Kif tuża r-reviews biex ittejjeb il-proċess ta' kif tilqa' n-nies

Ir-reviews it-tajba juruk dak li l-klijenti jħobbu fil-post tiegħek. Anki jekk forsi ma tantx huma sbieħ, ir-reviews negattivi jgħinuk issir Host aħjar. Tista' tuża r-reviews kollha li tikseb, mill-ewwel waħda 'l quddiem, biex ittejjeb il-mod ta' kif tilqa' n-nies.

"Il-kummenti tal-klijenti importanti ħafna," tgħid Juliette, membru tal-Bord Konsultattiv tal-Hosts ġewwa Nairobi, il-Kenja. "Dan negozju mimli sorpriżi li ma tistax titilqu minn idejk. Għalhekk importanti li meta tkun tista', tiċċekkja l-listing tiegħek. Ir-reviews li jiktbulek il-klijenti jistgħu jgħinuk ħafna."

Ir-reviews jibnu l-fiduċja fil-komunità u jgħinu n-negozju tiegħek jikber. Biex titgħallem mir-reviews li tikseb:

• Aqra kull review u l-kummenti privati li jiktbulek il-klijenti.

• Uża r-reviews tajbin biex ittejjeb il-listing tiegħek. Jekk ikollok klijent li jfaħħar il-kċina, tella' ritratt tagħha. Tista' wkoll tirreferi għar-review fil-caption tar-ritratt.

• Uża r-reviews, il-kummenti privati u l-messaġġi inqas pożittivi biex tifhem x'tista' tibdel fil-kumditajiet li toffri jew fid-deskrizzjoni tal-listing tiegħek. Nissuġġerulek twieġeb pubblikament biex turi li lest/a tisma' l-kummenti u l-ħsibijiet tal-klijenti.

L-aqwa Hosts ma jesaġerawx huma u jiktbu d-dettalji tal-listing tagħhom u joffru xi ħaġa iktar milli jwiegħdu. "Dejjem nipprova nwiegħed inqas milli nista' noffri u nagħti iktar minn dak li jistennew minni l-klijenti u b'hekk il-klijenti ma jagħtux tant kas jekk tinqala' xi problema żgħira," jgħid Max, Superhost ġewwa Bongaree, l-Awstralja.

Eżempju ta' kif tista' tuża l-kummenti tal-klijenti b'dal-mod:

• Jekk f'review xi klijent isemmi l-istorbju tat-triq, fid-deskrizzjoni tal-listing tiegħek semmi li jaf ikun hemm xi storbju ġej mit-triq (biex il-klijenti jħejju ruħhom għal ftit storbju).
• Min-naħa tiegħek, fil-post tista' tħalli magna li tagħmel il-ħsejjes rilassanti jew ftit earplugs għall-klijenti (biex tagħtihom sorpriża sabiħa).

Jekk tavżahom minn qabel dwar il-problemi li jafu jħabbtu wiċċhom magħhom, għandek ċans ikbar li tevita reviews ħżiena u wisq probabbli l-klijenti li jibbukkjaw il-post tiegħek ikunu dawk li ma jagħtux kas dawk il-problemi.

"Ħafna nies kitbulna biex jgħidulna li kellhom esperjenza mill-isbaħ imma xtaqu jaqsmu magħna ftit suġġerimenti ta' kif stajna nilqgħuhom aħjar u kif stajna ngħinuhom ikunu iktar komdi," jgħid Keshav, membru tal-Bord Konsultattiv tal-Hosts ġewwa New Delhi, l-Indja. "Ħadna l-kummenti u l-ħsibijiet tagħhom bis-serjetà. Tgħallimt l-iktar jien u nitkellem mal-klijenti."

Ikkomunika mal-klijenti wara li jidħlu fil-post biex tgħidilhom li jistgħu jikkuntattjawk jekk ikollhom xi problemi jew mistoqsijiet. Ftit pariri:

• Uża l-messaġġi skedati tagħna biex tikkomunika mal-klijenti f'mumenti importanti partikolari, bħal wara l-booking, wara ċ-checkin u wara ċ-checkout.

• Wara l-ewwel lejl staqsi lill-klijenti kif sejra ż-żjara tagħhom u jekk hemmx xi ħaġa li tista' tagħmel tgħinhom. F'każ ta' żjarat itwal, agħmel hekk madwar darba fil-ġimgħa.

• Jekk il-klijenti jgħidulek li hemm xi problema, sewwiha mill-ewwel. Il-biċċa l-kbira tal-klijenti jifhmu li jistgħu jinqalgħu l-problemi, l-importanti li tipprova ssewwihom malajr.

"Dejjem inqatta' ftit ħin biex inwieġeb kull review li jiktbuli—kemm dawk tajbin kif ukoll dawk ħżiena," jgħidilna Omar, Superhost ġewwa l-Belt tal-Messiku. "Il-klijenti li jkunu qed jaħsbuha jibbukkjawx miegħek jaqraw it-tweġibiet tiegħek."

Omar żied jgħidilna li kumment mingħand klijent dwar it-temperatura tal-ilma għenu biex isir jaf u jsewwi l-problema. L-istess klijent reġa' bbukkja miegħu tmien xhur wara. "Dejjem għandek iżżomm f'moħħok kull review kostruttiva," jgħidilna.

Jekk taqra r-reviews bir-reqqa, tista' ssir Host aħjar. Alessandro, Host ġewwa l-Lombardija, l-Italja jgħidilna, "Dejjem tista' tikseb review ħażina, imma b'daqshekk ma jfissirx li taqa' d-dinja". "Ifhem għaliex tkun inkitbet dik ir-review u agħmel l-almu tiegħek biex jekk ikun meħtieġ, tibdel l-affarijiet."

L-informazzjoni f'dal-artiklu jaf laħqet inbidlet minn meta ġie ppubblikat.