Kif tuża l-faċilitajiet kollha li tagħtik it-tab Messaġġi

It-tab Messaġġi hija l-inbox ta' Airbnb tiegħek. Fiha ssib il-messaġġi mingħand in-nies li qed tilqa', mingħand il-hosts u mingħand it-tim tal-għajnuna. Il-faċilitajiet fit-tab Messaġġi jgħinuk biex:

• Tiffiltra u tfittex il-messaġġi.
• Tibgħat u tiskeda l-mudelli miktuba minn qabel magħrufa bħala t-tweġibiet ta' malajr.
• Teditja u treġġa' lura l-messaġġi li tkun bgħatt.
• Tikkomunika ma' kull klijent f'booking minn konverżazzjoni waħda.
• Tifhem meta l-klijenti jkunu fetħu l-messaġġi li tkun bgħattilhom grazzi għall-irċevuti tal-qari.
• Taqsam il-gwida tal-ivvjaġġar tiegħek u tirrakkomanda Esperjenzi u Servizzi ta' Airbnb tal-post.
• Tehmeż ritratti u vidjows mal-messaġġi.

It-tab Messaġġi taqsam il-messaġġi f'kategoriji. Il-kategoriji ewlenin huma Postijiet fejn toqgħod, Esperjenzi, Servizzi, Vjaġġi, Għajnuna, u Messaġġi Diretti.

L-għażla standard, Kollox, turik biss il-kategoriji marbuta mal-kont ta' Airbnb tiegħek. Agħżel xi kategorija biex tiffiltra skont it-tip ta' messaġġ.

Għal Postijiet fejn toqgħod, tista' tuża dal-filtri li ġejjin:

• Mhux moqrija turik il-messaġġi mhux miftuħa biss.
• Stadju tal-vjaġġ tqassam il-messaġġi skont it-talbiet tal-bookings, il-bookings mistennija, il-bookings li tkun qed tilqa' dak il-ħin u l-bookings tal-imgħoddi.
• Listings turik il-messaġġi listing b'listing jekk għandek iktar minn listing wieħed.
• Stellati turik biss il-messaġġi li mmarkajt bi stilla.

Għal Esperjenzi u Servizzi, tuża wkoll dawn il-filtri li ġejjin:

• Mhux moqrija turik il-messaġġi mhux miftuħa biss.
• Stellati turik biss il-messaġġi li mmarkajt bi stilla.
• Messaġġi tal-grupp tqassam il-konverżazzjonijiet li fihom hemm iktar minn klijent wieħed skont il-booking.

Jekk għandek co-host jew int Ambaxxatur Superhost fit-tab Messaġġi se ssib dal-filtri wkoll:

• Co-host jurik il-konverżazzjonijiet bejnek u bejn il-co-hosts l-oħra ta' listing.
• Ambaxxatur Superhost jurik il-messaġġi bejnek u bejn il-hosts li laqqajniek magħhom.

Il-filtru Vjaġġi juri l-messaġġi li tibgħat u tirċievi meta l-vjaġġatur tkun int. Il-filtru Għajnuna juri l-konverżazzjonijiet mal-Għajnuna ta' Airbnb.

Qed tfittex xi konverżazzjoni partikolari? Tista' tfittex il-messaġġi b'isem, b'kelma jew frażi. Biex ngħinuk issib il-konverżazzjonijiet iktar malajr, ir-riżultati tat-tiftix iqisu l-filtri li tkun għażilt.

Tweġiba ta' malajr hija messaġġ qasir miktub minn qabel li tiġi ssejvjata bħala mudell fis-settings tal-messaġġi tiegħek.

L-ispazji riservati għad-dettalji, bħal isem il-klijent, jippersonalizzaw kull messaġġ billi jieħdu l-informazzjoni mil-listing jew mill-booking tiegħek.

It-tweġibiet ta' malajr jgħinuk twieġeb malajr u jiffrankawlek il-ħin. Oħloq it-tweġibiet ta' malajr tiegħek jew editja il-mudelli ta' Airbnb biex tibgħathom minnufih jew biex tiskedahom jintbagħtu iktar tard f'mumenti partikolari.

Sir af iktar dwar it-tweġibiet ta' malajr għall-hosts ta' postijiet fejn toqgħod, esperjenzi jew servizzi.

Niftħulek konverżazzjoni ġdida fit-tab Messaġġi għal kull booking. Il-klijent li jibbukkja jista' jistieden vjaġġaturi oħra biex jingħaqdu mal-booking. Il-klijenti li jaċċettaw l-istedina jiżdiedu mal-konverżazzjoni.

Jekk torganizza esperjenza, il-parteċipanti kollha li jibbukkjaw għall-istess data u ħin se jiżdiedu awtomatikament ma' konverżazzjoni waħda tal-grupp. Dawn il-parteċipanti jistgħu jistiednu lill-vjaġġaturi l-oħra tal-grupp biex jingħaqdu magħhom ukoll.

Il-hosts u l-co-hosts jistgħu jibagħtu l-messaġġi lill-grupp kollu. Il-klijenti se jkunu jistgħu jaqraw il-messaġġi kollha—anki jekk jingħaqdu wara li tkun inbdiet il-konverżazzjoni—biex ma jkollokx għalfejn toqgħod tirrepeti dak li diġà ktibt.

Għal iktar informazzjoni dwar il-booking u l-konverżazzjoni, fosthom għal-lista ta' kull persuna fil-grupp, agħfas fuq Dettalji. Agħżel ritratt tal-profil tal-klijent biex tiftaħ il-profil tiegħu u sir af iktar lill-persuna li tkun se tilqa'.

Il-faċilitajiet l-oħra tat-tab Messaġġi jgħinu lill-hosts u l-co-hosts jikkomunikaw mal-klijenti qabel, waqt u wara l-booking u jgħinuhom jikkomunikaw ma' xulxin ukoll.

• Katina ta' tweġibiet tħallik twieġeb messaġġ partikolari f'konverżazzjoni u t-tweġiba tiegħek tintwera taħt il-messaġġ oriġinali.
• Għodod ta' editjar tħallik teditja messaġġ sa kwarta wara li tibagħtu u treġġa' lura messaġġ sa 24 siegħa wara li tkun bgħattu.
• Irċevuti tal-qari turik jekk il-klijenti jew il-persuni l-oħra kollha li bgħattilhom messaġġ fetħux il-messaġġi li bgħattilhom, sakemm ma jkunux tfew dil-faċilità mis-settings tal-kont tagħhom.
• Ir-rakkomandazzjonijiet jagħmluha eħfef li taqsam il-gwida tal-ivvjaġġar tiegħek u tissuġġerixxi esperjenzi jew servizzi tal-post bi ftit għafsiet.
• Il-qsim tar-ritratti u l-vidjows tħallik tehmeż il-fajls mal-messaġġi li tibgħat lill-co-hosts u lill-klijenti wara li l-booking tagħhom jiġi kkonfermat.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.