Kif tirranġa r-ritratti tal-listing tiegħek biex iservu bħala dawra mad-dar

Jagħżlu, jqallbu, jibbukkjaw. Mhux hekk tixtieq li jagħmlu l-vjaġġaturi meta l-listing tiegħek jintwera fir-riżultati tat-tiftix? Ħafna drabi tista' tikkonvinċihom jibbukkjaw miegħek—jew għallinqas ikomplu jaraw il-listing tiegħek—bir-ritratti li ttella' għall-ispazju tiegħek.

Minbarra li tieħu ritratti mill-aqwa tal-listing u tagħżel l-aħjar ritratti biex tippubblikahom, x'tista' tagħmel biex tħajjar lin-nies jibbukkjaw il-listing tiegħek? Ipprova uża l-gallerija tar-ritratti biex tagħti dawra mad-dar virtwali.

Il-gallerija tar-ritratti tiegħek magħmula mir-ritratti kollha li tellajt għal-listing tiegħek. Fuq skrin iżgħar bħal dawk tal-ismartphones, il-klijenti jistgħu jqallbu l-gallerija tar-ritratti tiegħek billi jagħfsu fuq ir-ritratt tal-qoxra li jinsab waħdu fuq in-naħa ta' fuq tal-paġna tal-listing tiegħek.

Fuq skrins ikbar bħal tat-tablets u tal-laptops, minflok ritratt tal-qoxra wieħed se jkun hemm sett ta' 5 ritratti biex il-klijenti jkunu jistgħu jifhmu aħjar dak li jagħmel il-post tiegħek interessanti. Biex iqallbu l-bqija tal-gallerija u jaraw ir-ritratti bħala grupp, organizzati għat-tul, kulma jridu jagħmlu huwa li jagħfsu fuq ritratt minnhom.

Tista' torganizza dal-grupp ikbar skont kamra jew żona tal-ispazju tiegħek. F'moħħok immaġina li qed iddawwar lil klijenti mad-dar tiegħek b'mod virtwali—biex il-klijenti jkollhom l-opportunità li jaraw kull rokna tal-ispazju tiegħek qabel jibbukkjawh.

Ibda billi tara li tellajt ritratti ċari u b'dawl tajjeb għal kull kamra u żona tal-post tiegħek li huma disponibbli għall-klijenti. Sarah, Superhost minn Sayulita, il-Messiku, tissuġġerixxi li ttella' "mill-inqas 2 ritratti ta' kull kamra tas-sodda, meħudin minn irkejjen differenti, biex il-klijenti jkunu jistgħu jaraw jekk hemmx xi gwardarobba, skrivanija jew affarijiet oħra."

Imbagħad, jekk m'għamiltx hekk diġà, żid ftit ritratti tal-kumditajiet speċjali u xi dettalji oħra. Dawn jistgħu jkunu kċina mgħammra tajjeb, uffiċju b'bieb jew kamra fejn it-tfal jistgħu jilgħabu mgħammra b'kollox.

Ir-ritratti tal-faċilitajiet ta' aċċessibbiltà bħal pereżempju daħla mingħajr għetiebi jew bibien wisgħin jistgħu jagħtu informazzjoni utli wkoll. Il-klijenti normalment ikunu jixtiequ jaraw għaliex l-ispazju tiegħek huwa uniku u post mill-aqwa fejn joqogħdu.

Wara li tikkuntenta ruħek bil-gallerija tar-ritratti tiegħek se tkun tista' torganizzaha f'dawra mad-dar virtwali. Aġġorna l-listing tiegħek b'dawn iż-żewġ passi ħfief:

1. Mid-dettalji tal-listing, agħżel Propjetà u kmamar imbagħad niżżel il-paġna 'l isfel biex teditja Kmamar u spazji.
2. Għandek issib lista ta' kmamar jew żoni li jistgħu jużaw il-klijenti. (Biex iżżid jew tneħħi l-kmamar, agħfas fuq Editja l-kmamar u l-ispazji.) Agħżel kamra mil-listing imbagħad agħfas il-buttuna Żid ir-ritratti u agħżel ir-ritratti ta' dil-kamra mill-gallerija tar-ritratti. Agħmel l-istess ħaġa għal kull kamra.

Meta torganizza kull ritratt fil-gallerija tar-ritratti tiegħek skont il-kmamar jew iż-żoni, tkun qed toħloq dawra faċli mad-dar tiegħek li tħajjar lill-klijenti jarawha. Mhux problema jekk ikollok xi ftit ritratti li ma jsibu posthom imkien—dawn imorru awtomatikament fit-taqsima Iktar Ritratti fi tmiem id-dawra mad-dar. Biex tevita li tfixkel lill-klijenti, ara biss li dawn ir-ritratti verament m'għandhom posthom imkien ieħor.

Wara li taġġorna l-listing tiegħek, il-gallerija se tibda tintwera organizzata skont il-kmamar jew iż-żoni. Il-klijenti jiksbu ħarsa ġenerali lejn il-propjetà li biha jkunu jistgħu jiskopru żona b'żona jew jagħtu ħarsa lejn il-dawra mad-dar kollha. Id-dawra mad-dar normalment tibda mis-salott, imbagħad tmur għall-kċina, għall-kmamar tas-sodda, għall-kmamar tal-banju, għaż-żoni fuq barra u tintemm bl-ispazji l-oħra li għandek fil-listing tiegħek.

Importanti żżomm f'moħħok li meta torganizza l-gallerija tar-ritratti tiegħek skont il-kmamar jew skont iż-żoni, dil-ħaġa mhix se taffettwa r-ritratt tal-qoxra jew il-ġabra ta' 5 ritratti li jintwerew fin-naħa ta' fuq tal-listing tiegħek. Meta torganizza l-gallerija tar-ritratti tiegħek tkun qed tgħin biex dawk il-klijenti kurjużi jkollhom l-informazzjoni meħtieġa biex jibbukkjaw żjara miegħek b'moħħhom mistrieħ.