Ħu ritratti tajbin tal-ispazju tiegħek bil-mowbajl
Punti ewlenin
Faċli ħafna li turi dak li jagħmel l-ispazju tiegħek speċjali
Kemm timxi ma' dal-istruzzjonijiet u tagħti kas tal-affarijiet li għandek tagħmel u dawk li le
Uża ċ-checklist tagħna biex tiżgura li għamilt dak kollu li kellek tagħmel
1. Ħejji l-ispazju tiegħek
Qabel tibda, sib l-aħjar dawl u ħejji l-ispazju tiegħek bl-istrateġiji li qsamna miegħek fil-lezzjoni tal-fotografija tagħna. Ara li jkollok biżżejjed ħin biex tieħu bejn ħames u sitt ritratti ta' kull kamra.
Int u tieħu r-ritratti, importanti tifhem kif ir-ritratti tal-listing tiegħek se jintwerew fuq Airbnb:
- L-ewwel ritratt se jkun ir-ritratt tal-qoxra, ir-ritratt ewlieni fuq il-paġna tal-listing tiegħek u dak li se jintwera fir-riżultati tat-tiftix.
- L-ewwel ħames ritratti, fosthom ir-ritratt tal-qoxra, se jintwerew bħala collage fin-naħa ta' fuq tal-paġna tal-listing tiegħek u se jitqasqu f'forma ta' kaxxa—għalhekk dejjem żomm is-suġġett f'nofs ir-ritratt.
- Il-gallerija tar-ritratti tiegħek se jkun fiha r-ritratti kollha biex il-klijenti jkunu jistgħu jqallbuhom.
2. Iċċekkja s-settings tiegħek
Ħafna mowbajls kapaċi jieħdu ritratti tajbin. Dawn huma xi faċilitajiet siewja u l-istruzzjonijiet ta' kif għandek tużahom.
Ixgħel il-linji gwida
Il-linji gwida jistgħu jgħinuk tiffoka r-ritratt fuq is-suġġett u tifhem jekk hux qed tieħu ritratt dritt. Biex tirranġa l-linji gwida tal-kamera tiegħek:
- Għall-iPhones: Iftaħ Settings > Kamera u Ixgħel l-iswiċċ tal-linji gwida.
- Għal Android: Iftaħ l-app tal-kamera, iftaħ Għażliet, niżżel il-paġna 'l isfel u Ixgħel is-swiċċ ħdejn l-għażla Linji gwida.
Għal iktar pariri fuq kif tuża l-linji gwida, agħti ħarsa lejn it-taqsima tar-regoli tat-terzi hawn taħt.
Itfi l-flash
Il-flash tista' twassal għal stampa ħarxa għalhekk l-aħjar li tuża huwa dawl naturali qawwi. Jekk l-ispazju tiegħek għandu xi twieqi, nissuġġerulek tieħu r-ritratti fl-iktar ħin tal-jum li jkun dieħel dawl minn barra. Jekk l-ispazju tiegħek m'għandux twieqi, tista' tixgħel xi ftit lampi biex toħloq atmosfera kennija.
Biex titfi l-flash, iftaħ l-app tal-Kamera tiegħek, sib l-ikona tas-sajjetta u agħżel Mitfija.
Iċċekkja r-riżoluzzjoni tal-istampa
L-iktar ritratti ċari jużaw riżoluzzjoni ta' mill-inqas 1024 x 683 px. Matul is-sessjoni tat-teħid tar-ritratti ara li tkun qed tieħu ritratti b'riżoluzzjoni għolja għax is-settings tat-tagħmir jafu jkunu b'mod li t-tagħmir jerfa' biss ritratti b'riżoluzzjoni baxxa. Wara li tlesti tieħu r-ritratti, dejjem tista' tmur lura u terġa' tibdel dawn l-għażliet.
3. Ħu ritratt professjonali
Hawn għandek x'għandek tagħmel u x'm'għandekx tagħmel biex tieħu ritratti ta' kwalità għolja.
