Kif għandek iġġib ruħek meta tikseb review ħażina fuq Airbnb
Review ħażina taf tolqot fil-laħam il-ħaj. Kultant anki l-aqwa Hosts jaf jiksbu review ħażina mingħand xi klijent.
Dejjem se jkollok l-għażla li twieġeb pubblikament fuq il-listing tiegħek. Meta tagħti tweġiba kostruttiva, turi li qed tagħti kas l-kummenti u l-ħsibijiet tal-klijenti. Hemm ukoll affarijiet li tista' tagħmel biex tevita li jiktbulek review ħażina.
Kif twieġeb għar-reviews ħżiena
Meta tikteb tweġiba pubblika qasira b'ton tajjeb għal review ħażina tkun qed tuża l-opportunità li taqsam mal-oħrajn x'titjib tkun qed tagħmel.
Il-klijenti qalulna li meta jsibu Host li jwieġeb ir-reviews, iħossuhom iktar komdi jibbukkjaw miegħu għax jafu li l-Host jaf jisma' dak li għandhom xi jgħidu.
Ir-reviews tista' tweġibhom meta trid. Dawn huma ftit pariri biex ngħinuk tikteb tweġiba mill-aqwa:
Ibda billi turi lill-klijenti li fhimt x'qalulek u għidilhom grazzi. M'hemmx għalfejn tkun iktar kumplikata minn, pereżempju, "Grazzi tar-review tiegħek, Mary! Napprezzaw ħafna l-fatt li ħadt ftit ħin biex tgħidilna kif kien il-vjaġġ tiegħek."
Spjega kif tejjibt l-ispazju tiegħek. Tista', ngħidu aħna, twieġeb, "Jiddispjaċina li s-sodod ma kinux komdi. Għalina importanti li l-klijenti jkunu jistgħu jorqdu raqda komda, għalhekk wara r-review tiegħek, żidna xi toppers fuq is-saqqijiet."
"Bħala klijent ma nistenniex li Host ikollu reviews perfetti. Jinteressawni iktar dawk il-Hosts li jieħdu l-kummenti kritiċi bis-serjetà u juru li jkunu lesti jtejbu l-mod kif jilqgħu n-nies," jgħid Andrew, Superhost ġewwa Berlin.
Ir-reviews li jiksru l-Politika tar-Reviews tagħna jistgħu jitneħħew. Jekk temmen li review tikser il-politika tagħna, tista' tirrappurtaha. Tista' wkoll titlobna nneħħu r-reviews miktuba bi tpattija—inkitbu meta nkitbu—minn klijenti li jiksru b'mod serju xi politika tagħna.
Kif twieġeb għar-reviews tajbin
Meta twieġeb pubblikament għar-reviews tajba, tkun qed tgħin ukoll biex turi li int Host li twieġeb.
Jekk twieġeb biss għar-reviews ħżiena, se tkun qed tiffoka l-attenzjoni tal-klijenti iktar fuqhom. Wieġeb għar-reviews tajba wkoll. Taf tkun biżżejjed anki jekk twieġeb biss "Grazzi talli għażilt il-post tiegħi!"
Evita r-reviews ħżiena
Kultant review ħażina tkun tfisser biss li l-klijenti stennew affarijiet differenti. Kull darba li tilqa' klijent, din tista' tkun opportunità biex toffri ospitalità mill-aqwa u turi kemm int kapaċi tilqa' n-nies b'mod inklussiv.
Anki jekk qatt ma jista' jkollok garanzija li mhux se tispiċċa b'xi review ħażina, hemm x'tista' tagħmel biex ittejjeb il-mod kif tilqa' n-nies.
- Ħu ritratti preċiżi tal-ispazju tiegħek u uri l-benefiċċji u n-nuqqasijiet tiegħu.
- Ikteb deskrizzjoni tal-listing ġenwina u regoli tad-dar biex il-klijenti jkunu jafu x'għandhom jistennew.
- Irranġa d-deskrizzjoni tal-listing tiegħek biex tgħarraf lill-klijenti minn qabel bl-affarijiet li ssemmew fir-reviews il-ħżiena, speċjalment dawk li m'għandekx kontroll fuqhom (jekk pereżempju l-post tiegħek jinsab fi triq storbjuża).
- Uża l-kummenti u l-ħsibijiet tal-klijenti biex ittejjeb il-listing tiegħek, bħal, ngħidu aħna, li żżid iktar xugamani jekk xi klijenti qalulek li ma kienx hemm biżżejjed.
- Żomm kuntatt mal-klijenti bl-app ta' Airbnb matul iż-żjara tagħhom biex b'hekk, jekk ikun hemm xi problema, tkun tista' taħdem fuqha mill-ewwel.
L-informazzjoni f'dal-artiklu jaf laħqet inbidlet minn meta ġie ppubblikat.