L-għaqal fil-ħidma ta' kuljum: Intervista ma' Chip Conley

Ninsabu kuntenti ħafna li nilqgħu lil Chip Conley biex jaqsam il-ħsibijiet tiegħu dwar ir-rabta bejn l-għerf u x-xogħol u dwar kif il-komunità tal-Hosts ta' Airbnb għenet biex issawwar il-karriera tiegħu. L-investiment ta' Chip—imprenditur tal-ospitalità għal żmien twil, konsulent strateġiku ta' Airbnb, awtur u persuna li jitkellem favur il-Hosts—f'din il-komunità tal-Hosts għandu għeruq fondi u legat twil. Il-ktieb il-ġdid tiegħu, Wisdom@Work: The Making of a Modern Elder, jipprova jispjega mill-ġdid l-idea li meta persuna tikber fl-età jkollha opportunità biex taqsam l-għarfien tagħha u terġa' tibda titgħallem.

M: L-ospitalità u l-komunità tal-Hosts ta' Airbnb ilhom parti minnek għal ħafna snin. Dak ix-xogħol kif kien ta' spirazzjoni għall-għerf li taqsam mal-oħrajn fil-ktieb il-ġdid tiegħek?
Chip Conley: "L-ewwel nett, nimmissja l-komunità tal-Hosts tagħna. Matul l-erba'snin tiegħi bħala wieħed mill-kapijiet tal-kumpanija, kont nieħu gost nivvjaġġa madwar id-dinja u nitgħallem mingħand il-Hosts tagħna. Hemm qawl antik, "L-għarfien jitkellem, imma l-għerf jisma'," u sibt li l-komunità tal-Hosts tagħna jafu jisimgħu ħafna imma fl-istess ħin jagħtu ħafna lill-komunità kollha. Tgħallimt ħafna mill-"għerf tal-folla" (il-komunità tal-Hosts dinjija tagħna) u nittama li jsibu xi ftit mill-ħsibijiet tagħhom rappreżentati fil-ktieb il-ġdid tiegħi, fejn nispjega għaliex id-dinja għandha tapprezza l-għerf f'dinja li hija dejjem iktar hija dominata mit-teknoloġija."

M: X'jistgħu jitgħallmu l-Hosts mill-mod kif tħares lejn l-għerf miksub matul l-esperjenzi ta' ospitalità tagħhom?
Conley: "Kienet esperjenza interessanti għax fil-ħames snin u nofs li qattajt mal-kumpanija (l-aħħar sena u nofs bħala konsulent) kelli d-doppju tal-età tal-ħaddiem medju ta' Airbnb . Għamilt l-almu tiegħi biex naqbeż għall-interessi tal-komunità tal-Hosts tagħna; b'mod speċjali għall-Hosts li huma ftit ikbar fl-età. Brian u l-fundaturi l-oħra japprezzaw ħafna l-fatt li l-Hosts li għandhom 50 sena jew iktar jiksbu l-aqwa punteġġi fuq Airbnb għal dak li għandu x'jaqsam ma' sodisfazzjon tal-klijenti; l-aqwa fost il-gruppi tal-etajiet kollha. Jaf hemm ftit raġunijiet għal dan: għandhom iktar ħin biex jaħdmu fuq il-ħiliet tal-ospitalità tagħhom, għandhom intelliġenza emozzjonali ikbar (karatteristika importanti għall-aqwa Hosts) li tinkiseb bl-età u forsi għandhom impenn iktar fit-tul biex jilqgħu n-nies għax għalihom ikun mezz biex joħolqu d-dħul għal meta jirtiraw. Ma naħsibx li hemm xi grupp ta' etajiet wieħed li għandu monopolju fuq l-għerf, iżda hija kwalità li wieħed jista' jikkultivaha u jaħsadha maż-żmien."

