Kif tuża l-faċilitajiet kollha li tagħtik it-tab Messaġġi

It-tab Messaġġi hija l-inbox ta' Airbnb tiegħek. Fiha ssib il-messaġġi mingħand in-nies li qed tilqa', mingħand il-hosts u mingħand it-tim tal-għajnuna. Il-faċilitajiet ta' Messaġġi jgħinuk biex:

• Tiffiltra l-messaġġi u tfittex fl-inbox tiegħek.
• Tibgħat u tħejji l-messaġġi fosthom il-mudelli miktuba minn qabel magħrufa bħala t-tweġibiet ta' malajr.
• Tikkomunika ma' kull klijent f'booking minn taħdita waħda.
• Tuża t-tweġibiet meħjuta biex iżżomm it-taħditiet organizzati.
• Tibdel u treġġa' lura l-messaġġi li tkun bgħatt.
• Tuża l-irċevuti tal-qari biex tifhem meta l-klijenti jkunu fetħu l-messaġġi li tkun bgħattilhom.
• Tirreaġixxi għall-messaġġi bl-emoji.

L-għażla standard hi li Messaġġi turik il-messaġġi kollha li għandek fuq Airbnb. Agħżel Ospitalità, Vjaġġi jew Tim tal-Għajnuna biex tiffiltra skont ix-xorta ta' messaġġ.

Għal Ospitalità tista' tuża wkoll dawn il-filtri li ġejjin:

• Mhux moqrija jurik il-messaġġi mhux miftuħa biss.
• Stadju tal-vjaġġ jurik il-messaġġi skont it-talbiet tal-bookings, il-bookings mistennija, il-bookings li tkun qed tilqa' dak il-ħin jew il-bookings tal-imgħoddi.
• Listings jurik il-messaġġi listing b'listing jekk għandek iktar minn listing wieħed.
• Stellati jurik biss il-messaġġi li mmarkajt bi stilla.

Jekk għandek co-host, int Ambaxxatur Superhost jew torganizza Esperjenza ta' Airbnb, fit-tab Messaġġi se ssib dal-filtri wkoll:

• Co-Host jurik it-taħditiet bejnek u bejn il-co-hosts l-oħra ta' listing.
• Ambaxxatur Superhost jurik il-messaġġi bejnek u bejn il-hosts li laqqajniek magħhom.
• Esperjenzi jurik il-messaġġi marbuta mal-bookings tal-Esperjenzi.

Uża l-filtru Vjaġġi biex issib il-messaġġi li tibgħat u tirċievi meta l-vjaġġatur tkun int. Uża l-filtru Għajnuna biex issib it-taħditiet mal-Għajnuna ta' Airbnb.

Qed tfittex xi taħdita partikolari? Tista' tfittex il-messaġġi b'isem, b'kelma jew frażi. Biex ngħinuk issib it-taħditiet iktar malajr, ir-riżultati tat-tiftix iqisu l-filtri li tkun għażilt.

Tweġibiet ċari fil-ħin huma importanti biex tirnexxi bħala host. Ibda t-taħditiet, agħti l-informazzjoni u wieġeb il-mistoqsijiet tal-klijenti mit-tab Messaġġi.

Ipprova l-faċilità tat-tweġibiet ta' malajr biex tiffranka l-ħin. It-tweġibiet ta' malajr huma mudelli li fihom it-tweġibiet għall-informazzjoni li tibgħat ta' sikwit u għalhekk ma jkollok tikteb kollox mill-bidu kull darba. Għandek issib ftit tweġibiet miktuba minn qabel fit-tab Messaġġi biex ngħinuk tgħin lill-klijenti fl-iktar waqtijiet importanti bħal eżatt wara li jibbukkjaw. Tista' tuża dat-tweġibiet ta' malajr kif ktibniehom aħna, taddattahom għalik jew toħloq mudelli ġodda għalik.

It-tab Messaġġi tuża l-intelliġenza artifiċjali biex tifhem il-mistoqsijiet tal-klijenti u tissuġġerilek tweġiba ta' malajr bħala tweġiba awtomatikament. It-tweġiba suġġerita tintwera fit-taħdita tiegħek mal-klijent u tintwera lilek biss.

Se tkun tista' tiċċekkjaha, tibdilha u tibgħatha minnufih jew tagħżel li tibgħatha iktar tard. Meta tibgħat il-messaġġ, il-varjabbli li ssib fil-mudelli se jinbidlu awtomatikament f'xi dettalji tal-booking u tal-listing—bħall-post fejn jinsab, isem il-klijent u l-ħin taċ-checkin. Ara li d-dettalji tal-listing tiegħek ikunu mimlijin u aġġornati għax il-messaġġi bil-varjabbli li m'għandhom l-ebda dettalji marbuta magħhom ma jintbagħtux sew.

Meta messaġġ skedat ikun wasal biex jintbagħat, se nuruk tfakkira fit-taħdita mal-klijent. Jekk il-messaġġ jagħti xi informazzjoni li diġà tajt tista' tagħżel li tibdlu jew taqbżu.

Sir af iktar kif tista' tuża t-tweġibiet ta' malajr biex tiffranka l-ħin

Niftħulek taħdita ġdida fit-tab Messaġġi għal kull booking.

Il-klijent li jibbukkja jista' jistieden il-vjaġġaturi adulti tal-grupp l-oħra biex jingħaqdu mal-booking. Aħna nżidu lill-vjaġġaturi li jilqgħu l-istedina mat-taħdita u l-messaġġi li tibgħat jintbagħatu lill-grupp kollu. Il-vjaġġaturi se jkunu jistgħu jaqraw il-messaġġi kollha—anki jekk jingħaqdu iktar tard—biex ma jkollokx għalfejn toqgħod tirrepeti dak li diġà ktibt.

Għal iktar informazzjoni dwar il-booking u t-taħdita, fosthom għal-lista ta' kull persuna fil-grupp, agħfas fuq il-buttuna Dettalji. Agħfas fuq ir-ritratt tal-profil tal-klijent li tixtieq tiftaħ il-profil tiegħu u sir af iktar lill-persuna li tkun se tilqa'.

Se ssib li għandek iktar faċilitajiet, fosthom it-tweġibiet meħjuta, l-għodod tal-bidliet, l-irċevuti tal-qari u l-emojis, biex tieħu ħsieb it-taħditiet mit-tab Messaġġi.

• Tweġibiet meħjuta tħallik twieġeb messaġġ partikolari f'konverżazzjoni u it-tweġiba tiegħek tintwera taħt il-messaġġ oriġinali.
• Għodod għall-bidliet fil-messaġġi tħallik tibdel messaġġ sa kwarta wara li tibgħatu u treġġa' lura messaġġ sa 24 siegħa wara li tkun bgħattu.
• Irċevuti tal-qari turik jekk il-klijenti jew dawk l-oħra kollha li bgħattilhom messaġġ fetħux il-messaġġi li bgħattilhom (sakemm ma jkunux tfew dil-faċilità mis-settings tal-kont tagħhom).
• Emojis tħallik tibgħat reazzjoni għal messaġġ b'wiċċ imbissem, qalb, sebgħa 'l fuq, idejn iċapċpu jew wiċċ daħkan.

L-іnfоrmаzzјоnі f'dаl‐аrtіklu јаf lаħqеt іnbіdlеt mіnn mеtа ġіе ррubblіkаt.