Żomm il-linji dritti
X'GĦANDEK TAGĦMEL: Żomm il-mowbajl tiegħek dritt. Jaf ikollok tgħolli jew tbaxxi jdejk biex tqiegħed l-iktar biċċa għamara importanti f'nofs l-istampa. Fil-kmamar tas-sodda, iffoka fuq is-sodda; fis-salott, forsi fuq is-sufan. Bħala regola żomm f'moħħok li l-kamera għandha dejjem tkun fil-għoli biżżejjed biex tiġbed l-uċuħ tas-sodod, tal-imwejjed u tal-bankijiet tal-kċina.
X'M'GĦANDEKX TAGĦMEL: La għandek ixxaqleb il-mowbajl u lanqas għandek tgħollih 'il fuq minn rasek biex tikseb stampa aħjar għax inkella, ħafna drabi, ir-ritratt ma joħroġx tajjeb.
Imxi mar-regola tat-terzi
Ir-regola tat-terzi hija prinċipju ta' kif tqassam l-istampa ta' ritratt fi tliet partijiet għat-tul u tlieta għal wisgħa (li flimkien jagħmlu disa' kaxxi u jwasslu għal erba' postijiet fejn il-linji jmissu ma' xulxin). Meta tixgħel il-linji gwida għar-ritratti fuq il-mowbajl tiegħek u tuża r-regola tat-terzi, tkun qed tgħin tiżgura li r-ritratti tiegħek ikunu dritti u li tibni stampa tajba.
X'GĦANDEK TAGĦMEL: Qiegħed is-suġġett tar-ritratt fil-post fejn jiltaqgħu l-linji gwida, ċioè ftit 'il barra miċ-ċentru. Pereżempju, qiegħed il-mowbajl tiegħek b'mod li s-suġġett tar-ritratt—is-sufan, is-sodda jew il-mejda tiegħek—ikunu fil-post fejn il-linji jidħlu f'xulxin fin-naħa tax-xellug jew tal-lemin tal-iskrin tiegħek.
X'M'GĦANDEKX TAGĦMEL: Tqigħedx is-suġġett tar-ritratt fit-terz ta' fuq jew fit-terz t'isfel inkella jaf tkun qed titlef xi dettalji importanti.
Ħu ritratti ċari
X'GĦANDEK TAGĦMEL: Ħalli l-kamera tiffoka awtomatikament biex ma jkollokx għalfejn toqgħod tiffoka int stess.
X'M'GĦANDEKX TAGĦMEL: Tiħux ritratti b'id waħda biss. Uża jdejk it-tnejn biex tevita li l-mowbajl joqgħod jitriegħed u biex tieħu ritratt ċar. Tista' wkoll tipprova sserraħ minkbejk mal-kustilji biex tevita li jdejk joqogħdu jitriegħdu.Ifhem meta għandek tkabbar l-istampa
Il-mowbajls il-ġodda ħafna drabi se ssibilhom modalitajiet diġà pprogrammati għal ċerti settings—pereżempju għar-ritratti weqfin, mimdudin u wesgħin. Jekk il-kamera tal-mowbajl tiegħek għandha dawn l-għażliet, uża lilhom minflok toqgħod iċċaqlaq il-kamera nnifisha.
L-aħjar li tkabbar l-istampa huwa meta tkun qed tiġbed ritratt ta' xi disinn partikolari tal-ispazju tiegħek, bħal meta fir-ritratt tkun trid iddaħħal biss parti żgħira tal-mejda tal-kafè, tas-sufan u tal-pittura mdendla warajhom.
Jekk il-mowbajl tiegħek m'għandux dal-modalitajiet, uża s-settings standard biex tieħu ritratt tal-kamra kollha u kabbar l-istampa biss meta trid turi xi ħaġa mill-qrib—pereżempju l-fjuri fuq il-komodina jew is-sufan b'pittura mdendla mal-ħajt warajh.
4. Irrakkonta storja
Uri għaliex il-klijenti għandhom ikunu ħerqana li jagħżlu l-post tiegħek. Filwaqt li d-deskrizzjoni tal-listing tiegħek tagħti dettalji importanti, stampa hija bil-wisq iktar importanti fuq Airbnb.
