Kif tgħin lill-klijenti jivvjaġġaw daqslikieku kienu nies tal-post

Airbnb bdiet bħala pjattaforma fejn il-vjaġġaturi setgħu joqogħdu ġewwa d-dar ta' ħaddieħor mingħajr ma jonfqu ħafna flus. Il-proġett tagħna kompla jikber hekk kif iktar hosts minn madwar id-dinja kollha bdew jiltaqgħu mal-klijenti.

Il-kmamar għandhom il-ħsieb li jagħtu l-istess esperjenza: Huma addattati għall-klijenti li għalkemm jixtiequ ftit privatezza, xorta jixtiequ jiltaqgħu ma' nies ġodda u jgħixu ż-żjara tagħhom bħan-nies tal-post. Meta jibbukkjaw kamra, il-klijenti se jkollhom il-kamra tagħhom f'dar flimkien ma' aċċess għall-ispazji li jistgħu jkunu maqsuma mal-oħrajn.

Dawn ftit pariri biex tgħin lill-klijenti jħossuhom komdi jibbukkjaw u joqogħdu fil-post tiegħek.

Tista' toħloq gwida tal-ivvjaġġar għal-listing biex tgħin lill-klijenti jsiru jafu ż-żona tiegħek aħjar. Dan mod ħafif kif taqsam is-suġġerimenti mal-klijenti.

Ħafna hosts jagħtu wkoll is-suġġerimenti tagħhom wiċċ imb wiċċ meta jiltaqgħu mal-klijenti. Reed, li flimkien ma' martu huwa host ta' kamra ġewwa Philadelphia, ta' sikwit jistieden lill-klijenti jingħaqdu miegħu u ma' martu għall-ikla tal-Ħadd. Jitkellem dwar "dawk il-postijiet tal-ġenn li mhux tas-soltu", bħal pereżempju kaffetterija fil-qrib b'ħitan miksija bil-kotba.

Kultant Reed jistieden lill-klijenti biex jingħaqdu miegħu għaż-żfin salsa, wieħed mill-iktar passatempi li jħobb. "Ħadna għadd ta' klijenti jiżfnu f'post b'mużika Latina biex inqumu ftit fuq tagħna," jgħidilna. Xi klijenti "saru qishom parti mill-familja", żied jgħidilna.

Il-klijenti jafu jibbukkjaw il-kamra tiegħek għax il-profil tiegħek bħala host jgħinhom isiru jafu ftit aħjar min int u għalhekk jafu jħossuhom iktar komdi joqogħdu għandek.

Nicola, host ta' kamra ġewwa Fitzroy, l-Awstralja, tgħidilna li tieħu gost issir taf dwar kulturi u ikel ġdid. Sabet li xi klijenti jagħżlu li jqattgħu l-ħin tagħhom magħha u jħossuhom komdi qishom kienu d-dar tagħhom.

Hi u ħuha, kok magħruf ġewwa Melbourne, kultant jistaqsu lill-klijenti jekk ikunux iridu jsajru xi ħaġa flimkien. "Għandna kċina industrijali u għalhekk il-klijenti jistgħu jagħmlu l-għaġin jew il-ħobż tagħhom stess," tgħidilna.

Grupp minnhom tant ħassewhom milqugħa li spiċċaw jagħmlu l-yoga fis-salott ta' Nicola. "Ħadt gost ħafna nara li l-post tiegħi għoġobhom," tgħidilna. Hekk kif fehmet li l-klijenti jħobbu l-eżerċizzju fiżiku, Nicola wriethom park fil-qrib u qattgħu l-waranofsinhar hemm flimkien—jixxabbtu mas-siġar u jitkellmu dwar postijiet oħra li setgħu jiskopru.

Aħseb ftit fuq kif tixtieq tqatta' l-ħin mal-klijenti u għarrafhom b'dak li tixtieq. Jekk titħajjar tqatta' ftit ħin mal-klijenti tiegħek, dil-ħaġa taf twasslek tibni rabta magħhom.

Garth, host ġewwa Auckland, New Zealand, jgħid li meta jilqa' n-nies ikun jista' jqatta' iktar ħin ma' nies minn kulturi oħra mingħajr il-ħtieġa li jivvjaġġa. Ħaseb bejn u bejn ruħu, "Mhux aħjar jiġu jżuruni huma?".

Waħda mis-sitwazzjonijiet li Garth ma jinsa' qatt seħħet ma' xi klijenti li kienu ġejjin minn Franza. L-omm staqsietu jekk binha setax joqgħod jarah jaħdem fil-garaxx. "Lit-tifel għoġbitu kull ħaġa li kont qed nagħmel," jgħid Garth.

Għalhekk ħaseb f'xi ħaġa li setgħu jaħdmu fuqha t-tnejn li huma. "Ħdimna dgħajsa żgħira u żbajnieha," jgħidilna. "Vera ħadt gost. Hu ma kienx jitkellem bl-Ingliż imma xorta sibna mod kif nikkomunikaw."

Tista' tiskopri iktar stejjer u pariri mingħand il-hosts billi tingħaqad mal-Klabb tal-Hosts ta' fejn għandek il-listing tiegħek. Dawn il-klabbs immexxijja mill-hosts għall-hosts u jtellgħu laqgħat virtwali u wiċċ imb wiċċ, jagħtuk għajnuna matul l-avventura tiegħek int u tilqa' n-nies u tista' tikseb l-iġded aħbarijiet dwar Airbnb u s-servizzi tagħha.

L-іnfоrmаzzјоnі f'dаl‐аrtіklu tаf lаħqеt іnbіdlеt mіnn mеtа ġіе ррubblіkаt.