Pariri mingħand is-Superhosts dwar kif tilqa' klijenti LGBTQ+

Kull xahar qed naqsmu l-aħħar aġġornamenti tal-Bord Konsultattiv tal-Hosts u qed ngħinuk issir taf lill-membri tal-bord.

Hello lil kulħadd,

Jien Peter Kwan, Superhost ġewwa San Francisco u membru tal-Bord Konsultattiv tal-Hosts. Ili minn mindu sirt Host, qed ngħidu kważi 10 snin ilu, naqbeż għad-drittijiet tal-komunità tal-Hosts—inkluż għall-gruppi li ħafna drabi jisfaw imwarrba fis-soċjetà bħax-xjuħ u l-membri tal-komunità LGBTQ+.

Fl-okkazjoni tal-Pride, jien ħadt sehem fl-avveniment ta' Airbnb "Possibbli grazzi għall-Hosts (Queer)" iktar kmieni dax-xahar. Kienet diskussjoni ħajja ma' grupp fost l-iktar Hosts queer ta' suċċess dwar kif aħna, bħala Hosts LGBTQ+, nagħtu sehemna biex Airbnb tirnexxi fil-missjoni tagħna li kulħadd ikun jista' jħossu d-dar kullimkien.

Hawn taħt tista' ssir taf x'tista' tagħmel biex tgħin lill-klijenti LGBTQ+ iħossuhom iktar siguri fl-ispazju tiegħek kif ukoll tiskopri x'tgħallimt jien mill-ħidma tiegħi mal-komunità tal-ospitalità lokali.

Inħeġġeġ lill-Hosts biex, b'kull mod li jħossuhom komdi jagħmlu hekk, jgħidu li darhom hija post sigur għall-klijenti LGBTQ+ fid-desktrizzjoni tal-listing. Ġewwa San Francisco ħadd ma jagħti kas jekk koppji tal-istess sess iżommu jdejn xulxin huma u mexjin fit-triq. Imma għal ħafna klijenti li jiġu minn pajjiżi b'regoli jew normi differenti, tkun ta' għajnuna li tispjegalhom kif jaħdmu l-affarijiet fil-post fejn jinsab il-listing tiegħek.

Jekk Host, minbarra li jgħarraf lill-klijenti li se jkunu f'belt sigura, jgħarrafhom ukoll li se jkunu f'dar sigura, dil-ħaġa tista' tagħmel differenza kbira biex isserraħ moħħ il-klijenti. Qabel jidħlu fil-post, il-klijenti għandhom ikunu jafu li se jkunu milqugħa flimkien mas-sieħeb jew sieħba tal-istess sess tagħhom skont il-missjoni "darek, tkun fejn tkun" ta' Airbnb.

Naf b'Hosts LGBTQ+ ġewwa San Francisco li għandhom ritratt bil-bandiera tal-qawsalla fuq il-listing tagħhom, f'waħda mill-irkejjen tar-ritratt, u d-deskrizzjoni tagħhom issemmi l-identità tagħhom u t-tip ta' attiviżmu li kienu involuti fih.

Tista' tagħmel affarijiet oħra biex tgħin lill-klijenti LGBTQ+ iħossuhom iktar milqugħa mal-wasla tagħhom, bħal li toffrilhom gwidi għall-belt maħsuba għall-komunità LGBTQ+ u kotba dwar l-istorja tal-istess komunità. Dil-ħaġa tagħmel differenza kbira biex tgħin lill-klijenti jħossuhom milqugħa.

Wara li sirt Host, bdejt nifhem li m'hemmx ħafna postijiet minn fejn stajt insib it-tweġibiet għall-mistoqsijiet kollha tiegħi.

Fl-2012 bdejt grupp bil-għan li ngħin lill-komunità tal-Hosts u minn dak iż-żmien bqajna niltaqgħu kull xahar.

