Kif tuża l-għodod tal-prezzijiet ta' Airbnb

L-għodod ta' Airbnb jagħmluhielek eħfef li tibdel il-prezz tal-listing tiegħek biex ikun kompetittiv. Tista' ssib dal-għodod fil-kalendarju tal-listing tiegħek.

Ħafna drabi l-għodod tal-prezzijiet u s-settings tad-disponibbiltà jaħdmu flimkien. Ngħidu aħna, jekk tixtieq tagħti skontijiet għaż-żjarat ta' xahar, jeħtieġlek tilqa' żjarat itwal.

Nissuġġerulek tiċċekkja u tibdel il-prezz tal-listing tiegħek ta' sikwit biex tkun tista' tkun kompetittiv u ddaħħal iktar flus. Qis il-pariri tal-prezzijiet li tagħtik Airbnb int u tibdel il-prezzijiet.

• Prezz bażi: Dan il-prezz standard għall-iljieli miftuħa kollha fuq il-kalendarju tal-listing tiegħek. Iftaħ is-settings tal-prezzijiet biex tibdlu. Tista' tqabbel il-listings li jixtiebhu fuq mappa taż-żona tal-listing tiegħek biex tiċċekkja l-prezzijiet medji tal-postijiet fejn toqgħod ibbukkjati u mhux ibbukkjati.
• Prezz ta' tmiem il-ġimgħa: Għall-iljieli tal-Ġimgħa u tas-Sibt tista' tgħolli ftit il-prezz bażi tal-listing mis-settings tal-prezzijiet. Taf tikseb iktar bookings jekk tibdel il-prezzijiet li titlob skont il-jum tal-ġimgħa.
• Prezz personalizzat: Agħżel lejl jew grupp ta' ljieli mill-kalendarju tal-listing biex tibdlilhom il-prezz. Agħfas fuq il-bakketta ta' fuq il-kalendarju tiegħek biex turi jew taħbi l-pariri tal-prezzijiet ta' kull lejl li jafu jintwerew taħt il-prezz personalizzat ta' kull lejl tal-listing tiegħek.

Ixgħel il-Prezzijiet Intelliġenti mis-settings tal-prezzijiet biex tibdel il-prezz tal-listing tiegħek awtomatikament. Dil-għodda tuża fatturi bħall-post, il-kumditajiet, il-bookings li għamilt fl-imgħoddi u l-iġded prezzijiet fiż-żona tiegħek biex tqiegħed il-prezz għal kull lejl. Kemm iddaħħal il-firxa tal-prezzijiet u tista' tixgħelha jew titfiha għal xi dati partikolari. Mhux se nuruk il-pariri għall-prezzijiet ta' kull lejl jew il-listings li jixtiebhu jekk tuża l-Prezzijiet Intelliġenti.

L-offerti u l-iskontijiet jistgħu jgħinuk ittejjeb il-post fejn jintwera l-listing tiegħek fir-riżultati tat-tiftix u tħajjar lill-klijenti jibbukkjaw il-listing tiegħek. Fis-settings tal-prezzijiet tiegħek se ssib 4 skontijiet li tista' tuża.

• Għaż-żjarat ta' ġimgħa: Agħti skont għal żjarat ta' mill-inqas 7 iljieli biex jgħinek timla l-kalendarju tiegħek iktar malajr u tnaqqas il-ħtieġa li tħejji l-post għall-klijenti l-ġodda.
• Għaż-żjarat ta' xahar: Agħti skont għal żjarat ta' mill-inqas 28 lejl biex jgħinek ittawwal it-tul tal-bookings medju tal-listings tiegħek u tnaqqas il-ħtieġa li tħejji l-post għall-klijenti l-ġodda.
• Għal min jibbukkja kmieni: Biex tħajjar lill-klijenti li jibbukkjaw bil-quddiem jibbukkjaw il-listing, raħħas il-prezz li titlob għall-bookings li jsiru bejn xahar u 24 xahar bil-quddiem.
• Tal-aħħar minuta: Raħħas il-prezzijiet għall-bookings li jsiru bejn jum u 28 jum qabel iċ-checkin biex jgħinuk timla l-iljieli battala fil-kalendarju tal-listing.

Tista' tuża l-iskontijiet għal xi dati partikolari. Agħżel id-dati li tixtieq mill-kalendarju tal-listing biex tiftaħ is-settings personalizzati u traħħas il-prezz għal dawk l-iljieli.

Jekk tagħti lill-klijenti skont għall-bookings ta' ġimgħa u ta' xahar ta' mill-inqas 10%, se nuru messaġġ speċjali ħdejn il-listing tiegħek fir-riżultati tat-tiftix u fuq il-paġna tal-listing tiegħek. Il-prezz imraħħas tal-listing tiegħek se jintwera ħdejn il-prezz mhux imraħħas (li se jintwera maqtugħ).

Taf tikseb iktar bookings mingħajr ma jkollok għalfejn tibdel il-prezz bażi tal-listing tiegħek jekk tagħti offerti għal ftit taż-żmien. Nafu nuruk żewġ tipi ta' offerti, skont l-eliġibbiltà tiegħek.

• Offerta ta' listing ġdid: Raħħas il-prezz b'20% għall-ewwel 3 bookings f'listing ġdid biex tkunlek eħfef tikseb il-klijenti u r-reviews għal-listing.
• Offerta personalizzata: Agħżel id-dati u l-iskont li tixtieq tagħti. Hemm xi kundizzjonijiet.

Jekk tuża l-offerta ta' listing ġdid jew tagħti offerta speċjali fejn traħħas il-prezz tal-listing b'mill-inqas 15%, se nuru messaġġ speċjali ħdejn il-listing tiegħek fir-riżultati tat-tiftix u fuq il-paġna tal-listing tiegħek.

Hemm 3 tariffi li tista' żżid mal-prezz. Żomm f'moħħok li t-tariffi jgħollu l-prezz totali tal-listing tiegħek u jafu jaqtgħu qalb il-klijenti milli jibbukkjaw miegħek—u int tista' tmur minn taħt.

• Tariffa għat-tindif: Tista' żżid tariffa standard u tariffa għaż-żjarat iqsar ta' lejl jew tnejn.
• Tariffa tal-pets: Tista' titlob dit-tariffa għal kull pet, għal kull lejl jew għal kull booking. Il-Politika tal-Aċċessibbiltà ta' Airbnb ma tħallikx titlob tariffa għall-Annimali tas-Servizz.
• Tariffa għal kull klijent ieħor li jingħaqad mal-booking: Tista' titlob tariffa għal kull lejl li matulu jkunu hemm klijent ieħor iktar minn għadd ta' klijenti li tkun għażilt. Ngħidu aħna, bil-prezz ta' kull lejl tal-listing tiegħek tista' tilqa' sa sitt klijenti u mbagħad, jekk il-post tiegħek jiflaħ iktar nies, titlob €10 iktar kull lejl għal kull klijent ieħor li jingħaqad mal-booking.

Għall-prezz li titlob tinsiex tqis it-tariffi l-oħra ta' barra l-pjattaforma tagħna bħall-kontijiet tad-dawl u l-ilma u t-tariffi tar-resort għax dawn jibdlu l-prezz totali.

Il-prezzijiet li titlob u s-settings l-oħra tal-listing tiegħek dejjem se jkunu f'idek. Ir-riżultati li tikseb jafu jvarjaw.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.