Dal-kontenut mhux disponibbli bil-lingwa magħżula minnek, għalhekk għamilnieh disponibbli bl-eqreb lingwa disponibbli għalissa.

Pariri fuq kif tiffranka l-enerġija li jistgħu jraħsulek il-kontijiet tal-elettriku, tat-tisħin u tal-ilma

Bidliet żgħar jistgħu jwasslu biex tiffranka ħafna flus u biex tnaqqas il-ħela.
Minn Airbnb f'did-data: 14 ta’ Diċ 2022
3 minuti biex taqrah
Aġġornat f'did-data: 14 ta’ Diċ 2022

Punti ewlenin

  • Tħallix riħ jidħol u waħħal apparat biex tnaqqas il-ħela tal-ilma

  • Ibdel l-appliances il-kbar u tħallix l-appliances iż-żgħar imqabbdin

  • Aqsam mal-klijenti dak li qed tagħmel biex tkun iktar sostenibbli

Bl-ispejjeż tal-enerġija dejjem jogħlew, jaf tqumlek kemxa flus biex iżżomm l-ispazju tiegħek komdu għall-klijenti. Bħala Host, għalkemm tista' titlob lill-klijenti biex joqogħdu attenti għal kif jużaw it-tisħin, it-tkessiħ u l-ilma, m'għandekx toqgħod fuqhom biex tnaqqas il-kontijiet tal-elettriku, tat-tisħin u tal-ilma. Tkun aħjar li tipprova tnaqqas il-ħela tal-enerġija fl-ispazju tiegħek. Tista' tiffranka ħafna flus u tgħin tħares l-ambjent.

Airbnb qed taħdem mal-esperti fil-qasam tas-sostenibbiltà biex tagħti lill-Hosts pariri u riżorsi biex itejbu l-propjetajiet tagħhom. Biex tibda, ipprova dal-pariri minn Energy Saving Trust, għaqda mir-Renju Unit li taħdem biex tgħin lin-nies inaqqsu l-ħela tal-enerġija u jitfgħu inqas gassijiet bl-effett serra fl-atmosfera.

Tħallix riħ jidħol u waħħal apparat biex tnaqqas il-ħela tal-ilma

Ħafna drabi l-klijenti jistennew li jsibu spazju li jistgħu jżommu sħun jew frisk u li jkollu ilma sħun mingħajr dewmien. Tista' toffrilhom dak li jkunu qed ifittxu—u tnaqqas l-ispejjeż tiegħek—billi ttejjeb l-iżolazzjoni u l-użu tal-ilma fil-post tiegħek.

  • Ara li ma jkunx dieħel riħ mill-ġnub tat-twieqi u tal-bibien, miċ-ċmieni u mill-ispazju mad-dawra tal-pajpijiet u tas-sockets tal-elettriku. Huwa metodu li ma jiswiex ħafna flus u li jagħti riżultati tajbin biex tiffranka l-enerġija f'kull tip ta' post. Il-plastik għall-iżolazzjoni, is-silikon, l-istrixxi tal-foam, il-purtieri bir-romblu, il-purtieri ħoxnin u l-għata tal-purtieri jistgħu jgħinuk twaqqaf ir-riħ milli jidħol.
  • Iżola l-gijżers il-qodma biex ma jitilfux is-sħana u waħħal timer biex ma jsaħħnux l-ilma meta l-ispazju tiegħek ma jkunx qed jiġi użat—b'hekk tista' tnaqqas il-ħela tal-enerġija.
  • Ibdel l-apparat bażiku marbut mas-sistema tal-ilma bi flushings, viti tal-ilma u bexxiexa tad-doċċa li jużaw inqas ilma u li jistgħu jgħinuk taħli inqas. Il-bexxiexa tad-doċċa li jħalltu l-arja mal-ilma jiffrankaw sa 16-il litru (4.25 galluni) mingħajr ma jtellfu mill-pressa. Biex tevita l-ħela, nissuġġerulek ukoll tiċċekkja u ssewwi ta' sikwit l-apparat li jkun qed iqattar.
  • Ħaddem id-dishwasher u l-magna tal-ħasil/dryer biss meta jkunu mimlijin u uża temperaturi baxxi jew il-modalità "eco" biex ma taħlix la l-ilma u lanqas l-elettriku. Int u tħejji l-ispazju tiegħek għall-klijent li jmiss, meta tkun tista' ħalli l-ħwejjeġ u l-platti jinxfu waħidhom.

Anna, Superhost ġewwa Newgale, Wales u membru tal-Bord Konsultattiv tal-Hosts tuża tiżjin b'effett ta' iżolazzjoni biex iżżomm il-cottages tagħha kennija għall-klijenti. "Qegħidna xi twapet mal-art tal-ġebel qadima u xi purtieri ħoxnin biex ma nħallux ir-riħ jgħaddi," tgħid Anna, membru tal-kumitat tas-sostenibbiltà tal-bord. "It-tnejn li huma jżejnu l-kmamar tagħna u jgħinuna niffrankaw l-enerġija.

