Is-sigrieti ta' Superhost ta' esperjenza

Meta fl-2014 nedejna l-programm tas-Superhosts, Nikki kienet waħda mill-ewwel Hosts ta' Airbnb li kisbet l-istatus ta' Superhost. Hija żammet dal-istatus għal iktar minn 16-il darba wara xulxin.

X'inhu s-sigriet ta' Nikki? Nikki bdiet bil-mod billi tilqa' n-nies f'cottage żgħira ħafna fil-bitħa tad-dar tagħha ġewwa San Francisco. Dak il-listing tant mar tajjeb li ħajjarha tibda tikri d-dar bi tlett ikmamar tas-sodda tagħha waqt li l-familja kienet qed tqatta' l-btajjel xi mkien ieħor.

Hawnhekk Nikki taqsam is-sigrieti tagħha ta' kif tirnexxi bħala Superhost.

"Sitt snin ilu għamilt l-ewwel booking tiegħi ma' Airbnb ġewwa Provence, Franza—u l-esperjenza għoġbitni ħafna. Kien appartament studio żgħir ħafna ġewwa l-belt antika ta' Aix. Kien fih dak kollu li kellna bżonn imma kien jinħass li l-Hosts ma tantx għamlu sforz biex jagħmluh speċjali. Ħsibt ftit u wasalt għall-konklużjoni li kieku kelli ninvesti ftit flus fil-guesthouse żgħira ta' madwar 19-il metru kwadru li għandi fil-bitħa, jirnexxieli nibdilha f'post speċjali ħafna. Assumejt li ma kienx se jkolli bookings frekwenti imma meta ġiet ibbukkjata minnufih għal ġimgħa sħiħa ma ridtx nemmen lil għajnejja."

"Kull darba li ntella' listing ġdid, sakemm nikseb mill-inqas tliet reviews, nitlob prezz li jkun bejn 50% u 70% tal-prezz tas-suq (jew sakemm tant inkun qed nirċievi talbiet għall-booking li nkun nista' nżid il-prezz sal-prezz tas-suq). Nagħmel hekk biex l-ewwel nett inkun nista' nifhem x'għandi nirranġa mingħajr ma nitlef ir-reviews tajbin u t-tieni nett għax fil-bidu importanti li tikseb numru ta' reviews biex il-listing tiegħek jintwera f'pożizzjoni ogħla fir-riżultati tat-tiftix."

"Kollox jibda minn spazju mħejji sew. Għandu jkun nadif. Nippreferi spazji miftuħa u arjużi. Mingħajr ħafna affarijiet imma bi ftit punti li jiġbdu l-għajn. Għandu jkun ukoll komdu, speċjalment is-sodod. Dejjem ninvesti f'saqqijiet tal-memory foam u lill-klijenti jogħġbuhom ħafna. Trid tipprova tifhem lill-klijenti. Trid iddur dawra mal-ispazju tiegħek u taħseb ftit kif il-klijenti jistgħu jużawh imbagħad tibni d-disinn skont dik l-istampa li tkun bnejt f'moħħok."

"Ritratti tajbin jagħmlu differenza kbira. Ma tagħmilx sens li ma jkollokx ritratti professjonali. Naħseb ftit dwar x'tip ta' spazju huwa—jekk hux spazju adattat għall-familji jew jekk hux iktar maħsub għal tip ta' vjaġġatur partikolari—u nsemmi dik il-ħaġa fl-isem tal-listing. Ikteb deskrizzjoni tajba ħafna, b'mod dettaljat imma fl-istess ħin li tilqgħek biex b'hekk tħajjar lil min qed jaqraha biex jibbukkja l-listing. Iddeskrivi s-sodod, il-lożor u d-ditti tas-sapun jew il-kumditajiet l-oħra li toffri."

"Fil-listing tiegħek ara li ssemmi dawk l-affarijiet tal-propjetà tiegħek li l-klijenti ma jkunux qed jistennewhom. Spjegahom b'mod ċar u onest u mingħajr ma taqta' qalb in-nies milli jibbukkjaw. Għandek tkun ġenwin biżżejjed biex tgħin lill-klijenti tiegħek jagħżlu l-propjetà li verament jixtiequ."

"Għalija, il-komunikazzjoni tajba hija l-iktar regola importanti meta tiġi biex tilqa' n-nies. Il-komunikazzjoni mal-klijenti tibda mal-ewwel mistoqsija. Wara li nirċievi talba mingħand il-klijenti li jkunu qed jaħsbu biex jibbukkjaw miegħi, dejjem nistaqsihom ftit mistoqsijiet—mhux biex nindaħal imma biex nifhem jekk il-listing tiegħi jgħoddx għalihom. Minn hemm jibda l-proċess li tikseb review ta' 5 stilel."

"L-ikbar sorpriża għalija kienet li nirrealizza kemm kienu tal-ġenn il-klijenti. In-nies kienu verament onesti, dħulin u wrew ħafna empatija. U fejn jidħlu l-flus, id-dħul kien sorpriża sabiħa. Ma bdejtx nilqa' n-nies bil-ħsieb li ndaħħal daqshekk flus, wisq inqas li dil-ħaġa ssir il-karriera tiegħi. Iffukajt fuq l-affarijiet li nħobb l-iktar fuq il-fatt li nilqa' n-nies u fejn kien hemm opportunità, ma ddejjaqtx nidħlilha. Illum nista' ngħid li kienet għażla tajba ħafna."