Kif issir Host fuq Airbnb

Ikseb it-tweġibiet li teħtieġ biex tkun tista' tibda tilqa' n-nies b'moħħok mistrieħ.
Minn Airbnb f'did-data: 16 ta’ Nov 2022
3 minuti biex taqrah
Aġġornat f'did-data: 16 ta’ Nov 2022

Punti ewlenin

  • Ħejji l-ispazju tiegħek u oħloq listing li jħajjar lin-nies jibbukkjawh

  • Agħżel meta u kif tilqa' n-nies

Jekk qed taħsibha biex tibda tilqa' n-nies imma ma tafx kif tista' ssib il-klijenti jew toħloq esperjenza sabiħa għall-klijenti tiegħek, af li m'intix waħdek. Li tkun Host ta' Airbnb huwa mod tajjeb ta' kif tiltaqa' ma' nies ġodda filwaqt li ddaħħal xi ħaġa tal-flus żejda u nifhmu li fil-bidu jista' jkollok ħafna mistoqsijiet.

Dan huwa dak li jeħtieġlek tagħmel biex tibda tilqa' n-nies.

1. Ifhem jekk l-ispazju tiegħek hux addattat biex tilqa' n-nies

L-ebda spazju mhu żgħir wisq jew uniku żżejjed biex jittella' fuq Airbnb! Kull spazju għandu t-tip ta' klijent addattat għalih—l-importanti li tkun ċar/a dwar dak li l-klijenti jistgħu jistennew li jsibu billi tikteb deskrizzjoni ġenwina u ċara tal-post tiegħek (eż.: bibien iktar dojoq mis-soltu jew taraġ qadim).

Importanti wkoll li qabel tibda tilqa' n-nies tkun taf sew x'liġijiet u taxxi hemm marbuta mal-kirjiet għal żmien qasir fiż-żona tiegħek. Airbnb ma tistax tagħtik pariri legali jew fiskali imma nistgħu ngħinuk issib l-informazzjoni dwar ir-regoli marbuta mal-ospitalità.

2. Ħejji l-ispazju tiegħek għall-klijenti

"Jien nemmen li l-klijenti li jibbukkjaw il-post tiegħek ġeneralment ikunu tip ta' nies bħalek," jgħid Jake, Superhost ġewwa Big Bear, California. "Darek tirrifletti l-personalità tiegħek u għalhekk it-tip ta' nies li jibbukkjawha huma nies li jgħixu u jħobbu l-istess affarijiet bħalek."

Għandek ġabra sabiħa ta' posters tal-films qodma? Jew xi ftit kotba interessanti dwar l-istorja tal-arti? Tagħmel tajjeb jekk turihom! Meta turi dettalji personali tkun qed tgħin lil-listing tiegħek jispikka.

Int u tħejji l-post tiegħek tinsiex tiżbarazza u nissuġġerulek li toffri l-kumditajiet bażiċi bħalma huma t-toilet paper, is-sapun u x-xugamani biex il-klijenti tiegħek ikollhom esperjenza mill-aqwa. Tista' wkoll toffri xi ħaġa iktar, bħal pereżempju flixkun inbid jew kaxxa ċikkulatini, biex tgħin lill-klijenti tiegħek iħossuhom speċjali.

3. Tella' l-ispazju tiegħek

Mhu se tħallas xejn biex ittella' l-ispazju tiegħek. Airbnb tiġbor tariffa tas-servizz biss meta booking ikun ġie kkonfermat. Dit-tariffa normalment hija ta' 3% tal-valur tas-sottototal tal-booking u tgħin biex inħallsu għas-servizzi li noffru bħala Airbnb fosthom għajnuna lill-klijenti 24 siegħa kuljum, il-ħarsien għall-Hosts u iktar.

L-għan tagħna huwa li nagħmluhielek faċli kemm jista' jkun biex ittella' l-ispazju tiegħek—il-proċess biex ittella' l-listing tiegħek fih biss 10 passi. Jekk ikollok xi mistoqsijiet, minbarra li lilna se ssibna dejjem hawn biex ngħinuk, noffrulek ħafna modi biex tikkomunika ma' Hosts oħra.

