Ir-reviews li kitbulek il-Hosts

Ir-reviews huma mod tajjeb ħafna biex il-Hosts jaqsmu l-ħsibijiet u l-kummenti tagħhom wara t-tmiem taż-żjara tiegħek. Ir-reviews jgħinu lill-Hosts l-oħra wkoll biex jifhmu x'għandhom jistennew minnek fejn jidħlu l-indafa, ir-regoli tad-dar u l-komunikazzjoni.

F'dan l-artiklu se ngħarrfuk b'dak li jiġri meta xi ħadd jiktiblek review u x'se jkunu jistgħu jaqraw il-Hosts tal-ġejjieni meta titlob jew tagħmel booking ta' post fejn toqgħod.

Punteġġi mingħand il-Host tiegħek

Bħala parti mill-proċess mhux obbligatorju tar-reviews, il-Hosts jistgħu jagħtuk punteġġ ta' bejn stilla u 5 stilel fuq tliet kategoriji: indafa, regoli tad-dar u komunikazzjoni. Bħalma jiġri bil-punteġġi bl-istilel għall-Hosts, dawn il-punteġġi tal-kategoriji jinġabru f'medja ta' punteġġ wieħed għaż-żjara tiegħek.

Il-punteġġi dettaljati dwar iż-żjarat tal-imgħoddi u l-ġabra tal-punteġġi ġenerali u medji għaż-żjarat kollha mhux se jintwerew lill-Hosts sakemm ma tagħżilx li tibbukkja magħhom jew titlobhom booking fil-ġejjieni. Il-kategoriji b'punteġġi tajbin (4-5) se jintwerew b'marka ta' verifika u dawk b'punteġġi ħżiena (1-3) b'ikona ta' twissija ħdejhom.

Il-punteġġi jintużaw għal għadd ta' raġunijiet u jgħinu:

• Lill-Hosts li tlabt biex tibbukkja magħhom u lil dawk li jaf tibbukkja magħhom fil-ġejjieni jifhmu jekk għandhomx jaċċettaw booking mingħand klijent;
• Lil Airbnb tifhem jekk klijent għandux ir-rekwiżiti meħtieġa minn Host biex juża Booking Immedjat;
• Lil Airbnb tifhem jekk klijent jistax jitqies bħala klijent b'esperjenza biex ikun jista' jibbukkja xi listings; u
• Lil Airbnb tifhem jekk klijent hux jimxi mar-regoli bażi għall-klijenti tagħna. Jekk ir-reviews jew l-ilmenti mat-tim tal-għajnuna lill-klijenti jsemmu ksur ripetut jew gravi tar-regoli bażi, dan jista' jwassal għal twissijiet, għas-sospensjoni u/jew għat-tneħħija tal-persuna mill-pjattaforma.

Review pubblika mingħand il-Host tiegħek

Anki jekk ir-reviews mhux obbligatorji, meta l-Hosts jagħżlu li jiktbu reviews, ir-reviews għandhom ikunu pubbliċi. Ir-review li jiktiblek il-Host tintwera fuq il-profil tiegħek biex kull min iżur il-profil tiegħek ikun jista' jaqraha.

X'għamilt tajjeb

Il-Hosts għandhom l-għażla li jsemmu dak li għamilt tajjeb (eż. li żammejt il-post nadif, pulit u fi stat tajjeb, li ħadt ħsieb iż-żibel, li bgħatt messaġġi siewja, li ġibt ruħek sew, li dejjem weġibt, eċċ.). Jekk tibbukkja jew tibgħat talba lill-Host għal post fejn toqgħod, il-Host se jkun jista' jaqra x'kitbu dwarek Hosts oħra taż-żjarat tal-imgħoddi. Il-kummenti s-sbieħ se jintwerew b'marka ta' verifika.

X'għandek iżżomm f'moħħok għad-darba li jmiss

Jekk Host jagħti punteġġ baxx għal xi kategorija, aħna se nistaqsuh jgħidilna x'ma marx sew waqt il-vjaġġ tiegħek. Grazzi għal dal-kummenti, Airbnb se tissuġġerilek dak li tista' tagħmel aħjar biex tevita l-problemi matul il-vjaġġ li jmiss tiegħek. Jekk tibbukkja jew tibgħat talba lill-Host għal post fejn toqgħod, il-Host se jkun jista' jaqra dix-xorta ta' informazzjoni dwar iż-żjarat tal-imgħoddi. Il-kummenti ħżiena se jintwerew b'ikona ta' twissija ħdejhom.

Messaġġ privat mingħand il-Host tiegħek

Il-Host tiegħek jaf jibgħatlek messaġġ privat b'iktar kummenti u ħsibijiet. Int u twieġeb għandek dejjem iżżomm f'moħħok li dal-messaġġ ma jista' jinqara minn ħadd iktar għajrek.