Uża l-għodod għall-Co-Hosts ta' Airbnb

Waħda mill-ħwejjeġ ewlenin meħtieġa biex tirnexxi bħala Co-Host b'esperjenza hija li int u l-Host taqblu fuq kif taqsmu x-xogħol marbut mat-tmexxija ta' listing.

Int u l-Host tistgħu tikkomunikaw it-tnejn li intom mal-klijenti jew wieħed minnkom biss se jieħu ħsieb il-messaġġi? Se tieħu ħsieb il-listing kollu u titlob l-għajnuna tal-Host għal affarijiet partikolari biss bħal pereżempju t-talbiet għall-ħlas lura? Tagħżel x'tagħżel, Airbnb tagħtik l-għodod meħtieġa biex tħaffiflek xogħlok int u tgħin lill-Host jilqa' n-nies.

Meta Host jistiednek tgħinu jilqa' n-nies fil-listing tiegħu, il-Host jintalab jagħżel x'aċċess jixtieq jagħtik. Fost l-għażliet se jkollu:

• Aċċess sħiħ
• Aċċess għall-kalendarju u l-inbox
• Aċċess għall-kalendarju biss

B'aċċess sħiħ se tkun tista':

• Toħloq listing ġdid
• Tibgħat messaġġi lill-klijenti u tirċievi n-notifiki
• Tagħmel bidliet fil-kalendarju
• Tara l-istorja tat-tranżazzjonijiet
• Tieħu ħsieb listing fosthom il-prezzijiet u d-dettalji l-oħra
• Tieħu ħsieb il-bookings fosthom li taċċetta u tiċħad it-talbiet għall-bookings, il-kanċellazzjonijiet u t-talbiet taċ-Ċentru tar-Riżoluzzjonijiet
• Tibgħat talba għall-ħlas lura
• Iżżid jew tneħħi Co-Hosts oħra, tibdel il-permessi jew tqiegħed lilek innifsek jew Co-Host ieħor bħala l-Host ewlieni tal-listing

Jekk jogħġbok żomm f'moħħok li anki jekk ikollok aċċess sħiħ xorta mhux se tkun tista':

• Toħloq jew tibdel il-kundizzjonijiet tal-ħlas ta' Co-Hosts oħra

• Tieħu ħsieb it-talbiet għall-ħlas lura wara li jkunu ntbagħtu

• Issib min hu jew tibdel sid il-listing jew il-metodu tal-ħlas ta' Co-Host jew id-dettalji tal-kontribwent tat-taxxa

Ma tagħmilx ħażin li tifthiem mal-Host biex taqblu min se jkun responsabbli li jwieġeb u jikkomunika mal-klijenti. Il-Hosts jafu jkunu jew qed ifittxu lil xi ħadd li jieħdu ħsieb kollox jew qed ifittxu lil xi ħadd li jistgħu jaqsmu x-xogħol miegħu.

X'għandek tiddiskuti mal-Hosts:

• Min se jikkomunika mal-klijenti, min se jwieġeb il-mistoqsijiet tagħhom u min se jkun responsabbli li jsewwi l-problemi li jinqalgħu

• Min se jaċċetta jew jiċħad booking jekk il-listing ma jużax Booking Immedjat

• Min se jibgħat it-talbiet għall-ħlas lura (wara li dat-talbiet jintbagħtu, sid il-listing biss se jkun jista' jieħu ħsiebhom)

• Kif tikkuntattja lit-tim tal-Għajnuna lill-Komunità biex titlob l-għajnuna

• Kif tieħu ħsieb Co-Hosts oħra

Sabrina, Co-Host b'esperjenza ġewwa Denver, Colorado għażlet li l-komunikazzjoni mal-klijenti ssir minn bniedem wieħed biss biex dejjem tkun "konsistenti fejn jidħol l-għemil marbut mar-roħsijiet, mal-ħlasijiet lura u mal-problemi tal-klijenti," tgħidilna.

Jekk ma jkollokx kollox mifthiem sew, jafu jinqalgħu l-problemi. "Ma trid xejn li jinqala' xi taħwid meta jkollok tnejn min-nies qed jaqsmu dax-xorta ta' xogħol bejniethom," jgħid Dominic, Co-Host b'esperjenza ġewwa Cornwall, l-Ingilterra. "Meta jiġri hekk tibda tħabbat wiċċek ma' ħafna problemi bħal pereżempju li x-xogħol jibda jinqabeż jew li n-naddafa ma jintalbux jiġu fil-ħin."

Fuq Airbnb il-Hosts jistgħu jagħżlu li jużaw l-għodod għall-ħlasijiet għall-Co-Hosts biex jaqsmu perċentwali jew somma fissa ta' kull booking miegħek. Jistgħu jagħżlu waħda minn erba' għażliet għall-ħlas:

• Aqsam it-tariffa għat-tindif

• Aqsam it-tariffa għat-tindif flimkien ma' perċentwali tas-somma tal-booking

• Aqsam perċentwali tas-somma ta' kull ħlas

• Aqsam somma fissa minn kull ħlas

L-uniċi nies li jistgħu joħolqu l-kundizzjonijiet tal-ħlas huma sidien il-listings. Jaf ikun hemm xi limitazzjonijiet marbuta mal-post fejn jinsabu l-Host u l-Co-Host.

Wara li Host joħloq kundizzjoni tal-ħlas għalik bħala Co-Host, se jkollok 14-il jum biex taċċetta jew tiċħad dik il-kundizzjoni. Għalkemm ħafna drabi se tilħaq ftehim dwar is-somma u x-xorta ta' kumpens mal-Host qabel jibgħatlek it-talba, jekk tiċħad kundizzjoni tal-ħlas, il-Host se jkollu jibgħatlek proposta ġdida.

Wara li tikkonferma ħlas, se tibda titħallas għall-bookings madwar 24 siegħa wara ċ-checkin. Jekk sid il-listing jagħmel xi bidla fil-kundizzjonijiet tal-ħlas fis-seħħ, dil-bidla se tgħodd biss għall-bookings li jibdew wara li tikkonferma l-bidla min-naħa tiegħek.

L-informazzjoni f'dal-artiklu jaf laħqet inbidlet minn meta ġie ppubblikat.