Kif tuża s-settings tal-kalendarju u tal-bookings tiegħek

Is-settings tal-bookings u tal-kalendarju tiegħek jagħtuk kontroll fuq meta taqsam l-ispazju tiegħek—kemm jekk trid tilqa' n-nies biss matul tmiem il-ġimgħa kif ukoll jekk tixtieq tilqa' n-nies kuljum. Jekk titgħallem tuża das-settings, se tkunlek eħfef kemm li tmexxi n-negozju tal-ospitalità tiegħek mingħajr xkiel kif ukoll li toffri lill-klijenti tiegħek dak li qed ifittxu.

Hawn għandek l-istruzzjonijiet ta' kif tagħżel settings tal-kalendarju li jgħoddu għalik.

Tista' tiftaħ id-dati tal-kalendarju tiegħek sa sentejn bil-quddiem. Iktar ma jkollok dati disponibbli, iktar il-klijenti jkollhom minn fejn jagħżlu.

Importanti li żżomm il-kalendarju tiegħek aġġornat biex tevita li jkollok tikkanċella l-bookings. Il-kanċellazzjonijiet jistgħu jwasslu għal tariffi u konsegwenzi oħra għalik u għal esperjenzi xejn sbieħ għall-klijenti.

Kevino, Superhost ġewwa l-Belt tal-Messiku jgħidilna li juża s-settings tal-bookings u tal-kalendarju biex:

• Jaġġorna l-prezzijiet skont id-domanda taż-żona. "Ħafna drabi nitlob prezzijiet ogħla f'Ottubru u Novembru għax, minħabba l-ħafna festivals li jseħħu matul dax-xhur, dawn huma meqjusa bħala l-istaġun popolari tal-Belt tal-Messiku. Kulħadd irid jkun hawn għall-Jum tal-Mejtin!"

• Jagħżel il-ħinijiet taċ-checkin u taċ-checkout. "Il-klijenti jistgħu jibdew jagħmlu ċ-checkin mis-14:00 u jistgħu jagħmlu ċ-checkout x'ħin iridu qabel nofsinhar—nixtieq li l-klijenti jħossuhom li għandhom ċans jieklu l-kolazzjon u jirrilassaw qabel iħallu l-post tiegħi. Għandi wkoll żona li tissakkar fejn il-klijenti li jixtiequ jqattgħu iktar ħin fil-belt wara l-ħin taċ-checkout jistgħu jħallu l-bagalji tagħhom."

• Jimblokka d-dati li jixtieq iżomm għall-familja, għall-ħbieb jew għall-klijenti li jibbukkjaw il-post tiegħu ta' sikwit. "Għandi wkoll klijenti li sena wara l-oħra jagħżlu li jibbukkjaw l-istess dati għalhekk nimblokka dawk id-dati minn qabel."

Tista' wkoll tuża l-preferenzi tal-booking tiegħek biex:

• Tagħżel iż-żmien li teħtieġ biex tħejji l-post għall-klijenti.

• Tagħżel l-inqas u l-ikbar numru ta' ljieli għal żjara.

• Tissinkronizza l-kalendarju ta' Airbnb tiegħek mal-kalendarji l-oħra tiegħek. Meta tissinkronizza l-kalendarju tiegħek tkun qed tgħin biex tevita l-bookings doppji u tkun tista' żżomm kont ta' dak kollu li għandek tagħmel minn post wieħed.

Il-kalendarju tiegħek iżomm kont ukoll tal-bookings tal-klijenti li tikseb. Tista' tagħżel li turi jew taħbi d-dettalji biex tiċċekkja d-disponibbiltà tiegħek għall-ġejjieni, tiċċekkja l-prezzijiet li tlabt għall-iljieli fl-imgħoddi, tirranġa l-offerti u l-prezzijiet għall-ġejjieni u tippjana għall-ġejjieni b'moħħok mistrieħ.

Tista' tħalli l-klijenti jibbukkjaw l-ispazju tiegħek bil-Booking Immedjat jew billi jibagħtulek talba għall-booking.

It-talbiet għall-booking iħallu lill-Hosts jaċċettaw it-talbiet waħda waħda fi żmien 24 siegħa minn meta jidħlulhom. Dil-għażla normalment tintgħażel minn Hosts li:

• Ikollhom disponibbiltà li tvarja minħabba l-ħtiġijiet u l-impenji tagħhom.
• Joffru spazju uniku, bħal pereżempju post qadim ħafna, u qabel jikkonfermaw booking ikunu jixtiequ javżaw lill-klijenti minn qabel dwaru biex b'hekk ikunu jafu x'għandhom jistennew.
• Joffru żjarat itwal ta' mill-inqas 28 lejl.

Il-Booking Immedjat jagħti lill-klijenti l-opportunità li jibbukkjaw minnufih għal kull data disponibbli sakemm ikollhom ir-rekwiżiti kollha li qed tfittex u jaqblu mar-regoli tad-dar tiegħek. Dil-għodda tħaffef il-proċess tal-booking għall-klijenti għax ma jkollokx għalfejn tirrevedi u taċċetta kull talba għall-booking.

"Għamilt prova li matulha l-ewwel ippubblikajt il-listing tiegħi bil-ħtieġa li jintbagħtu t-talbiet għall-booking imbagħad bil-Booking Immedjat," jgħidilna Kevino. "Bil-Booking Immedjat innutajt żieda tajba fin-numru ta' bookings."

Grazzi għal das-settings u oħrajn bħalhom tista' tagħżel meta u kif l-ispazju tiegħek jiġi bbukkjat u fl-istess waqt toħloq kalendarju tal-ospitalità li jgħodd għall-ħtiġijiet tiegħek.

L-informazzjoni f'dal-artiklu jaf laħqet inbidlet minn meta ġie ppubblikat.