Linji gwida tas-sigurtà importanti għall-Hosts

Importanti li tkun taf xi problemi bis-sigurtà jistgħu jinqalgħu ħalli taħseb bil-quddiem u tilqa' lill-klijenti bl-iktar mod komdu. Ġbarna ftit pariri biex ngħinuk timxi ma' wħud mill-iktar linji gwida għas-sigurtà komuni. Ara li tkun taf xi jgħidu l-liġijiet, ir-regoli u r-regolamenti tar-reġjun tiegħek u li timxi magħhom kollha.

Għalkemm ħafna klijenti jfittxu listing b'pixxina, il-pixxini huma wkoll riskju għas-sigurtà. Għalkemm dak li teħtieġ eżatt biex ittella' propjetà b'pixxina jiddependi mill-post fejn tinsab il-propjetà, Safe Kids Worldwide tħeġġek tagħmel dawn li ġejjin biex tgħin tħares lilek innifsek u lill-klijenti tiegħek.

Ipprovdi tagħmir tas-sigurtà:

• Għalaq iż-żona tal-pixxina. Ir-reċint għandu jkun mill-inqas 4 piedi għoli u x-xatba għandha tkun tista' tingħalaq waħidha. Ir-reċint għandu jittella' madwar il-pixxina kollha u m'għandu jkun hemm xejn iktar li jkun parti mir-reċint (bħal, ngħidu aħna, parti mid-dar).
• Waħħal l-allarmi mat-twieqi u l-bibien kollha li jagħtu għaż-żona tal-pixxina.
• Waħħal għetien tad-dranaġġ li ma jħallu lil ħadd jeħel fihom u sistemi ta' ħelsien tas-sigurtà. Dawn jistgħu jgħinu jħarsu lil min ikun fil-pixxina mill-periklu li jeħel.
• Ara li jkollok tagħmir tas-salvataġġ. Fost dawn hemm il-bsaten igganċjati, il-lasti biex tilħaq lin-nies fl-ilma, oġġetti tas-salvataġġ li jżommu f'wiċċ l-ilma u l-kaxxi tal-ewwel għajnuna. Nissuġġerulek li twaħħal ukoll telefown bil-linja fissa fiż-żona tal-pixxina.

Agħmel l-ispezzjonijiet ta' rutina int stess:

• Kejjel kemm hu ċar l-ilma u l-bilanċ kimiku tiegħu. Dil-ħaġa għandha ssir kull tant żmien u qabel il-klijenti jagħmlu ċ-checkin.
• Ara li jkun hemm it-tagħmir tas-sigurtà fil-post. Għandek tiċċekkja li hemm dat-tagħmir qabel kull checkin.
• Ħares l-aċċess għaż-żona tal-pixxina. Għandek tagħlaq il-bibien tal-klieb u d-daħliet l-oħra li tfal żgħar jistgħu jgħaddu minnhom jew jaqbużhom.

Aqsam iktar informazzjoni mal-klijenti:

• Ibdel id-dettalji tal-listing tiegħek. Fid-deskrizzjoni tal-listing tiegħek semmi liema tagħmir u faċilitajiet tas-sigurtà tal-pixxina hemm u m'hemmx. Ngħidu aħna, "Għandna l-ġkieket li jgħinuk iżżomm f'wiċċ l-ilma f'daqsijiet għall-kbar u għat-tfal. Il-pixxina m'għandhiex reċint li jagħlaqha mad-dawra kollha għalhekk importanti li żżomm għajnejk fuq it-tfal b'iktar reqqa."
• Itlob lill-klijenti jaqraw l-informazzjoni dwar id-dar. Għandek tagħti l-informazzjoni dwar il-faċilitajiet tas-sigurtà tal-post bħal, ngħidu aħna, l-għata għad-dranaġġ, l-allarmi u l-ħajt jew ix-xatba tal-pixxina. Agħmilha ċara li l-għajnuniet għall-għawm u l-ġugarelli tal-ilma bħall-muscles tal-għawm u l-foam tal-pixxina ma jżommukx milli tegħreq.
• Agħti l-informazzjoni tas-sigurtà. Ħalli fuljett jew xi sinjali qrib il-pixxina bis-suġġerimenti, it-twissijiet u l-kuntatti tal-emerġenza tas-sigurtà kollha. Fakkar lill-klijenti biex jekk ma jkunux jistgħu jsibu lit-tfal, l-ewwel m'għandhom jagħmlu hu li jfittxuhom fil-pixxina. Agħti wkoll l-istruzzjonijiet għas-CPR, iċ-Checklist tas-Sigurtà tal-Pixxina ta' Safe Kids u l-indirizz tal-listing.
• Fakkar lill-klijenti biex jgħassu lill-oħrajn mill-qrib. Dan jiġifieri għandhom dejjem ikunu qrib ta' dawk li ma jafux jgħumu jew li ma jafux jgħumu sew. Għandek issemmi dil-ħaġa fl-informazzjoni dwar id-dar u tħalli dil-informazzjoni qrib il-pixxina.
• Ħalli Karta tal-Għassies tal-Ilma għall-klijenti bl-istruzzjonijiet ta' kif għandhom jużawha. Għassies tal-Ilma huwa adult responsabbli li jaqbel li jżomm għajnejh fuq it-tfal li jkunu fl-ilma mingħajr ma jħalli xejn itellfu.

