Iktar kontroll mit-tab Listings
Messaġġ mingħand l-editur: Dal-artiklu ġie ppubblikat bħala parti mill-Aġġornament tas-Sajf tal-2024. L-informazzjoni jaf laħqet inbidlet minn meta ġie ppubblikat. Aqra dwar il-bidliet il-ġodda fis-servizz tagħna
Sibna li l-listings b'iktar dettalji jistgħu jiksbu sa 20% iktar bookings. Minn mindu nedejna t-tab Listings fl-2023, bqajna ntejbuha skont il-kummenti u l-ħsibijiet li bagħtulna l-Hosts.
Fl-Aġġornament tas-Sajf 2024 se nkunu qed inżidu l-iktar ħaġa li tlabtuna għad-dawra mad-dar bir-ritratti: li tkunu tistgħu tibdlu l-ordni tar-ritratti għall-kmamar. Dalwaqt se tkunu tistgħu wkoll tibdlu dawra mad-dar bir-ritratti bl-għajnuna tal-algoritmi tal-IA.
Dawn ħames modi ta' kif tista' tieħu ħsieb aħjar tal-listing tiegħek mit-tab Listings, bl-ewwel waħda fosthom tkun id-dawra mad-dar bir-ritratti l-ġdida.
1. Oħloq dawra mad-dar bir-ritratti
Għin lill-klijenti jifhmu kif inhu mqassam il-post tiegħek billi toħloq dawra mad-dar bir-ritratti. Tista' tuża l-algoritmi tal-IA biex tqassam ir-ritratti tal-listings fil-kmamar u l-ispazji awtomatikament u mbagħad tista' tibdel id-dawra mad-dar int stess.
Issa tista' tkaxkar ir-ritratti biex tibdlilhom l-ordni tagħhom fil-kamra. Dalwaqt, meta żżid mill-inqas 3 ritratti, se tkun tista' tibdel id-dawra mad-dar bir-ritratti minnufih. L-algoritmi tal-IA se jqiegħdu r-ritratti l-ġodda f'posthom mingħajr ma jibdlu l-bidliet li tkun għamilt.
2. Ibdel il-kumditajiet tiegħek
Ħafna drabi l-klijenti jiffiltraw ir-riżultati tat-tiftix ta' Airbnb biex isibu postijiet bil-faċilitajiet u l-kumditajiet li jixtiequ. Għin lil-listing tiegħek jispikka billi timmarka kull ħaġa li hemm fil-post tiegħek. It-tab Listings tagħmilhielek eħfef li żżid il-kumditajiet u żżommhom aġġornati.
Tista' ssib kważi 150 kumdità maqsuma skont il-kategorija jew imsarbta skont l-ewwel ittra tal-isem u tista' tagħżel li tfittixhom billi tikteb l-isem direttament—m'għandekx għalfejn toqgħod tiċċekkjahom waħda waħda. Meta nitolbuk tagħmel hekk, agħti ftit iktar dettalji bħal, ngħidu aħna, li l-post apposta fejn taħdem għandu printer u siġġu ergonomiku.
3. Ġedded id-deskrizzjoni tal-listing tiegħek
Il-klijenti jistennew li l-postijiet li jibbukkjaw fuq Airbnb ikunu jaqblu mad-deskrizzjoni tal-listing. Meta tagħtihom informazzjoni ċara u preċiża dwar il-post fejn toqgħod tiegħek u l-madwar, tkun qed tgħinhom jifhmu x'jistgħu jistennew li jsibu.
Iddeskrivi l-post u d-disinn tiegħu u l-istil ta' kif tilqa' n-nies. Nissuġġerulek tgħid lill-klijenti x'se jsibu fil-post tiegħek—dak li se jaraw, jisimgħu u jħossu
4. Lesti l-gwida tal-wasla
Il-klijenti għandhom ikunu jistgħu jsibu l-post tiegħek u jidħlu fih mingħajr xkiel. It-tab Listings tgħinek iżżid jew tibdel l-informazzjoni dwar il-wasla kollha minn post wieħed.
Tista' tieħu ħsieb il-metodu u l-ħin taċ-checkin, id-direzzjonijiet u l-pariri dwar il-parkeġġ, il-password tal-wifi, l-informazzjoni dwar id-dar, l-istruzzjonijiet taċ-checkout u iktar—u mbagħad tara x'se jintwera lill-klijenti. Il-klijenti jirċievu l-informazzjoni wara l-booking, qabel iċ-checkin u qabel iċ-checkout.
5. Żid serratura intelliġenti
Is-serratura intelliġenti hija serratura elettronika bil-wifi li tintuża biex il-klijenti jiftħu l-bieb b'kodiċi minflok b'ċavetta. Tista' tkun metodu tas-self checkin ħafif u li jaħdem tajjeb.
Tista' tqabbad serratura intelliġenti kompatibbli mal-listing tiegħek biex is-self checkins fil-post tiegħek jimxu iktar ħarir. Aħna se nibagħtu kodiċi tal-bieb uniku lill-klijenti għall-bookings il-ġodda u se tkun tista' tieħu ħsieb is-serratura tiegħek mill-app ta' Airbnb.
L-għodda disponibbli għall-Hosts li għandhom il-listings ġewwa l-Istati Uniti tal-Amerka u l-Kanada u li jużaw serraturi kompatibbli tad-ditti August, Schlage u Yale.