Kif tibdel l-għażliet tad-disponibbiltà tal-listing tiegħek
Is-settings tad-disponibbiltà ta' Airbnb iħaffulek xogħlok meta tiġi biex tagħżel meta u kif il-klijenti jistgħu jibbukkjaw il-post tiegħek. Tista' ssib dal-għodod fil-kalendarju tal-listing tiegħek.
Ħafna drabi l-għodod tal-prezzijiet u s-settings tad-disponibbiltà jaħdmu flimkien. Jekk tixtieq tuża xi għodod bħal, ngħidu aħna, l-iskontijiet ta' xahar, jaf ikollok tibdel id-disponibbiltà tal-listing tiegħek biex tilqa' ż-żjarat itwal.
Kif tibdel l-inqas u l-ikbar għadd ta' ljieli għal booking
Meta tibdel l-inqas u l-ikbar għadd ta' ljieli meħtieġa għal booking tkun qed tiftaħ il-kalendarju tal-listing tiegħek u tgħin biex il-listing jintwera f'iktar riżultati tat-tiftix. Ara li l-inqas u l-ikbar għadd ta' ljieli meħtieġa jkunu skont ir-regoli u r-regolamenti tal-post fejn jinsab il-listing.
- L-inqas għadd ta' ljieli: Naqqas l-inqas għadd ta' ljieli meħtieġa għal booking biex tkun tista' tikseb il-bookings tal-klijenti li jixtiequ jibbukkjaw żjarat qosra u biex timla l-kalendarju tal-listing tiegħek. Tista' tippersonalizza l-inqas għadd ta' ljieli meħtieġa għal żjara skont il-jum tal-ġimgħa meta jibda l-booking.
- L-ikbar għadd ta' ljieli: Meta żżid l-ikbar għadd ta' ljieli għal booking taf tkun qed tħajjar lill-klijenti jibbukkjaw żjarat itwal u għalhekk tqatta' inqas ħin tħejji l-post tiegħek għall-klijenti l-ġodda. Tista' wkoll tilqa' t-talbiet għall-bookings li jkunu itwal mill-itwal għadd ta' ljieli li tilqa' s-soltu. Meta tagħmel hekk se nitolbuk tiċċekkja u tilqa' dat-talbiet int stess.
- Tul tal-booking personalizzat: Tul tal-booking personalizzat li jkun iqsar mill-inqas għadd ta' ljieli li s-soltu meħtieġa għal booking jaf jgħinek timla d-dati battala fil-kalendarju tal-listing tiegħek.
Kif tikkontrolla d-disponibbiltà tal-listing tiegħek
Kemm teħtieġ avviż bil-quddiem bejn il-booking u l-wasla tal-klijenti? Kemm tixtieq li l-klijenti jibbukkjaw bil-quddiem? Qiegħed id-disponibbiltà tal-listing b'mod li tikseb il-bookings li jgħoddu għalik. Se niftħu l-iljieli awtomatikament skont is-settings li tagħżel. Mhux se jkollok għalfejn toqgħod tagħmel il-bidliet fil-kalendarju tal-listing int stess.
- Avviż bil-quddiem: Agħżel jew għal dakinhar stess, mill-inqas jum, mill-inqas jumejn, mill-inqas tlitt ijiem jew mill-inqas sebat ijiem. Għandek ukoll l-għażla li tilqa' t-talbiet għal dakinhar stess imma jeħtieġlek tiċċekkja u tilqa' dat-talbiet int stess.
- Avviż bil-quddiem għal dakinhar stess: Jekk tħalli lill-klijenti jibbukkjaw għal dakinhar stess, se nitolbuk l-aħħar ħin meta tilqa' l-bookings għal dakinhar stess. Agħżel il-ħin li tixtieq bejn is-06:00 u 00:00.
- Ħin tat-tħejjija: Agħżel kemm teħtieġ timblokka ljieli qabel u wara kull booking. L-għażliet huma l-ebda, lejl qabel u wara kull booking u żewġt iljieli qabel u wara kull booking.
- Dati miftuħa bil-quddiem: Meta tiftaħ iktar dati bil-quddiem tkun qed tħalli lill-klijenti jibbukkjaw iktar minn qabel u tkun qed tgħin biex il-listing tiegħek jintwera f'iktar riżultati tat-tiftix. Agħżel bejn 3 xhur, 6 xhur, 12-il xahar u 24 xahar mil-lum.
- Iktar settings tad-disponibbiltà: Għandek l-għażla li ma tħallix lill-klijenti jagħmlu ċ-checkin jew iċ-checkout f'xi jiem tal-ġimgħa. Dil-għażla ma tħallix lill-klijenti jibdew jew itemmu l-bookings tagħhom f'xi jiem fejn taf diġà li qatt mhu se tkun disponibbli. Tista' tagħżel għadd ta' jiem tal-ġimgħa imma mhux kuljum. Jekk ma tħallix lill-klijenti jaslu jew iħallu l-post fl-ebda jum tal-ġimgħa, mhux se jkunu jistgħu jibbukkjaw il-post tiegħek.
Kif torbot il-kalendarji tal-listing tiegħek
Meta tissinkronizza l-kalendarji tal-ospitalità tiegħek tkun qed tevita li jkollok iktar minn klijent wieħed ibbukkjat għall-istess lejl. Dir-rabta taħdem għaż-żewġ naħat u taġġorna ż-żewġ kalendarji awtomatikament meta xi ħadd jibbukkja lejl. Kif torbot il-kalendarji tal-listing tiegħek:
- Żid il-link għall-kalendarju ta' Airbnb li tajniek mas-sit l-ieħor.
- Ikseb link li tintemm b'.ics mis-sit l-ieħor u żidha mal-kalendarju ta' Airbnb tal-listing tiegħek.
Il-prezzijiet li titlob u s-settings l-oħra tal-listing tiegħek dejjem se jkunu f'idek. Ir-riżultati li tikseb jafu jvarjaw.
L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.