Enfasizza l-kumditajiet
il-Klijenti jixtiequ jkunu jafu x'hemm speċjali fil-post tiegħek u għalhekk ara li tieħu ritratt ta' kull kumdità importanti li hemm fil-post. L-aħjar li tagħmel hu li turi l-kumditajiet fil-kuntest tagħhom—jekk hemm banju fl-ispazju tiegħek, aħjar tieħu ritratt tal-banju bix-xugamani mitwijin fuq bank ħdejh milli tiffoka fuq il-banju, il-viti tal-ilma u l-madum ta' warajh.
Dawn huma xi eżempji ta' kumditajiet li tista' tieħu ritratt tagħhom u ssemmihom fil-captions:
- Spazju għal ħidma fuq il-laptop
- Oġġetti maħsuba għall-familji, bħal siġġu għoli jew benniena
- Spazju fuq barra bħal terrazzin, ġnien jew gallarija
- Magna tal-espresso, kitla tal-kafè jew sett tat-te
- Prodotti tal-indafa personali ta' kwalità fina bħal xugamani tal-banju rotob, ġagagi tal-banju jew papoċċi tas-sodda
Dawwar il-kamera tiegħek
Ħu l-ewwel ħames ritratti mimdudin għax dawk jidhru l-aħjar fil-grilja tal-paġna tal-listing tiegħek.
X'GĦANDEK TAGĦMEL: Ħu ritratti weqfin għal spazji dojoq bħalma huma l-gwardarobbi, il-kmamar tal-banju żgħar jew il-galleriji.
X'M'GĦANDEKX TAGĦMEL:Tużax ritratti weqfin fost il-ħames ritratti tal-grilja għax dawn jitqasqsu biex jidħlu fid-disinn mimdud.
Varja r-ritratti li turi
Tista' tgħin lill-klijenti jimmaġinaw lilhom infushom fl-ispazju tiegħek billi mhux biss turihom fejn se jorqdu, jieklu u jirrilassaw imma ttella' wkoll ritratti li jiffukaw fuq affarijiet interessanti.
Nissuġġerulek li għal kull kamra ttella' taħlita ta' ritratti—ritratti wesgħin, ritratti minn ftit 'il bogħod, ritratti mill-qrib, uħud minnhom mimdudin u oħrajn weqfin. Dan huwa kif għandek tuża t-tipi differenti ta' ritratti:
- Ir-ritratti wesgħin jagħtu stampa ġenerali u jgħinu lin-nies jifhmu d-daqs ta' kamra u dak kollu li tista' ssib fiha.
- Ir-ritratti minn ftit 'il bogħod għandhom jittieħdu faċċata tal-suġġett u mhux minn xi ġenb tiegħu. Dat-tip ta' ritratt jgħin lill-klijenti jifhmu x'inhu s-suġġett ewlieni tal-kamra.
- Ir-ritratti mill-qrib jagħtu idea iktar ċara tal-istil tal-kamra, bħal pereżempju ritratt tal-kotba fuq komodina. Int u tieħu r-ritratti mill-qrib, oqgħod attent/a għal dak li se jintwera fl-istampa: Ara li tpaħpaħ l-imħaded, taħbi l-wajers u tillixxja l-lożor.
X'GĦANDEK TAGĦMEL: Fir-ritratti li tieħu, uri kif kamra tmiss ma' oħra—pereżempju tista' turi s-salott fl-isfond ta' ritratt meħud mill-qrib. Organizza l-gallerija tar-ritratti tiegħek bħallikieku kienet dawra virtwali mad-dar biex tgħin lill-klijenti jifhmu aħjar kif inhu mqassam il-post.
Ħu iktar ritratti milli teħtieġ
Kellek biċċa xogħol biex tħejji l-ispazju tiegħek għar-ritratti—mela ara li tieħu ritratt tal-inqas ħaġa. Imbagħad tista' tagħżel iktar tard liema minnhom tuża.