F'xi wħud mis-swieq se tkun tista' taqbad ma' Ambaxxatur Superhost bħali," tgħid Magaly, Superhost ġewwa East Wenatchee, Washington. "Qegħdin hawn biex ngħinu nagħmlulek dal-proċess kemm jista' jkun ħafif."

Int u żżid id-dettalji mal-listing tiegħek, importanti li taħseb sew dwar ir-ritratti li tagħżel għax ħafna drabi dawk huma l-ewwel affarijiet li jfittxu l-klijenti qabel jibbukkjaw. Biex jieħdu ritratti tajbin li jagħtu stampa dettaljata tal-ispazju tagħhom u l-atmosfera tiegħu, xi Hosts iqabbdu fotografi professjonali filwaqt li oħrajn jużaw l-ismartphones tagħhom.

4. Agħżel kif tixtieq tilqa' n-nies

Dejjem se tkun int biss li tiddeċiedi meta u kif tilqa' n-nies fuq Airbnb. Mis-settings tal-bookings u tal-kalendarju li noffru tista', fost affarijiet oħra, timblokka d-dati meta l-ispazju tiegħek mhux disponibbli, tagħżel il-ħinijiet għaċ-checkin u ċ-checkout li tixtieq u tagħżel l-inqas u l-itwal numru ta' ljieli li l-klijenti jistgħu jagħżlu għal żjara.

"Mill-bidu nett iddeċidejna li ma naċċettawx bookings iqsar minn 3 ijiem," tgħidilna Lucy, Host ġewwa Easy Sussex, l-Ingilterra. "Dan wassal biex indaħħlu inqas flus imma fl-istess waqt stajt noffri lill-klijenti tiegħi l-esperjenza li xtaqt li jkollhom."

Tista' wkoll tuża r-regoli tad-dar tiegħek biex tgħid lill-klijenti x'qed tistenna mingħandhom u x'jistgħu—u x'ma jistgħux—jagħmlu fl-ispazju tiegħek.

5. Agħżel il-prezz li tixtieq titlob u rċievi l-ħlasijiet

Kemm titlob flus għall-post tiegħek huwa biss f'idejk. Int u toħloq l-istrateġija tal-prezz tiegħek, żomm f'moħħok x'qed jitolbu Hosts oħra fiż-żona tiegħek, x'kumditajiet toffri u ż-żmien tas-sena. Dil-ħaġa tista' tgħinek tasal għal prezz tajjeb kemm għalik kif ukoll għall-klijenti tiegħek.

Airbnb tagħmilhielek faċli li tibda tuża l-metodu tal-ħlas li tippreferi fit-taqsima Pagamenti u ħlasijiet tal-kont tiegħek. Fost il-metodi tal-ħlas li tista' tuża, skont fejn tinsab, hemm it-trasferimenti bankarji jew id-depożiti diretti, il-karti tad-debitu Payoneer, PayPal u Western Union.

Fejn tista' ssib l-għajnuna u r-riżorsi

Importanti żżomm f'moħħok li mhux se tkun waħdek meta tibda l-avventura tal-ospitalità tiegħek. Airbnb tgħin lill-Hosts b'ħafna modi, fosthom:

Int min int u għandek x'tip ta' post għandek, hemm post għalik fil-komunità ta' Airbnb. "L-isbaħ ħaġa dwar Airbnb hija li kollha kemm aħna differenti," tgħid Magaly. "Għalhekk nawgurawlek u nixtiequlek il-hosting it-tajjeb!"

Il-Hosts imsemmija f'dal-artiklu u dal-vidjow la huma ħaddiema ta' Airbnb u lanqas qed jaħdmu għal Airbnb. Huma ssieħbu ma' Airbnb bħala Host Creators biex jaqsmu l-ħsibijiet tagħhom u joħolqu dal-vidjow. L-opinjonijiet, l-istejjer u x-xhieda tagħhom huma veri, huma l-opinjonijiet tagħhom u mhumiex stqarrijiet uffiċjali ta' Airbnb.

Punti ewlenin

  • Ħejji l-ispazju tiegħek u oħloq listing li jħajjar lin-nies jibbukkjawh

  • Agħżel meta u kif tilqa' n-nies

Airbnb
16 ta’ Nov 2022
Dan kien ta' għajnuna għalik?