M: Il-kunċett tal-ospitalità kif inbidel, jekk inbidel, għalik minn meta kellek għoxrin, tletin, erbgħin sena u aktar?
Conley: "Meta ta' madwar ħamsa u għoxrin sena bdejt Joie de Vivre Hospitality (fl-1987), il-kumpanija kienet waħda mill-ewwel kumpaniji tal-boutique hotels fl-Istati Uniti. Konna qed nagħtu prova li numru dejjem ikbar ta' vjaġġaturi kienu qed ifittxu esperjenza iktar personalizzata fil-lukandi. Interessanti l-fatt li biddilna t-titlu tal-aġenti tar-reception tagħna minn "skrivani" għal "hosts", għalhekk l-idea tal-ospitalità ilha parti minni għal 32 sena. Matul l-24 sena Ii kont CEO ta' dik il-kumpanija, ħloqna 52 boutique hotels u kien jidher ċar li l-kumpaniji l-kbar riedu jibdew jidhru iktar bħal boutique hotels (iktar attenzjoni għad-disinn, ristoranti u bars aħjar, jiffukaw iktar fuq esperjenzi lokali, eċċ.). Meta ngħaqadt ma' Airbnb bħala l-Kap tal-Ospitalità u l-Istrateġija Globali rajt din it-tendenza l-ġdida għall-qsim tad-djar mal-oħrajn bħala l-innovazzjoni tal-boutique hotel fuq skala ikbar, peress li t-teknoloġija għenet lil Airbnb taqbad dil-ospitalità lokalizzata u tkabbarha fuq skala dinjija. Meta Brian Chesky avviċinani biex ningħaqad mal-kumpanija ħames snin u nofs ilu, staqsieni, "Kif tixtieq tiddemokratizza l-ospitalità?" U naħseb li dan huwa dak li għamlu Airbnb u l-komunità ta' Hosts mill-aqwa tagħna."

M: X'inhu parir wieħed li kieku tagħti lil Host ġdid li għadu jibda?
Conley: "Dik il-ħaġa komuni fost l-aqwa Hosts tagħna minn madwar id-dinja hija taħlita tal-fatt li jkunu organizzati ħafna u jilqgħu lill-klijenti mill-qalb b'ħafna empatija. Dawn huma affarijiet differenti, u xi Hosts jafu jkunu aħjar f'ħaġa milli f'oħra, imma dawk li jirnexxielhom jitgħallmuhom it-tnejn—xi kultant bħala koppja li jibbilanċjaw il-ħiliet ta' xulxin—jiksbu suċċess kbir."

M: X'qed tippjana Chip? X'tixtieq li tara matul l-istaġun li jmiss?
Conley: "Li nkompli nkun konsulent strateġiku għal Brian u għad-diretturi tal-kumpanija tiegħu. Matul il-proċess biex nikteb Wisdom@Work, innutajt kemm jeżistu nies ta' mezz'età u anki ikbar li jixtiequ jibdlu ħajjithom u l-karriera tagħhom iżda m'hemmx biżżejjed riżorsi biex ngħinu lil dan-nies li jridu jagħmlu bidla f'nofs ħajjithom. Għalhekk jien ħloqt l-ewwel skola fid-dinja tal-għerf għan-nies ta' mezz'età, il-Modern Elder Academy, maħsuba biex tagħti l-post u l-għodod meħtieġa biex wieħed jagħti tifsira ġdida lill-esperjenza tal-ħajja ta' student. Dan huwa kampus mal-baħar, siegħa lejn it-Tramuntana minn Cabo San Lucas fin-Nofsinhar ta' Baja, il-Messiku—għalhekk spiċċajt lura fin-negozju tal-ospitalità. Għandna nies minn madwar id-dinja kollha ġejjin jingħaqdu magħna."

Biex taqra iktar dwar il-ktieb ta' Chip u l-Modern Elder Academy, żur il-websajt tiegħu.

L-informazzjoni li tinsab f'dal-artiklu jista' jkun li nbidlet minn meta ġie ppubblikat.