Għalkemm il-lifts jistgħu jagħmlu l-listing tiegħek iktar komdu u aċċessibbli, jistgħu jkunu wkoll riskju tas-sigurtà. Ikkuntattja lill-awtoritajiet tal-post fejn jinsab il-listing għas-suġġerimenti tagħhom marbutin mas-sigurtà tal-lifts.

Il-Kummissjoni Amerikana għas-Sigurtà tal-Prodotti tissuġġerixxi li l-konsumaturi:

• Ikunu ċerti li l-ispazju bejn il-bibien ma jkunx ikbar minn 4 pulzieri. Jekk mhux ċert/a li kollox kif għandu jkun jew jekk għandek xi tħassib dwar is-sigurtà tal-lift, qiegħed il-lift f'modalità fejn ma jistax jintuża jew agħlaq il-bibien kollha li jagħtu għal-lift. Min iwaħħal il-lift qatt m'għandu jħalli iktar minn 4 pulzieri vojt bejn l-art tal-bini u d-daħla tal-lift.
• Itlob spettur tal-lifts kwalifikat biex jiċċekkja l-lift tad-dar. Għandu jiċċekkja hemmx xi spazji perikolużi, jekk hemmx xi perikli oħra u jekk hux kollox skont ASME A17.1, Il-Kodiċi tas-Sigurtà għal-Lifts u l-Escalators.
• Jiksbu tagħmir tas-sigurtà. L-ispazji jistgħu jsiru iktar siguri billi tqiegħed xi lqugħ fuq wara tal-bieb ta' barra jew billi twaħħal tagħmir tal-għassa elettronika li ma jħallix lil-lift jaħdem meta jinduna b'xi tifel jew tifla fl-ispazju ta' bejn l-art tal-binja u l-lift. Tista' tikkuntattja lill-manifattur tal-lift tiegħek jew lil xi ħadd li jwaħħal il-lifts biex tikseb it-tagħmir tas-sigurtà biex tħares lill-klijenti minn dal-periklu.

Meta ttella' l-ispazju tiegħek fuq Airbnb tkun qed tagħti kelmtek li qed timxi mal-liġijiet u r-regolamenti kollha li obbligat/a timxi magħhom.

Inħeġġu lill-Hosts kollha jwaħħlu allarmi tad-duħħan u tal-monossidu tal-karbonju, li jippruvawhom ta' sikwit u li jiżguraw li d-deskrizzjonijiet tal-listings jkunu aġġornati.

• Ara xi jgħidu r-regolamenti tal-post fejn jinsab il-listing. Jaf teħtieġ iktar minn allarm tad-duħħan u allarm tal-monossidu tal-karbonju wieħed li jaħdem fil-post tiegħek. Xi bliet jitolbuk li jkollok wieħed f'kull kamra.
• Itlob allarm. Il-Hosts eliġibbli b'listing attiv jistgħu jiksbu allarm bla ħlas li jaħdem bil-batterija u li jagħmilha kemm ta' allarm tad-duħħan kif ukoll ta' allarm tal-monoissidu tal-karbonju. Dal-programm għandu r-regoli u l-kundizzjonijiet tiegħu.
• Aġġorna l-listing tiegħek. Il-klijenti jistgħu jiffiltraw ir-riżultati tat-tiftix tagħhom biex jintwerew biss spazji li għandhom allarmi tal-monossidu tal-karbonju. Fit-taqsima tat-tagħmir tas-sigurtà tal-paġna Sigurtà tal-Klijenti, żid id-dettalji dwar l-allarmi li waħħalt.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.