Kif toħloq l-istrateġija tal-prezz tal-listing tiegħek

Li tibdel il-prezz tal-listing tiegħek ta' sikwit tgħinek tibqa' titlob prezz kompetittiv. Qis dal-pariri li ġejjin int u toħloq l-istrateġija tal-prezz tal-listing tiegħek.

Qis kemm tixtieq tiċċekkja u tibdel il-prezz tal-listing tiegħek ta' sikwit. Dan huma xi ħwejjeġ li tista' tagħmel meta tixtieq.

• Iftaħ iktar iljieli: Iftaħ l-iljieli fil-kalendarju tal-listing tiegħek li matulhom taf li se tkun tista' tilqa' n-nies. B'hekk il-listing tiegħek ikun jista' jintwera f'iktar riżultati tat-tiftix u tkun tista' żżid id-dħul tiegħek.
• Ippersonalizza t-tul tal-vjaġġi: Qis id-dati battala bejn il-bookings. Ħadd mhu se jkun jista' jibbukkja dal-iljieli jekk l-għadd ta' ljieli battala bejn booking u ieħor huma iqsar mill-inqas għadd ta' ljieli meħtieġa għall-bookings. Nissuġġerulek tqassar l-għadd ta' ljieli meħtieġa bejn booking u ieħor għal dawk id-dati biex in-nies ikunu jistgħu jibbukkjawhom.
• Iċċekkja l-listings li jixbhu lil tiegħek: Iċċekkja l-prezzijiet tal-postijiet fejn toqgħod ibbukkjati u mhux ibbukkjati fiż-żona tiegħek biex tkun tista' titlob prezz kompetittiv.

"Inħobb niċċekkja l-listings li jixbhu lil-listing tiegħi biex inqabbel il-prezzijiet, nifhem jekk hux qed nitlob prezz għali jew irħis wisq u nifhem l-aħjar prezz li għandi nitlob," tgħid Karen, Superhost ġewwa Nelson, il-Kanada.

Tista' wkoll, meta tixtieq, tixgħel il-Prezzijiet Intelliġenti biex tibdel il-prezzijiet tal-listing tiegħek awtomatikament skont id-domanda tal-post. Dil-għodda hija siewja ħafna jekk tixtieq ittejjeb il-prezzijiet tal-listing mingħajr ma jkollok għalfejn iżżomm għajnejk fuqhom il-ħin kollu.

Anki l-iktar listings imfittxija kultant jafu jkollhom xi żminijiet fejn ma jkollhomx bookings. Dawn huma xi ftit ideat biex tgħin lil-listing tiegħek jispikka matul l-iktar żmien kwiet tas-sena.

• Agħti l-iskontijiet: Skontijiet għaż-żjarat ta' ġimgħa u għaż-żjarat ta' xahar jistgħu jgħinuk timla l-kalendarju tal-listing tiegħek u tnaqqas id-drabi li jkollok tħejji l-post mill-ġdid għall-klijenti l-ġodda. Skont tal-aħħar minuta jaf jolqot lill-klijenti li jkunu qed jibbukkjaw bejn jum u 28 jum qabel il-wasla.
• Qassar iż-żmien meħtieġ bejn il-booking u d-data taċ-checkin: Meta tħalli lill-klijenti jibbukkjaw eqreb lejn id-data taċ-checkin jaf tħajjar iktar nies jibbukkjaw. Agħżel li tħalli lill-klijenti jibbukkjaw anki għal dakinhar stess, skont kemm teħtieġ żmien biex tħejji l-post mill-booking sal-wasla.
• Ilqa' żjarat iqsar: Qassar l-inqas għadd ta' ljieli meħtieġa għal żjara biex il-klijenti li jkunu jixtiequ jibbukkjaw żjarat iqsar ikunu jistgħu jibbukkjaw miegħek. Tista' tippersonalizza l-inqas għadd ta' ljieli meħtieġa għal żjara skont il-jum tal-ġimgħa meta jibda l-booking.

"Qed ninnota li għadd dejjem ikbar ta' bookings qed ikunu għal żjarat iqsar," jgħid Jimmy, Superhost ġewwa Palm Springs, California. "Ikunu bookings tal-aħħar minuta ta' bla ħsieb u għalhekk ikunu bookings ta' jumejn biex dak li jkun jaħrab ftit mill-ħajja ta' kuljum. M'hemmx isbaħ mill-flessibbiltà."

Hemm għadd ta' għodod ta' Airbnb li jistgħu jgħinuk tieħu kemm tista' meta d-domanda tal-klijenti tkun ikbar. Dawn xi strateġiji li tista' tuża.

• Skont għal min jibbukkja kmieni: Biex tħajjar lill-klijenti li jaħsbu minn qabel jagħżlu l-post tiegħek, nissuġġerulek tagħti skont għal min jibbukkja kmieni għall-bookings li jsiru bejn xahar u 24 xahar qabel iċ-checkin. Għal skontijiet ta' mill-inqas 3%, il-klijenti jintwerew messaġġ speċjali fuq il-paġna tal-listing tiegħek u fir-riżultati tat-tiftix. Il-prezz imraħħas tal-listing tiegħek se jintwera ħdejn il-prezz mingħajr roħs (li se jintwera maqtugħ).
• Oħloq offerta personalizzata: Matul xi żminijiet tas-sena, l-offerti jaħdmu tajjeb ħafna biex tikseb iktar bookings. Meta tagħti skont ta' mill-inqas 15%, il-klijenti se jintwerew messaġġ speċjali dwaru fuq il-paġna tal-listing tiegħek u fir-riżultati tat-tiftix. Hemm xi kundizzjonijiet biex toħloq offerta, bħal li tkun ksibt mill-inqas booking wieħed matul l-aħħar sena.
• Iftaħ iktar dati fil-kalendarju tal-listing tiegħek: Tista' tiftaħ id-dati fil-kalendarju tal-listing tiegħek sa sentejn bil-quddiem. B'hekk il-listing tiegħek jintwera f'iktar riżultati tat-tiftix—u f'listi iqsar jekk ma tantx ikun fadal postijiet għad-dati li jkunu qed ifittxu l-klijenti.

"Ġieli jidħlu bookings anki sena bil-quddiem għall-btajjel tas-sena jew sitt xhur bil-quddiem għal żmien il-Milied," tgħid Anne, Superhost ġewwa Tarragona, Spanja. "Min jibbukkja bil-quddiem ħafna drabi ma jikkanċellax. Importanti wkoll għax b'hekk tkun taf minn qabel x'bookings għandek tistenna fix-xhur li ġejjin."

Il-prezzijiet li titlob u s-settings l-oħra tal-listing tiegħek dejjem se jkunu f'idek. Ir-riżultati li tikseb jafu jvarjaw.

Ħallasna lill-hosts għas-sehem tagħhom fl-istħarriġ.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.