Il-Programm ta' Għajnuna għall-Klijenti Matul il-Pandemija tal-COVID

Il-Programm ta' Airbnb Għajnuna għall-Klijenti Matul il-Pandemija tal-COVID (il-"Programm"), li ġie mħabbar f'Jannar tal-2022, inħoloq biex jgħin lill-klijenti li l-bookings tagħhom ġew imfixkla minħabba r-restrizzjonijiet fuq il-vjaġġi imposti mill-gvernijiet minħabba l-COVID, liema restrizzjonijiet huma msemmija hawn taħt.

Airbnb bi pjaċir tħabbar li se tkun qed tpoġġi $20 miljun USD fil-Programm, li se jitqassmu skont ma jidhrilha li jkun l-aħjar hi, bl-iskop li tgħin lill-klijenti li sabu ruħhom milquta minn dal-problemi straordinarji. Il-Programm se jintemm meta jintużaw il-fondi kollha tal-Programm jew dakinhar tat-30 ta' April 2022, skont liema minnhom tiġi l-ewwel.

Iċ-ċirkostanzi li jaqgħu taħt il-Politika taċ-Ċirkostanzi Attenwanti ta' Airbnb ma jaqgħux taħt dal-Programm (inkluż sitwazzjonijiet fejn klijent ikun marid bil-COVID-19).

Bookings ikkanċellati eliġibbli

Il-bookings ikkanċellati għandhom ikollhom kull waħda minn dal-kriterji li ġejjin:

• Booking ta' post fejn toqgħod b'data taċ-checkin mhux qabel l-1 ta' Diċembru 2021;
• Ikkanċellat mill-klijent (a) mhux qabel l-1 ta' Diċembru 2021, (b) qabel iċ-checkin u fi żmien 45 jum miċ-checkin u (ċ) sa dakinhar li jintemm il-Programm; u
• Ikkanċellat minħabba waħda mir-restrizzjonijiet fuq il-vjaġġi imposti mill-gvern imsemmija, li tkun daħlet fis-seħħ wara l-ħin tal-booking.

Tipi ta' restrizzjonijiet fuq il-vjaġġi imposti mill-gvernijiet li jaqgħu taħt il-Programm

L-uniċi restrizzjonijiet fuq il-vjaġġi marbuta mal-COVID-19 li jaqgħu taħt il-Programm huma dawn li ġejjin:

• Għeluq ta' fruntiera, ordnijiet biex in-nies ma joħorġux mid-dar jew lockdown li jwaqqaf lill-klijent milli:
  • Imur fid-destinazzjoni tiegħu għal kull raġuni ħlief għal dawk essenzjali, jew
  • Iħalli l-post ta' minn fejn kien se jibda l-vjaġġ għal kull raġuni ħlief għal dawk essenzjali;
• Obbligu ġdid jew obbligu mġedded li l-vjaġġaturi kollha li ġejjin minn post partikolari joqogħdu kwarantina jew jinqatgħu għalihom malli jaslu f'destinazzjoni partikolari.

Dawn jinkludu wkoll sitwazzjonijiet fejn il-kwarantina diġà kienet obbligatorja fid-destinazzjoni tal-klijent fil-ħin tal-booking imma wara l-booking u qabel id-data taċ-checkin ġiet imġedda jew saret iktar iebsa. Pereżempju jekk fil-ħin tal-booking kien hemm kwarantina obbligatorja ta' 7 ijiem imma wara l-booking inbidlet għal 14-il jum, il-booking jaf ikun eliġibbli.

Dawn ma jinkludux sitwazzjonijiet fejn il-kwarantina jew l-ordni li klijent jinqata' għalih waħdu jkunu imposti biss fuq klijent (jew grupp ta' klijenti) partikolari u fuq il-vjaġġaturi kollha li mhux qed jivvjaġġaw għal raġuni essenzjali mill-post ta' fejn jibda l-vjaġġ. Ma jinkludux anqas sitwazzjonijiet fejn il-klijent ikun obbligat joqgħod kwarantina jew jinqata' għalih waħdu fil-post ta' fejn jibda l-vjaġġ biex imur lejn id-destinazzjoni tiegħu (minħabba li, pereżempju, jitqies bħala xi ħadd li kien fiżikament qrib ta' persuna marida bil-COVID-19).

Żomm f'moħħok li l-Programm jgħodd biss għar-restrizzjonijiet fuq il-vjaġġi li ma kinux fis-seħħ fil-ħin li fih sar il-booking. Pereżempju jekk klijent li kien se jżur Iżrael għamel booking f'Ottubru — qabel Iżrael beda jillimita ż-żjarat minn barra l-pajjiż minħabba l-Omicron — b'data taċ-checkin f'Diċembru, il-booking ikun eliġibbli taħt dal-Programm. Biss, jekk dawk ir-restrizzjonijiet kienu diġà fis-seħħ meta l-klijent ibbukkja ż-żjara, il-klijent ma kienx ikun eliġibbli għall-għajnuna mill-Programm.

Tipi ta' bookings li mhux eliġibbli

Dal-bookings li ġejjin mhux eliġibbli għall-għajnuna mill-Programm:

• Bookings ta' Airbnb Luxe
• Bookings ta' Airbnb for Work
• Bookings tal-Esperjenzi
• Bookings minn klijenti li l-pajjiż tar-residenza tagħhom huwa ċ-Ċina kontinentali

Kif tressaq talba għall-għajnuna

Jekk booking għandu l-kriterji kollha msemmija hawn fuq biex ikun eliġibbli, il-klijent li għamel il-booking jista' jikkuntattja lit-tim tal-Għajnuna lill-Komunità tagħna, li huwa disponibbli 24 siegħa kuljum, u se jintalab jagħti l-informazzjoni meħtieġa biex juri li hu eliġibbli. It-talbiet għall-għajnuna għandhom jitressqu fi żmien 90 jum mid-data li fiha l-booking ġie kkanċellat.

