Dettalji maħsuba maħbuba mill-klijenti

Tixtieq toħloq esperjenza mill-isbaħ għall-klijenti tiegħek? Mhemmx għalfejn ikollok spazju super lussuż jew l-aħħar kumditajiet. Minflok, nissuġġerulek li tagħmel affarijiet żgħar li jistgħu jħallu impatt kbir, bħal li tħallilhom il-kafè lokali favorit tiegħek jew xi messaġġ ta' merħba li tkun ktibtilhom int stess. Hawnhekk, il-Hosts jaqsmu xi ideat sempliċi li ma jqumux ħafna flus biex il-klijenti jkollhom żjara li jibqgħu jiftakruha.

Il-klijenti ta' spiss jaslu għajjenin u ftit mitlufa. Tihom merħba xierqa malli jidħlu fil-post.

• Ħejji qoffa ta' merħba. "Jien inħejji qoffa bil-ħafur (oatmeal) li lest biex iżżidlu l-ilma jagħli, PowerBars, lewż, gallettini u popcorn tal-microwave biex nagħtihom lill-klijenti f'każ li jkunu ġejjin għandi wara titjira twila u ma jkollhomx aptit joħorġu jixtru l-ikel mill-ewwel." —Carrie, New York City
• Ikteb messaġġ personalizzat. "Waħda mill-affarijiet li l-klijenti japprezzaw hija kartolina b'messaġġ personalizzat. Nuża kartolina mfassla minn disinjaturi żgħar bit-tema tal-belt tiegħi, São Paulo." —Priscilla u Gabriel, São Paulo
• Ħejji post għall-bagalja tagħhom. "Għandi xkaffa għall-bagalji ħdejn kull sodda. Insibha komda li faċli taħbihom waqt li nkun qed innaddaf jew jekk xi ħadd ikun irid iktar spazju." —Allison, Traverse City, Michigan

Ladarba jkollok kwantità kbira ta' kumditajiet essenzjali, użahom biex toffri ospitalità aħjar.

• Ara li jkollok iktar milli teħtieġ. "Jien nara li jkun hemm ħafna iktar xugamani, bjankerija tas-sodda, sapun u xampù milli jkun meħtieġ." —Susan, Covington, Georgia
• Offri iktar oġġetti għall-indafa personali. "Jien noffri lill-klijenti wipes tal-makeup professjonali." — Beverlee u Suzie, Oakland, California (Minbarra li l-klijenti japprezzawhom, jistgħu jgħinuk tevita li l-lożor u x-xugamenti tiegħek jitniġġsu b'tinġis li jtik battikata biex tneħħih!)
• Tejjeb il-livell tal-kamra tal-banju tiegħek. "Jien nitwi l-parti t'isfel tat-toilet paper. Xejn ta' barra minn hawn imma jgħin biex il-kamra tal-banju tinħass nadifa u turi li qed tagħti kas tad-dettalji ż-żgħar." —Emma-Kate, San Francisco
• Żid xi ħaġa lussuża. "Jien noffri ġagagi tal-banju bojod u komdi. Il-klijenti jużawhom meta jużaw l-ispa jew bħala ħwejjeġ komdi biex jirrilassaw." —Linda, La Quinta, California

Parti mill-eċitament tal-vjaġġi huwa li tiskopri t-togħmiet, l-irwejjaħ, il-veduti u t-tessuti uniċi tal-post li tkun qed iżżur. Aqsam xi wħud mill-favoriti tiegħek mal-klijenti.

• Agħmel l-esperjenza tal-kolazzjon waħda li jibqgħu jiftakruha. "Għall-kolazzjon jien noffri rigal żgħir reġjonali, skont l-istaġun—għasel speċjali u rari taż-żnuber li ġej mingħand il-bdiewa tal-muntanji, ġobon lokali jew meraq tal-frott u frott mingħand il-bdiewa li jinsabu ftit irħula 'l bogħod" —Claudia, il-Foresta s-Sewda, il-Ġermanja
• Żomm quddiem għajnejk l-istampa kollha. "Ninsab ġewwa Portland allura rrid li l-klijenti jħossuhom li jinsabu ġewwa Portland f'kull ħaġa li jagħmlu. Din hi Airbnb! Jiena noffri birer artiġjanali lokali, fjuri mill-ġnien tiegħi, ħafna kotba dwar il-belt, snack bars organiċi tal-post u abbonata mal-gazzetta Oregonian biex titwassal lill-klijenti ta' kuljum. Nixtri wkoll rivisti tal-post. Kafè tajjeb ta' Portland huwa kruċjali; u xarba magħmula nofsha mill-ħalib u nofsha mill-krema wkoll." —Lisa, Portland, Oregon
  
• Ippersonalizza l-esperjenza. "Jekk il-klijenti jkunu qed jiċċelebraw għeluq snin xi ħadd minnhom, inħallihom ftit cupcakes tal-post." —Tiffany, Hollywood Beach, California
• Agħtihom tifkira żgħira. "Jien inħallilhom kartolina minn xi stabbiliment tal-post jew punt ta' interess popolari biex il-klijenti jżommuha jew jibagħtuha lill-familja." Debi, Thousand Oaks, California

Kumditajiet utli jistgħu jagħmlu d-differenza kollha bejn vjaġġ mill-aqwa u wieħed frustranti. Tista' tagħti daqqa t'id lill-klijenti billi toffrilhom krema għal kontra x-xemx, kaxxi tal-ewwel għajnuna, adapters tal-kompjuter u affarijiet oħra.

• Ħajjarhom joħorġu. "Kitt għal ħdejn il-baħar: siġġijiet, umbrella, sarong, paddle ball, picnic cooler, karti tal-logħob, ġugarelli għat-tfal u ballun tal-futbol. Kitt għal kontra n-nemus: prodotti li jbiegħdu l-insetti u xemgħat taċ-ċitronella." —Danielle, Rio de Janeiro
• Żomm il-klima tal-post f'moħħok. "Xtrajna 10 ġgieget tax-xita li jintremew wara l-użu f'każ ta' emerġenza, magħmulin minn plastik irqiq u ħafif ħafna. Xi kultant, meta jaslu l-klijenti t-temp ikun bellezza, imma sakemm jaslu biex jitilqu jsibu ruħhom f'xita qawwija." —Till u Jutta, Stuttgart, il-Ġermanja
• Ixtri hair dryer u ħadida tal-mogħdija. "Hair dryer u ħadida tal-mogħdija ma jiswewx ħafna flus u l-fatt dawn l-oġġetti jkunu fil-propjetà tiegħek juri li int ħsibt għal xi affarijiet li jistgħu jkunu utli ħafna għal klijent." —Richard, Lenox, Massachusetts
• Żid xi kumditajiet tajbin għall-familji. "Oġġett bażiku ħafna li huwa popolari ħafna: karru qadim bil-cushions biex tqiegħed lit-tfal żgħar ġo fih u tiġbidhom warajk." —Chantal, Dinan, Franza

Xorta ma tafx minn fejn għandek tibda? Qatta' lejl fl-ispazju tiegħek biex tifhem l-esperjenza tal-klijent. U oqgħod attent/a ħafna għall-kummenti tal-klijenti tiegħek—il-klijenti se jaraw il-post tiegħek minn lentijiet differenti u jagħtuk ideat li setgħu ma ġewkx f'moħħok. Maż-żmien se ssib x'inhu l-aqwa mod biex ittejjeb il-listing tiegħek. Ejja, ibda ikseb reviews tajbin!