X'inhu l-Booking Immedjat

Il-Booking Immedjat iħalli lill-klijenti jibbukkjaw id-dar tiegħek minnufih għad-dati disponibbli biex ma jkollokx għalfejn tirrevedi u taċċetta t-talbiet għall-booking waħda waħda. Il-klijenti jippreferu jekk ikunu jistgħu jużaw il-Booking Immedjat u ħafna Hosts jgħidulna li mhux talli l-Booking Immedjat huwa għodda komda, imma twassal ukoll għal dħul ikbar.

Biex il-Booking Immedjat jaħdem kif suppost, importanti ħafna li żżommil-kalendarju tiegħek aġġornat. Jekk il-kalendarju tiegħek ma jkunx aġġornat tista' tikseb bookings mhux mistennija jew tispiċċa tikkanċella booking minħabba li diġà jkollok booking ieħor u għalhekk taf teħel tariffa ta' kanċellazjoni. Biex dejjem iżżomm il-kalendarju tiegħek aġġornat, nissuġġerulek tissinkronizzah mal-kalendarju ewlieni tiegħek (iCal, Google, eċċ.).

Għall-bidu xi Hosts jafu ma jħossuhomx komdi jużaw il-Booking Immedjat għax jibżgħu li mhux se jkollhom biżżejjed informazzjoni dwar il-klijenti li jixtiequ jibbukkjaw magħhom. Biex il-klijenti jkunu jistgħu jużaw il-Booking Immedjat, iridu jkollhom ir-rekwiżiti tal-klijenti kollha u għandhom jaqblu mar-regoli tad-dar tiegħek.

Fir-rekwiżiti tiegħek tista' titlob li l-klijenti jkollhom aċċess għall-Booking Immedjat biss jekk ikunu diġà temmew xi żjarat mingħajr problemi—jiġifieri li kellhom mill-inqas booking wieħed u ma kisbu l-ebda review ħażina—u għall-klijenti li jkunu għaddew mill-proċess tal-verifika tal-identità dettaljat ta' Airbnb.

Il-verifika tal-identità issa qed titwettaq għall-klijenti kollha li qed jibbukkjaw fl-iktar 35 pajjiż popolari magħna, ċioè għal madwar 90% tal-bookings kollha li jsiru fuq Airbnb. Fil-bidu tal-2023 se nkunu qed inwessgħu dil-verifika għall-bookings li jsiru madwar id-dinja kollha. Jekk għal xi raġuni jeħtieġlek titlob dokument tal-identità maħruġ minn gvern—kemm raġunijiet personali kif ukoll jekk għandek tagħmel hekk bil-liġi tal-post fejn jinsab il-listing—tista' titlob dad-dokument mingħand il-klijenti permezz ta' messaġġ mill-inbox tal-ospitalità tiegħek.

Anke bil-Booking Immedjat mixgħul, f'ċerti każijiet xorta tista' tirċievi talbiet għall-bookings mill-klijenti. Dan jista' jiġri f'każ li tkun ilek daqsxejn ma taġġorna l-kalendarju tiegħek jew għax dal-aħħar tkun ikkanċellajt xi booking. Il-klijenti li ma jkollhomx il-kriterji tiegħek biex jibbukkjaw immedjatament jistgħu jibagħtulek huma wkoll it-talbiet għall-booking. Għal kull talba li tirċievi jeħtieġlek twieġeb fi żmien 24 siegħa billi taċċetta jew tirrifjuta l-booking jew inkella billi twieġeb lill-klijenti li jixtiequ jibbukkjaw il-post tiegħek.

Minkejja l-benefiċċji tal-Booking Immedjat, xi Hosts iħossuhom iktar komdi jitolbu t-talbiet għall-bookings għax:

• Huma joffru biss żjarat itwal. Annie, Host ġewwa Sonoma, California tuża t-talbiet għall-bookings għaliex toffri biss żjarat ta' 30 jum jew aktar u għalhekk jeħtiġilha timxi mar-regolamenti tal-ospitalità fiż-żona tagħha. "Nixtieq nuża l-Booking Immedjat, imma hemm ħafna iktar affarijiet xi tqis meta tkun qed tilqa' lil xi ħadd għandek għal żmien daqshekk twil," tgħid.
• Għandhom ħtiġijiet personali uniċi. Nichola, Host ġewwa Guelph, il-Kanada għandha allerġija li teħtieġha żżomm l-ispazju tagħha mingħajr fwejjaħ, għalhekk tuża t-talbiet għall-bookings biex tiżgura li l-klijenti jkunu lesti li jaqblu mar-regoli tad-dar mhux tas-soltu tagħha. "Il-prodotti bil-fwejjaħ iqabbduni emigranji għalhekk irrid niżgura li l-klijenti tiegħi jkunu nies li jifhmu l-allerġiji għall-fwejjaħ," tgħid.
• L-ispazju tagħhom għandu karatteristiċi jew sfidi speċjali. Eżempji jistgħu jinkludu kamra privata f'dar li jkun fiha l-pets jew it-tfal jew spazju fuq stil qadim ħafna li jista' ma jkunx aċċessibbli għal ċerti klijenti. It-talbiet għall-bookings jistgħu jkunu għażla tajba biex tiżgura li l-klijenti jkunu konxji tal-aspetti uniċi kollha tad-dar tiegħek qabel iż-żjara tagħhom.

Jekk tagħżilx li tuża l-Booking Immedjat jew le jiddependi minnek, iżda ftakar li l-affidabbiltà hija parti importanti minn li tkun Host mill-aqwa. Oqgħod attent/a għall-politiki ta' kanċellazzjoni għall-Hosts ta' Airbnb u sakemm tista', ipprova evita li tikkanċella booking.

Biss, jekk tuża l-Booking Immedjat u wara li jidħol booking ma tħossokx komdu/a (pereżempju jekk il-klijenti li bbukkjaw miegħek qed jistaqsuk jekk jistgħux jiksru r-regoli tad-dar tiegħek), tista' tikkanċella booking mingħajr penali billi tuża l-għodda ta' kanċellazzjoni onlajn sa tliet darbiet kull sena.

Żomm f'moħħok li qatt ma tista' tikkanċella għal xi raġuni li tmur kontra l-politika ta' nondiskriminazzjoni ta' Airbnb. U jekk tikkanċella booking, dan ifisser li l-Booking Immedjat jaf mhux tajjeb għalik bħalissa, għalhekk Airbnb tista' tibgħat talbiet għall-booking minflok għall-ftit bookings li ġejjin.