X'inhuma l-Klabbs tal-Hosts ta' Airbnb?

Skont id-dejta li għandha Airbnb, il-Hosts imsieħba fi Klabb tal-Hosts jagħmlu kisbiet ikbar minn dawk li mhux imsieħba. Il-Hosts il-ġodda li jinkitbu ma' klabb għandhom ċans 86% ikbar li jiksbu tliet bookings meta mqabbla ma' dawk mhux imsieħba mal-klabb. Il-membri jiksbu wkoll dħul ikbar, punteġġi aħjar mir-reviews u nnutajna li għandhom ċans ikbar li jsiru Superhosts.

Host minnhom qalilna: "Nieħu gost li jkolli grupp ta' Hosts li jilqgħu n-nies fl-istess żona biex naqsmu r-riżorsi u l-ideat tagħna flimkien. Il-klabb jgħin ukoll biex il-Hosts jifhmu l-bidliet fir-regoli ta' kif tilqa' n-nies fil-kontea."

Il-Klabbs tal-Hosts huma komunitajiet magħmula minn Hosts b'listings f'żona partikolari li jiltaqgħu fuq l-internet u wiċċ imb wiċċ biex jistaqsu l-mistoqsijiet tagħhom, jaqsmu l-pariri, jifirħu lil xulxin għall-kisbiet li jagħmlu u jitħaddtu dwar l-esperjenzi tagħhom huma u jilqgħu n-nies.

Il-gruppi huma mmexxija minn Hosts voluntiera msejħa Mexxejja tal-Komunità u xogħolhom hu li jibdew id-diskussjonijiet u jorganizzaw laqgħat u opportunitajiet għal min jixtieq jagħti ftit minn ħinu għall-komunità. Il-Mexxejja tal-Komunità jaħdmu wkoll ma' Airbnb biex jaqsmu l-aħħar aħbarijiet u għarfien biex il-membri tal-klabb dejjem jistgħu jkunu jafu x'qed jiġri.

Il-klabbs huma gruppi privati fuq Facebook għalhekk jeħtieġ li jkollok kont ma' Facebook biex tkun parti minn dat-taħditiet. Il-klabbs jorganizzaw ukoll laqgħat miftuħa għall-Hosts kollha. Xi komunitajiet jorganizzaw il-laqgħat tagħhom wiċċ imb wiċċ filwaqt li oħrajn jorganizzaw kollox fuq l-internet.

Barra dan kollu, il-Klabbs tal-Hosts huma gruppi fejn il-membri jgħinu lil xulxin—post fejn tista' titlob parir jew tgħid kelma ma' Hosts oħra bħalek.

Kulma teħtieġ biex tingħaqad ma' Klabb tal-Hosts huwa kont bħala Host fuq Airbnb u kont ma' Facebook. Għandna iktar minn 600 klabb imxerrda madwar 90 pajjiż tad-dinja—għalhekk hemm ċans kbir li ssib wieħed fil-qrib. Jekk tgħix f'żona fejn għad m'hemmx klabb, tista' tiftaħ Klabb tal-Hosts int stess.

Wara li tkun sibt il-klabb tal-post fejn jinsab il-listing tiegħek, ħafif ħafna li tinkiteb:

1. Iftaħ il-grupp ta' Facebook li turik il-mappa u ibgħat talba biex tinkiteb.

2. Wieġeb il-mistoqsijiet għas-sħubija biex tgħinna nikkonfermaw il-kont tiegħek bħala Host.

3. Wara li napprovaw it-talba tiegħek, tista' tqis ruħek membru tal-klabb.

Forsi l-ikbar vantaġġ li tingħaqad ma' klabb huwa l-opportunità li tidħol fuq l-internet u ssib Hosts oħra x'jaħsbu war il-listing tiegħek jew li tistaqsihom il-mistoqsijiet tiegħek dwar kif tilqa' n-nies—kemm mistoqsijiet dwar il-liġijiet tal-post jew titlobhom jissuġġerulek l-aqwa servizz tat-tindif.

Grazzi għal-laqgħat li jorganizza l-klabb, se tkun tista' wkoll tiltaqa' ma' Hosts oħra fiż-żona tiegħek u tibni ħbiberiji u kuntatti professjonali li tista' toqgħod fuqhom f'każ li tkun teħtieġ xi pjaċir jew tinqalalek problema.

Fi ħdan il-Klabbs, il-membri ħadmu man-negozji tal-post, ħolqu programmi ta' sostenibbiltà, iġġieldu għal regoli għall-kiri għal żmien qasir u għamlu xogħol volontarju. Il-laqgħat ħafna drabi jwasslu għal opportunitajiet speċjali jew għal titjib għall-komunitajiet tal-post. Żewġ eżempji:

• Il-Klabb tal-Hosts ta' Ġirona, Spanja, stieden disinjatur ta' ġewwa magħruf biex il-membri jkunu jistgħu jistaqsuh mistoqsijiet dwar kif jistgħu jtejbu l-ispazji tagħhom.

• Grupp ta' Mexxejja tal-Komunità ġewwa Panama organizzaw tindifa tal-bajja għall-Klabb tal-Hosts tagħhom.

Tista' tikkummenta dak li jinkiteb fuq Facebook biex tagħti l-għajnuna tiegħek. Eżempji mill-Klabb tal-Hosts ta' Catskills u Hudson Valley, New York:

• Mexxej tal-Komunità jistaqsi kif sejjer l-istaġun tal-membri l-oħra u jissuġġerixxi biex bħala grupp jaqsmu xi ideat flimkien biex itejbu l-affarijiet.

• Host jistaqsi kif jista' jevita l-bookings doppji.

• Host jistaqsi għal suġġerimenti dwar xi nies tal-post li jistgħu jibnu sauna u li joffru servizz ta' tneħħija tal-borra.

• Host jistaqsi jekk hemmx xi ħadd li jista' jilqa' grupp ta' 10 klijenti għal ġimgħa.

L-informazzjoni f'dal-artiklu jaf laħqet inbidlet minn meta ġie ppubblikat.