L-ispazju tiegħi adattat għal Airbnb?

Jaf taħseb li l-kamra tas-sodda żejda jew id-dgħajsa tiegħek ma jinteressaw lil ħadd fuq Airbnb, imma dan mhux minnu. Il-klijenti tagħna jfittxu kull xorta ta' postijiet—mill-iżgħar wieħed sal-iktar wieħed uniku.

Hu x'inhu t-tip ta' post li għandek, l-importanti li jkollu żona kennija għall-irqad li tkun lest/a torqod fiha anke int u li tikteb deskrizzjoni tal-listing dettaljata li tispjega għaliex l-ispazju tiegħek huwa uniku.

Il-klijenti jistennew li mill-inqas isibu post nadif, b'żona komda fejn jistgħu jorqdu u aċċess għal kamra tal-banju. Mhux kull post fuq Airbnb għandu aċċess għal kċina imma jekk il-klijenti se jkollhom aċċess għal kċina, semmi hix se tkun kċina żgħira jew kċina sħiħa.

Kull min għandu ftit spazju żejjed jista' jkun Host tajjeb fuq Airbnb. Il-post "ideali" ma jeżistix—l-iktar ħaġa importanti hija li bħala Host tkun onest u dettaljat fid-deskrizzjoni u r-ritratti tal-listing li ttella' biex il-klijenti jkunu jistgħu jifhmu eżatt x'għandhom jistennew. Minn kmamar żejda sa djar lussużi, fuq Airbnb kulħadd jista' jsib il-post ideali li jgħodd għalih.

Kważi kull tip ta' propjetà tista' ssib klijent interessat fiha fuq Airbnb. Dar? Appartament? Kamra fl-appartament tiegħek? Xi postijiet huma saħansitra meqjusa uniċi, fosthom treehouses, tined, djar ċkejknin, agrituriżmi, kampers u RVs.

Tista' tgħid lill-klijenti jekk hux se jkollhom aċċess privat għall-propjetà kollha tiegħek, għal suite privata jew jekk hux se jkunu qed jaqsmu xi spazji bħal pereżempju ż-żona tal-irqad, il-kċina jew il-kamra tal-banju ma' nies oħra bħalma huma l-familja tiegħek, dawk li joqogħdu fl-ispazju miegħek jew klijenti oħra. Tista' tagħżel li l-ispazju tiegħek ikun biss għall-klijenti jew li żżomm l-affarijiet personali tiegħek fih. L-importanti li żżomm l-ispazju tiegħek nadif u li tfiehem lill-klijenti eżattament dak li se jsibu fil-post.

Daniel, Host ġewwa San Francisco, jgħid li dejjem ikun onest dwar il-post tiegħu. "Meta jaslu fil-post tiegħek, il-klijenti għandhom isibu l-istess affarijiet li għedtilhom li se jsibu," jgħidilna. "Aħjar ma twigħedx iżżejjed u l-klijenti jsibu post isbaħ milli stennew milli bil-kontra."

Jekk il-klijenti jafu jsibu xi pets fi spazju maqsum ma' ħaddieħor, importanti li ssemmi dil-ħaġa Imma iktar importanti minn hekk, tella' ritratt gustuż tal-kelb jew tal-qattus tiegħek fuq il-listing ta' Airbnb b'caption fejn tispjega lill-klijenti li se jkun hemm annimal fil-post.

Ir-ritratti importanti ħafna għax xi klijenti jafu jibbukkjaw mingħajr ma jaqraw kollox sew. Jekk l-ispazju tiegħek għandu xi faċilitajiet uniċi, nissuġġerulek li matul il-proċess tal-booking tikkonferma li l-klijenti qraw il-listing tiegħek kollu.

L-ispazju tiegħek mhux palazz? Ma jimpurtax! Ħafna klijenti jippreferu post b'inqas lussu sakemm iħossu li se jieħdu valur għall-flus li jħallsu. Meta tkun għadek tibda, nissuġġerulek titlob prezz ftit irħas minn dak li tixtieq tikseb. Dil-ħaġa tgħinek tħajjar iktar klijenti jagħżlu l-listing tiegħek. Imbagħad tista' tqis li tgħolli l-prezz għal dak li tixtieq wara li tkun ksibt biżżejjed reviews.

Skopri iktar grazzi għall-gwida tagħna dwar kif toħloq listing li jirnexxi

L-informazzjoni li tinsab f'dal-artiklu jaf laħqet inbidlet minn meta ġie ppubblikat.