Jekk nindunaw b'xi frodi, qerq jew xi sitwazzjoni oħra li tikser it-Termini tas-Servizz jew it-Termini tas-Servizz tal-Pagamenti tagħna, Airbnb għandha d-dritt li tiċħad talba, tieħu l-għajnuna lura, tissospendi jew tagħlaq il-kont ta' klijent jew tieħu kull azzjoni legali xierqa oħra.

Tip ta' għajnuna disponibbli

Jekk il-Programm ikun għad fadallu l-fondi u naraw li booking għandu dritt għall-għajnuna, il-klijent li jkun għamel il-booking se jkun eliġibbli jirċievi kupun tal-ivvjaġġar ta' darba għal 50% tal-valur mhux imħallas lura tal-booking. Pereżempju jekk klijent ikkanċella booking b'valur ta' $500 USD u tħallas $250 USD lura taħt il-politika ta' kanċellazzjoni tal-Host, il-klijent se jkun eliġibbli li jirċievi kupun tal-ivvjaġġar b'valur ta' $125 USD (50% tas-somma mhux imħallsa lura). Il-ħlas li se jirċievi l-Host għall-booking mhux se jiġi affettwat.

Airbnb se tirrevedi t-talbiet fl-ordni li jaslulna. Il-kupuni tal-ivvjaġġar se jinħarġu sakemm ikun hemm il-fondi disponibbli għall-Programm.

Meta se tirċievi l-kupun tal-ivvjaġġar tiegħek

Jekk inqisu li booking ikollu dritt għalih u l-Programm ikun għad fadallu l-fondi, il-kupun tal-ivvjaġġar għandu jasal fil-kont tal-klijenti fi żmien 7-10 ijiem tax-xogħol. Il-klijenti jistgħu jsibu l-kupuni tal-ivvjaġġar minn Profil > Settings tal-Kont > Pagamenti u ħlasijiet > Krediti u kupuni.

Kif titlob iktar minn kupun tal-ivvjaġġar wieħed

Jekk klijent għandu iktar minn booking eliġibbli wieħed, il-klijent jista' jressaq talba għal kull wieħed mill-bookings eliġibbli. Airbnb għandha dritt tillimita n-numru ta' kupuni tal-ivvjaġġar li jistgħu jingħataw lill-istess klijent taħt dal-Programm.

Regoli għall-kupuni tal-ivvjaġġar

Il-kupun jista' jintuża darba biss, ma jitħallasx lura u jista' jintuża biss biex tibbukkja żjara b'data taċ-checkin sa dakinhar tat-30 ta' Diċembru 2023. Jista' jintuża biss għal booking fuq Airbnb għal post fejn toqgħod. Jekk il-klijent jikkanċella booking li jkun intuża kupun għalih, il-kupun ma jistax jerġa' jintuża. Il-kupun ma jistax jissarraf fi flus, f'gift cards jew jintuża bħala ħlas għal affarijiet li jkunu nxtraw qabel u ma jistax jingħadda lil ħaddieħor jew jintuża ma' offerta, kupun jew skont ieħor. Airbnb iżżomm id-dritt li tfittex kull xorta ta' rimedju, inkluż li tannulla dal-kupun f'każ li tissuspetta frodi, użu ħażin, ksur tat-Termini tas-Servizz jew tat-Termini tas-Servizz tal-Pagamenti tagħna jew żbalji tekniċi.

Kif jaħdem il-Programm

Airbnb ħolqot il-Programm ta' Għajnuna għall-Klijenti Matul il-Pandemija tal-COVID biex ngħinu lill-komunità tal-klijenti tagħna milquta mill-aħħar imxija tal-każijiet tal-COVID-19 madwar id-dinja. Aħna biss niddeċiedu kull ħaġa marbuta mal-Programm, inkluż liema klijenti huma eliġibbli. Kull deċiżjoni ta' Airbnb marbuta mal-Programm hija finali u għandha tiġi mwettqa mill-klijenti. Biss, l-ebda deċiżjoni ma taffettwa d-drittijiet l-oħra mogħtija lill-klijenti minn kuntratt jew liġi, fosthom il-Politika għall-Ħlas Lura lill-Klijenti, il-Politika taċ-Ċirkostanzi Attenwanti u l-politika ta' kanċellazzjoni tal-Host għal dak il-booking. Il-klijent ma jitlef l-ebda dritt li jibda azzjoni legali.

Jekk jogħġbok żur dil-paġna għall-aħħar dettalji dwar il-Programm. Aħna se nippubblikaw aġġornament meta jintemm il-Programm. L-uniċi bookings eliġibbli għall-għajnuna se jkunu dawk li ġew ikkanċellati sa dakinhar tat-tmiem tal-Programm. Hekk kif il-pandemija tkompli tevolvi u ċ-ċirkostanzi jkomplu jinbidlu, aħna se nkunu qed inżommu għajnejna fuq il-Programm u nistgħu ntawluh, nissospenduh, nibdluh jew intemmuh meta nemmnu li għandu jsir hekk.