti ritratt meta niġi biex nifhem jekk dar tgħoddx għalija jew le," jgħid Srin Madipalli, konsulent ta' Airbnb fuq kwistjonijiet tal-aċċessibbiltà.

    Biex niżguraw li l-listings li jgħidu li joffru l-faċilitajiet tal-aċċessibbiltà huma verament addattati għall-klijenti bi ħtiġijiet partikolari, aħna nitolbu lill-Hosts jibagħtu r-ritratti ta' kull faċilità tal-aċċessibbiltà biex nikkonfermawha. Tista' ssemmi li mhux il-kmamar kollha għandhom il-faċilitajiet tal-aċċessibbiltà. Pereżempju tista' ssemmi li kamra tal-banju waħda biss għandha l-vireg biex iżżomm magħhom. Għall-politiki ta' Airbnb dwar il-faċilitajiet tal-aċċessibbiltà, agħti ħarsa lejn iċ-Ċentru tal-Għajnuna.

    B'xorti tajba m'hemmx għalfejn tkun fotografu professjonali biex turi l-faċilitajiet tal-aċċessibbiltà tal-listing tiegħek. Tista' tuża l-ismartphone tiegħek biex tiġbed ir-ritratti tad-doċċa mingħajr għetiebi, tar-rampi u tal-faċilitajiet l-oħra. Nissuġġerulek tieħu r-ritratti minn irkejjen differenti biex tgħin lill-klijenti jifhmu jekk l-ispazju tiegħek jgħoddx għalihom jew le. Jekk pereżmpju toffri spazju għall-parkeġġ aċċessibbli, nissuġġerulek tieħu ritratti li juru b'mod ċar il-post ta' fejn jinsab fil-propjetà tiegħek.

    Qabel tiżdied mal-listing tiegħek, kull faċilità tal-aċċessibbiltà tiġi riveduta biex niżguraw li r-ritratti tagħha huma skont il-linji gwida għar-ritratti ta' Airbnb. Jekk ir-ritratti tiegħek ma jurux dil-faċilità kif mitlub mil-linji gwida tagħna, nistgħu nitolbuk ittella' ritratti ġodda jew biex tneħħi l-faċilità mil-listing tiegħek.

    Din hija gwida li tista' tgħinek tifhem kif tieħu r-ritratti tal-faċilitajiet tal-aċċessibbiltà.

    Kun onest u ġenwin mal-klijenti tiegħek

    Meta tistaqsi lill-klijenti li jixtiequ jibbukkjaw miegħek xi ftit mistoqsijiet qabel jibbukkjaw, tkun qed tgħin biex it-tnejn li intom tifhmu jekk il-post tiegħek jgħoddx għalihom jew le.

    Tista' pereżempju tistaqsihom, "Għandek xi mistoqsijiet partikolari dwar l-ispazju?" jew "Hemm xi ħaġa li nista' nagħmel biex iż-żjara tiegħek tkun iktar komda?"

    Ftit mistoqsijiet jistgħu jagħmlu differenza kbira biex il-klijenti jserrħu moħħhom u jħossuhom komdi jibbukkjaw l-ispazju tiegħek.

    Fassal l-ispazju tiegħek bil-ħsieb

    Qabel jasal klijent bi ħtiġijiet tal-aċċessibbiltà, aħseb ftit dwar l-aħħar ftit bidliet żgħar li tista' tagħmel fl-ispazju tiegħek biex tkunlu eħfef li jmur minn post għal ieħor. Hawn għandek xi ftit ideat:

    • Ċaqlaq l-għamara bħalma huma s-siġġijiet, l-imwejjed u t-tavolini biex toħloq mogħdija usa' fil-postijiet li se juża l-klijent
    • Neħħi kemm jista' jkun xkiel għas-sockets tal-elettriku
    • Qiegħed l-affarijiet tad-dar, bħal pereżempju l-platti u x-xumani, f'postijiet li jistgħu jintlaħqu aħjar

    Sir af kif tagħmel l-ispazju tiegħek iktar aċċessibbli

    Oħloq gwida tal-ivvjaġġar inklussiva u interessanti

    Gwida tal-ivvjaġġar hija l-opportunità tiegħek biex mhux biss turi l-livell tal-ospitalità tiegħek imma wkoll biex taqsam mal-klijenti l-pariri tiegħek fuq kif jistgħu jiskopru l-belt. Int u żżid is-suġġerimenti tiegħek għall-postijiet fejn jistgħu jieklu, għall-postijiet li jistgħu jżuru u għall-affarijiet li jistgħu jagħmlu fuq barra, ipprova idħol f'moħħ il-vjaġġatur bi ħtiġijiet tal-aċċessibbiltà.

    Pereżempju nissuġġerulek li ssemmi jekk ristorant għandux rampa jew le, li ssemmi xi mogħdijiet għall-mixi li għandhom kisja tal-art lixxa u li tgħarraf lill-klijenti b'dawk il-mużewijiet li għandhom biżżejjed spazju għall-parkeġġ qrib id-daħla.

    Meta tagħti dal-pariri, filwaqt li tkun qed tagħmel l-ispazju tiegħek iktar interessanti għal numru ikbar ta' klijenti, tkun qed tgħin biex nibnu dinja fejn kulħadd jista' jħossu milqugħ.

    L-informazzjoni li tinsab f'dal-artiklu jaf laħqet inbidlet minn meta ġie ppubblikat.

    Punti ewlenin

    • Il-klijenti ta' spiss ifittxu għall-faċilitajiet tal-aċċessibbiltà bħal daħliet mingħajr għetiebi

    • Meta żżid il-faċilitajiet tal-aċċessibbiltà tkun qed tgħin lil-listing tiegħek jintwera f'iktar riżultati tat-tiftix ta' Airbnb

    • Skopri liema faċilitajiet jagħmlu l-listing tiegħek aċċessibbli għall-klijenti b'mobbiltà limitata

    Airbnb
    7 ta’ Apr 2021
    Dan kien ta' għajnuna għalik?