Int u tagħżel ir-ritratti, żomm f'moħħok li r-ritratti għandhom jirrakkuntaw l-istorja tal-ispazju tiegħek u jgħinu lill-klijenti jifhmu x'għandhom jistennew li jsibu. Dawn huma xi ftit suġġerimenti:
- Tella' biżżejjed ritratti biex il-klijenti jifmhu x'jistgħu jistennew li jsibu
- Tella' bejn żewġ u erba' ritratti ta' kull kamra li l-klijenti se jkunu jistgħu jużaw
- Ħu r-ritratti minn irkejjen differenti ta' kull kamra biex tagħti stampa ċara tal-kmamar
- Ħu ritratti mill-qrib biex turi l-istil tal-ispazju tiegħek
- Uri sew kull faċilità tal-aċċessibbiltà
Uża diċ-checklist
Biex ngħinuk matul l-ewwel sessjoni tat-teħid tar-ritratti tiegħek, ġbarnielek lista ta' ritratti u angoli suġġeriti.
Kmamar tas-sodda
- Ritratt wiesa' ta' kull kamra tas-sodda
- Ħu xi ritratti minn irkejjen oħra tal-istess kmamar biex tagħti iktar dettalji
- Ritratt minn ftit 'il bogħod tal-iktar oġġetti importanti, bħal pereżempju s-sodda u l-komodina
- Ritratt mill-qrib tal-istil, bħal pereżempju tal-ktieb jew tal-fjuri fuq il-komodina
Salott
- Ritratt wiesa' tas-salott kollu (jekk tista' uri d-dawl li dieħel minn tieqa)
- Ritratt minn ftit 'il bogħod ta' sufan jew post fejn tista' toqgħod bilqiegħda
- Ritratt mill-qrib li juri l-istil, bħal pereżempju ritratt ta' fireplace
Kamra tal-banju
- Ritratt wiesa' tal-kamra tal-banju ewlenija
- Ritratt minn ftit 'il bogħod tat-tieni kamra tal-banju li juri s-sink u l-banju jew id-doċċa
- Ritratt mill-qrib ta' xugamani fuq xulxin jew tal-veduta mit-tieqa
Kċina
- Ritratt wiesa' tal-kċina sħiħa jew tal-kċina żgħira
- Ritratt minn ftit 'il bogħod tal-forn, ħdejn bankijiet organizzati puliti
- Ritratt mill-qrib tal-fjuri f'nofs il-mejda
- Ritratt mill-qrib ta' qoffa bil-prodotti tat-tindif għall-klijenti
Fuq barra
- Ritratt wiesa' ta' gallarija, ġnien, terazzin jew veranda sħiħa
- Ritratt minn ftit 'il bogħod li juri l-postijiet fejn tista' toqgħod bilqiegħda fuq barra (u forsi tista' turi wkoll il-veduta li hemm fuq barra)
- Ritratt mill-qrib ta' kull xorta ta' dekorazzjoni li tkompli mal-istil, pereżempju x-xtieli fil-qsari ħdejn l-għamara ta' barra
- Ritratt wiesa' tal-mogħdija li tagħti għad-daħla tal-post tiegħek
Ħadd ma jaf l-ispazju tiegħek aħjar minnek għalhekk ara li tieħu ritratt tal-iktar affarijiet li jogħġbuk u ta' kull ħaġa li l-klijenti kkummentawlek tajjeb dwarha fir-reviews. Qabel ittemm is-sessjoni tat-teħid tar-ritratti, ara li ħadt ritratt ta' kull ħaġa li għandek fuq il-lista tiegħek.
Skopri l-lezzjoni tal-fotografija:
- L-ewwel parti: Ħejji l-ispazju tiegħek għal sessjoni tat-teħid tar-ritratti bil-mowbajl
- It-tieni parti: Ħu ritratti ta' kwalità bil-mowbajl tiegħek
- It-tielet parti: Agħżel u editja r-ritratti għal-listing tiegħek
Punti ewlenin
Faċli ħafna li turi dak li jagħmel l-ispazju tiegħek speċjali
Kemm timxi ma' dal-istruzzjonijiet u tagħti kas tal-affarijiet li għandek tagħmel u dawk li le
Uża ċ-checklist tagħna biex tiżgura li għamilt dak kollu li kellek tagħmel