Ibdel l-appliances il-kbar u tħallix l-appliances iż-żgħar imqabbdin

Ħafna klijenti jfittxu kumditajiet bħal kċina mgħammra sew u wifi stabbli. Tista' tnaqqas il-ħela tal-elettriku mingħajr ma tnaqqas mill-kwalità tal-ospitalità li toffri.

  • Ibdel il-bozoz minn bozoz li jaħdmu bis-sħana jew bil-gass għal bozoz LED u tista' tiffranka bejn $4 USD u $16 USD fis-sena għal kull bozza.
  • Waħħal sensuri tad-dawl u pannelli għall-kontroll li ma jiswewx ħafna flus u li huma ħfief ħafna biex twaħħalhom u b'hekk tiżgura li d-dwal ma jintesewx mixgħula. Is-sensuri taċ-ċaqliq jistgħu jiffrankaw id-dawl billi jixgħelu u jitfu d-dawl awtomatikament meta jħossu li klijent ikun daħal fil-kamra.
  • Ibdel appliances ikbar (meta jasal iż-żmien li jinbidlu) għal appliances li jaħlu inqas ħalli b'hekk tiffranka l-enerġija. Meta tagħżel friġġ b'punteġġ tal-enerġija aħjar, maż-żmien il-kontijiet tal-elettriku se jiġuk ħafna irħas.
  • Aqla' tagħmir iżgħar meta ma jkunx qed jintuża, bħal pereżempju ċ-ċarġers tal-mowbajl, biex tevita ħela ta' dawl bla bżonn. Xi ħaġa oħra li tista' tagħmel huwa li tqabbadhom ma' extensions jew swiċċijiet intelliġenti li tista' titfihom minn fejn tkun meta ma jkun hemm ħadd fl-ispazju. Tista' tiffranka madwar 5% fuq il-kont tad-dawl meta ma tħallix it-tagħmir mixgħul fuq il-modalità standby.
"Il-ħasil u t-tindif huma proċessi li jaħlu ħafna enerġija," tgħid Anna. "Għalija importanti ħafna li nuża magna tal-ħasil u dryer b'punteġġi tal-użu tal-enerġija tajbin."

Aqsam l-istorja tiegħek mal-klijenti

Dak li tikteb fid-deskrizzjoni tal-listing tiegħek jista' jgħin biex il-klijenti jiffrankaw l-enerġija u biex ikunu jistgħu jifhmu x'għandhom jistennew.

"Naħseb li dak li jagħmel l-ikbar differenza fil-każ tagħna huwa li fil-listing inkunu ċari dwar kemm nagħtu kas il-ħarsien tal-ambjent," tgħid Anna. "Tista' tispjega kemm huma importanti għalik is-sostenibbiltà u dak kollu li qed tagħmel biex imbagħad il-listing tiegħek jintagħżel minn klijenti li jagħtu kas l-ambjent daqsek."

Meta tispjega dak li tkun qed tagħmel tkun qed tħajjar lill-klijenti jagħmlu bħalek. "Bla ebda dubju, nixtiequ li ż-żjara tal-klijenti tkun sabiħa u komda," tgħid Anna. "Imma l-fatt li fil-listing tagħna nsemmu kif qed nippruvaw ma naħlux enerġija tgħin biex nevitaw imġibiet bla sens bħal meta l-klijenti l-ewwel jgħollu l-livell tat-tisħin imbagħad iħallu d-dar għall-bqija tal-jum."

Dawn huma ftit affarijiet żgħar li tista' tagħmel biex tgħin tnaqqas il-ħela tal-enerġija fl-ispazju tiegħek. Affarijiet ikbar bħal pereżempju li twaħħal il-pannelli tax-xemx, tibdel it-twieqi u ttejjeb l-iżolazzjoni jistgħu jgħinuk taħli ħafna inqas. Il-bidliet li tagħmel fl-ispazju tiegħek jistgħu jkunu eliġibbli għal ħlasijiet lura, tnaqqis fit-taxxa u inċentivi oħra.

Sir af kif tilqa' n-nies b'mod sostenibbli

Punti ewlenin

  • Tħallix riħ jidħol u waħħal apparat biex tnaqqas il-ħela tal-ilma

  • Ibdel l-appliances il-kbar u tħallix l-appliances iż-żgħar imqabbdin

  • Aqsam mal-klijenti dak li qed tagħmel biex tkun iktar sostenibbli

Airbnb
14 ta’ Diċ 2022
Dan kien ta' għajnuna għalik?