Il-ħidma tal-Hosts kultant taf tkun xi ħaġa li ġġiegħlek tħossok maqtugħ mill-oħrajn għalhekk il-parir tiegħi għall-Hosts il-ġodda huwa li jingħaqdu ma' Klabb tal-Hosts—u jekk għad m'hemmx wieħed fiż-żona tagħhom, jiftħu wieħed huma. Minflok titgħallem kif issir Host mill-aqwa mill-iżbalji, tista' titgħallem mingħand l-esperjenzi tal-oħrajn—u fl-istess waqt tista' tibni ħbiberiji mill-aqwa.

Il-fatt li ngħin Hosts oħra hija xi ħaġa li tagħtini sodisfazzjoni, kemm għax ngħinhom jifhmu l-affarijiet bażiċi ta' kif tilqa' n-nies—bħal kif jużaw il-pjattaforma—kif ukoll għax għal-laqgħat tal-Klabb tal-Hosts nistieden lill-membri tat-tim ta' Airbnb biex jispjegaw kif jaħdmu s-servizzi l-ġodda u biex ifehmu lill-Hosts dwar il-bidliet fil-liġijiet.

Normalment in-nies ta' età ikbar mhux grupp li jiġik f'moħħok meta nitkellmu dwar l-inklussività u d-diversità fost il-komunità tal-Hosts—imma importanti ħafna li ma ninsewhomx.

Skoprejt li fuq Airbnb, in-nies ta' età ikbar huma wieħed fost l-iktar gruppi ta' Hosts li ġewwa l-Istati Uniti n-numru tagħhom qed jikber malajr u l-aħjar reviews ġewwa l-Istati Uniti s-soltu jinkisbu min-nisa ta' ċerta età.*

Waħda mill-affarijiet li nixtieq nagħmel bħala membru tal-Bord Konsultattiv tal-Hosts hija li ngħin lill-Hosts ta' ċerta età jiksbu iktar prominenza filwaqt li niżgura li meta Airbnb toħloq servizz ġdid, jaħsbu fina wkoll.

Waħda mill-iktar affarijiet li kburi biha hija l-grupp żgħir li ħloqt għall-Hosts ta' ċerta età bl-isem ta' Golden Hosts. Il-grupp miftuħ għal kull min bħali huwa membru tal-American Association of Retired Persons (AARP).

Il-grupp Golden Hosts qed jikber u llum inqis il-membri tiegħu bħala wħud mill-iktar membri tal-komunità tal-Hosts li nħoss rabta magħhom. Qabel il-COVID, darba fix-xahar kulħadd kien isajjar xi ħaġa u konna niltaqgħu għand xi ħadd minna biex nieklu flimkien. Vera konna nieħdu gost.

Fil-klabb, il-membri ta' età ikbar tagħna jitgħallmu mingħand xulxin dwar kif tilqa' n-nies. Bħala kull grupp ieħor, jaf ikun hemm xi nies li jitgħallmu dwar it-teknoloġija u l-affarijiet diġitali iktar malajr u jaf ikun hemm oħrajn li jkollhom bżonn ftit iktar taħriġ u għajnuna biex jitgħallmu.

• F'Mejju ħadna sehem fl-Airbnb Global Host Tours fejn qsamna iktar informazzjoni dwar l-entitajiet li rċevew għotjiet mingħand il-Fond tal-Komunità fiż-żoni tagħna
• Iddiskutejna inizzjattivi dwar id-diversità u l-appartenenza, bħal pereżempju l-politiki tal-aċċessibbiltà
• Qsamna l-ħsibijiet tagħna biex intejbu l-Għajnuna lill-Komunità, bħal suġġerimenti fuq kif jista' jitjieb iċ-Ċentru tal-Għajnuna ta' Airbnb

Sir af iktar dwar il-ħidma li kien qed jagħmel il-Bord Konsultattiv tal-Hosts u ħejji ruħek għall-aġġornamenti u l-pariri ta' kull xahar mingħand il-membri tal-bord.

*Skont ir-rapport "Airbnb's Growing Community of 60+ Women Hosts" ta' Airbnb